Deuteronomi 16 - Iaai Bible 1901 (New Caledonia)

¹ HAMÂM he ka tuö tehi Abiba, me ânyâ paseka kö Iehova Khongom: anyin a haba hnyi tehi Abiba Iehova Khongom ame hum u ûheny Aigupito hnyi hnyinghet.

² Ke u me he ka hudo paseka kö Iehova Khongom, ûnyi hnyi je mamoe, me kau, hnyi dok ame he Iehova ka ûca hnân umen ien bi.

³ U me ca he ka tha han e me leven, u me he ka han e me areto adre ca levenâ hnyi je bong a seven, a aretoiny vec eling; anyin a u je he mweimwei ûhem hnyi hnyei Aigupito: mʼ u me he ka ûnykûme hnyi bongom ta je bong hia, ge bong u me he ûhem hnyi hnyei Aigupito.

⁴ Ke adre me ca he ka wâ leven unyâm hnyi seven ta bong hnyi em hnyei; kʼ adre me ca he ka ip ke ne o but hnyi; hnyomakatu ke keihen uthmeno u je hudo hnyi bong a bân hnyi sahac.

⁵ U me ca he ka hudo paseka hnyi je hnyabam a ham köu Iehova Khongom:

⁶ ke so bi hnyi dok ame he Iehova Khongom ka ûca hnân umen ien bi, ke u me he ka hudo eling paseka hnyi sahac e ka dit seûno, cicö ûen u je he ûheny Aigupito.

⁷ Ke u me he ka thân e me han hnyi dok ame he Iehova Khongom ka ûca: ke u me he ka hwio hnyi hnyomakatu me he ka hnyi umâm je uma mano.

⁸ Siks je bong u me he ka han areto adre ca levenâ: ke haba hnyi bong a seveniny ame he ka hu ûkhacaköu ae ûnyi hnathu kö Iehova Khongom; kʼ u me ca he ka huliwa.

⁹ U me he ka aû je wik a seven; ke u me he ka hwân ka aû je wik hnyi hna ibi hwân subâ hwit ame tot.

¹⁰ Ke u me he ka tuö bijeûiny je wik kö Iehova Khongom me bwihlany a hudiny ibetengiö ûnyi hnyi hnyamâm, ke u me he ka ham e hoton hnö Iehova Khongom hna ohnahici u:

¹¹ ke u me he ka senyin hnyi hnyimakö Iehova Khongom, u, me nokom baga, me hlu, me athnyabaem a baga, me momo, me at Levi hnyi je hnyabam, me atkanyua, me nakahme, me safac unyâm, hnyi dok ame he Iehova ka ûca hnân umen ien.

¹² Ke u me he ka ûnykûme hna thaluö u hnyi Aigupito: ke u me he ka wâ wia me ânyâ je hnanyibu e.

¹³ Ke u me he ka ânyâ bijeûiny je uma hunuma, hnyi je bong a seven, hwaban hnâm hna ip ûnyi hnyi uma hnân uja ânyâm hwit, me ûnyi hnyi hna hlec ânyâm vine:

¹⁴ ke u me he ka senyinâ ânyâm bijeû, u, me nokom baga, me hlu, me athnyabaem baga, me momo, me at Levi, me atkanyua, me nakahme, me safac hnyi ta je hnyabam.

¹⁵ Seven je bong u me he ka ânyâ bijeû kö Iehova Khongom hnyi dok ame he Iehova ka ûca: anyin ame he Iehova Khongom ka ohnahici u hnyi troban em hnyei hia, me ta je huliwa hia anyin li hnyamâm, ke u me he ka ti, senyin.

¹⁶ Ke ame he obaga hia ka okun o hnyi hnyimakö Iehova Khongom hnyi huna hnyi dok e ame he ka ûca: hnyi bijeûiny areto adre ca levenâ, me bijeûiny je wik, me bijeûiny je uma hunuma: ke adre me ca he ka manen hnyi hnyimakö Iehova ke ba ta ûnyi:

¹⁷ adre me he ka ve ham hoton hnödra hna khana, ke hoton hnahic ûnyi ga Iehova Khongom wale e ame ham köu.

¹⁸ Ke u me he ka otilâ hnyat owisa, me je taben hnyi em hnyei hia a ham köu hnö Iehova, hnyi ânyâm je tribu: ke ödrin e he ka owisa tavat ge hna owisa ae wisa.

¹⁹ U me ca he ka ohwalö hna owisa; ke u me ca he ka wâhmakhmetoâ at bi: ke u me ca he ka kap bwihlany; anyin a haba bwihlany, me wale at ame omûko tavat ae metâ, me ohavâ hofuc hwan tavat ae wisa.

²⁰ U me he ka hnu hoton hwakecin ae ti wisa, mʼ u me möt bi me hu hnyei wale a ham köu Iehova Khongom.

²¹ U me ca he ka ta ke ûö hnân bi Aseira hobi köu, hakekenyâ taben hut anyi Iehova Khongom wale u me he ka ânyâ hobi köu bi.

²² Ke u me ca he ka otilâ hobi köu ke veto ame tot; wale ûnyi ame hûkötiâ Iehova Khongom.