Deuteronomi 17 - Iaai Bible 1901 (New Caledonia)

¹ U ME ca he ka hudo kö Iehova Khongom ke bolok me mamoe ae hu hnyikongon, kʼ ame ne ca so: anyin a wale hûkötianö Iehova Khongom.

² Adre me ne wâ unyâm, hnyi je hnyabam a ham köu Iehova Khongom, ke at, ame ne baga, ame ne momo, ame ânyâ hulö hnyi hnyimakö Iehova Khongom, kʼ ame hanyâûâ anyin ûhihinyköu,

³ kʼ ame he me bi athnyabainy ke je khong me khudrung ködrin, ame ne seûno, ame ne tehi, ame ne ke ûnyi hnyi drany, wale oge ca hûna;

⁴ ke adre thumetu u, ke u je löng ut e, me hamâm he ka elâm wia, ke, wâ bi, ame ne hnathu, ke manen dut a gʼ adre ânyâ hnyi Isaraela ûnyi eling ae ikiki;

⁵ awe, u me he ka hom at eling ka hnyi homagöulem, ame ne baga, ame ne momo, at ame ânyâ ûnyi eling ae kong; ke u me he ka luʼ ödrin ge veto, ame ne baga ame ne momo, me me mokcu.

⁶ Adre me he ka hlingâ at ae ûcû ka hnyi mok, ge ifucin hnyat ohnatho a lo li at, ame ne kun; kʼ adre me ca he ka hlingâ ge ifucin at ohnatho a khaca.

⁷ Ke ame he ka bân je hnyamen hnyat ohnatho hon he ka hlingâ, ke biliny bi je hnyamen tavat hia. Me waleling u me he ka ohia ta je ûnyi ae kong unyâm.

⁸ Ame ne hmak köu ke ûnyi he ka owisa, hnyi ke dra me ke dra, ame ne ke û hnei me ke ûhnei, ame ne ke ukuc me ke ukuc, a ta je ûnyi hnân iwatretra hnyi je homagöulem: awe, u me he ka tot me he ka hnyi dok ame he Iehova Khongom ka ûca;

⁹ ke u me he ka he ka hnyat bihut a at Levi, me at owisa hnyi ûen e: ke u me he ka hnei; me ödrin e he ka thumetu u ge obiny hna owisa:

¹⁰ ke u ma he ka ânyâ hoton hofuc ödrin e he ka thumetu u hnyi dok eling ame he Iehova ka ûca; ke u me he ka wâ wia me ânyâ hoton ta je hofuc ödrin e he ka nö u hnyin;

¹¹ u me he ka ânyâ hoton hna ha hnen hnanyibu ödrin e nö u, me hoton hna owisa ödrin e he ka ha köu: ke u me ca he ka saû ge hofuc ödrin e he ka thumetu u, ka hnyi ke keihen a metâ, me me.

¹² Ke haba at ame he ka sheshamökâ, kʼ ame ca löng hoton at bihut a at ame labö huliwa eling hnyi hnyimakö Iehova Khongom, ame ne at owisa, me ame he ka mok at eling: me u me he ka ohia hulö unyi Isaraela.

¹³ Ke ame he tavat hia ka löng me ot, kʼ adre me ca he hmetu ka ânyâ sheshamök.

¹⁴ U ka o ka hnyi hnyei a ham Iehova Khongom köu, kʼ ame he ka hu gam, me labā; ke u me he ka ha, ka habe, Oge me he ka otilâ than huk, helâ me je knyei igigili nya;

¹⁵ awe, u me he ka otilâ than a at ame he Iehova Khongom ka ûca: ke u me he ka otilâ ânyâm than ûnyi hnyi je liamekeiny mou: kʼ u me ca he ka otilâ atkanyua hom, a ca liamekeiny möu.

¹⁶ Ke so bi e ca so e ame osehia je hors hobi kâu, me ohmeto tavat Aigupito ai, me me he ka osehia haleny je hors: anyin a hia but ha Iehova köbun, ka habe, Öbun e ca he ka hmetu hnyi gethen eling.

¹⁷ Ke e ame ca he ka osehia je laâiân, wâ e nye saû hnyekon: ke ca so e ame ûkhöûnâ sileva me gol hnân hobi kâu bi.

¹⁸ Ke ka laba hon theroniny dokhon dökhu, me e ame he ka uny je hnanyibu eang hobi kâu, ka hnyi ke tusi hnyi hnyimakan tavat bihut a at Levi:

¹⁹ kʼ ame he ka e bi unyin, me e ame he ka aû e hnyi je bong bongon anyin möt hia: me me nâ he ka outö Iehova Khongon, he ka vheno ta je hofucin hia hnanyibu eang, me je hna hûna eang, me ânyâ:

²⁰ me me ca he ka bi gan hnyekon hon je liamekeiny mê, me saû ûnyi hnyi hnanyibu ha hnyi ke keihen metâ, me me: waleling me me he ka obeûâ je bongon hnyi dokhon dökhu, e me je lakon, hnyi Isaraela.