Deuteronomi 15 - Iaai Bible 1901 (New Caledonia)

¹ KE haba hnyi obiny huna a seven, me u me he ka hna baûâ.

² Ke walang hwakecin hnâm hna he ka hna: haba tavat adre hia but ham gufa ka ke at, ame ne liamekeiny, me adre me he ka hna baûâ; anyin adre hia but haimemenâ hna hna baûâ hnö Iehova.

³ Ame ne aten ke hnyei, me khatö u he ka hom hmetu e: ke haba ânyâm ta je ûnyi a e unyin liamekeiny mou, me ame he hnyamâm he ka hom hmetu e.

⁴ Ke so e ba at unyâm ae ba ta ûnyi; (anyin ame he Iehova ka ti ohnahici u hnyi hnyei ame he Iehova Khongom ka ham köu hnân em, mʼ u me tren e;)

⁵ wale u je ne löng wia hofuc ho Iehova Khongom, me tuö me ânyâ je hnanyibu eang wale oge me hûna köu hnyi bong ang.

⁶ Anyin a Iehova Khongom ame he ka ohnahici u helâ me hnen hna ha köu; ke u me he ka me ham ta je ûnyi ka ta je hnyei ae se hia, ke u me ca he ka me sumat; ke u me he ka muso je hnyei ae se, kʼ adre me ca he bi ka musi u.

⁷ Ame ne hu ke at unyâm ae ba ta ûnyi, a liamekeiny mou, hnyi ke hnyaba hnyi em hnyei, wale a ham köu Iehova Khongom, me, u me ca he ka okhötâ hnyekom, me thu hnyamâm ka liamekeiny möu a at ae theduoc:

⁸ ke u me he ka lau hnyamâm kâu, me u me he ka me ham gânâ kâu ûnyi ae ûcû ka hnyi weny.

⁹ Wâ eâu, wâ e nye hu ûnykûme ae kong eû hnyi hnyekom, me ha, ka habe, E hakekeny jut huna a seveniny, a hunainy hna baûâ; me ame kong emakâm ka liamekeiny mou ae theduoc, me ca ham ûnyi bi kâu; ke e ame he ka tenge kö Iehova gam, mʼ u me hulö but.

¹⁰ E ao u ma ham kâu, kʼ ame ca he bi hnyekom ka hmak he ka ham kâu: anyin a can ûnyi eling ame he Iehova Khongom ka ohnahici u hnyi ânyâm ta je huliwa hia, me ta je ûnyi hia u ma he ka ip hnyamâm ka hnyin.

¹¹ Anyin ame ca he ka ba at ae theduoc hnyi hnyei: anyin a wale inya oge me hûna köu, ka habe, U me he ka lau hnyamâm ka liamekeiny mou, wale hnyat unyâm ae theduoc, me hnyat ae ba ta ûnyi hnyi em hnyei.

¹² Ke adre ne ûco köu ke at Heberu a liamekeiny möu, ame ne baga, ame ne momo, kʼ ame ne bi athnyabaem hnyi je huna a siks; me hamâm he ka hna baûâ e ûheny unyâm hnyi huna a seveniny.

¹³ Ke u ka hna baûâ e ûheny unyâm, me u me ca he ka kunâ ke ba ta ûnyi;

¹⁴ u me he ka ohuâ e me ca behânâ ûnyi hnyi halem je mamoe, ke ûnyi hnyi hna uja ânyâm hwit, me hna hlec ânyâm vine: ke u me he ka ham kâu helâ me Iehova Khongom ame ohnahici u.

¹⁵ Ke u me he ka ûnykûme a gʼ adre thaluö u hnyi hnyei Aigupito, ke Iehova Khongom ame omeli u; anyin a wale, inya oge me hûna köu hofuc e hnyi bong ang.

¹⁶ Ke ame ne he ka ha köu, ka habe, Oge me ca he ka he gam; anyin a e ame hnyok köu me ânyâm lap, anyin ae so e unyâm;

¹⁷ awe, u me he ka hom ûnyi hnân koû, me koû hnyikonyen ka hnyi hlinginy hwanuma, ke e ame he ka bi athnyabaem nyiele balua. Ke u me he ka ânyâ helâe minya ka athnyabaem a momo.

¹⁸ Ke u ka hna baûâ ke at ûheny unyâm e so e ca he ka hmak hnyekom; anyin a haba anyin huliwa me ûcû me huliwa anyin lo li at adre hawâ, hnyi je huna a siks e ame bi athnyabaem: kʼ ame he Iehova Khongom ka ohnahici u hnyi ta je unyi hia u me he ka ânyâ.

¹⁹ Haba je lakon a bân ka hnokoâ ge halem je kau, me mamoe, a je baga hia, me u me he ka okabâ kö Iehova Khongom: u me ca he ka kunâ nokon halem kau a bân he ka huliwa, me subâ leûnen nokon halem mamoe a bân.

²⁰ Ke u me he me ânyâm lap he ka han e hnyi hnyimakö Iehova Khongom, hnyi je huna hia thibut, hnyi dok ame he Iehova ka ûca.

²¹ Ke ame ne hu hnyikongon, ame ne kong can, ame ne wadröu, ame ne ke hnyikongon ae kong, me u me ca he ka hudo e kö Iehova j Khongom.

²² U me he ka han e hnyi je hnyabam; kʼ ame he ka hnyi han tavat ae bo kong me bo so, helâ me hnödra hna han zebi me aila.

²³ Ke so bi u me ca he ka han dren: ke u me he ka hingâlâ e hon: kânâ helâ me köiö.