Deuteronomi 13 - Iaai Bible 1901 (New Caledonia)

¹ A NE o ûnyi gam ke perofeta, ame ne at bwi, ke e ame ham köu ke haten, ame ne ûnyi hnân lâiâ,

² ke e ka hwâdâ thö haten, ame ne ûnyi hnân lâiâ, waleji e ame ha köu, ame ha, ka habe, Ötin e he ka hnu hoton ke je khong ae ca khanö u, me bi athnyabaidrin:

³ awe, u me ca he ka löng hofuc hwan at eling, ame ne perofeta, kʼ ame ne at bwi: anyin a Iehova Khongubun ame cubic öbun he ka wâ öbun e ne hnyok kö Iehova Khongubun ge hnyekubun ae bekhöt, me hanubun ae bekhöt.

⁴ Öbun e he ka hnu hotu Iehova Khongubun, me outen, me tuö anyin je hnanyibu, me löng ifucin, kʼ öbun e he ka bi athnyabainy, me kece kâu.

⁵ Ke haba at eji, ame ne perofeta, kʼ ame ne at bwi, me adre me he ka hlingâ; anyin a e ame hia but ûkhin fuc kö Iehova Khongubun at ame hum öbun ûheny hnyi hnyei Aigupito, me ûcû u ûnyi hnyi hnyaba ae ûthaluo, he ka lili u ûnyi hnyi gethen waleji Iehova Khongom ame hûna köu he ka vheno. Me u ma he ka ohia helâe hulö unyâm.

⁶ Ame ne alecuâ duöngi u hnen liamekeiny mou a nokon hinyâm, kʼ ame ne nokom baga me hlu, kʼ ame ne âiâm, kʼ ame ne waem at u me hnyokâ, ke haingen, ka habe, E so otu me he ka bi athnyabainy ke je khong ae ca khanö u me lakâmâm;

⁷ a je khongon ta je hnyei igigili öbun, ame ne hakekeny ame ne ûsâkâûö mou, hwân hnyi ke can hmeledrany ke ne o but ka hnyi ke can;

⁸ u me ca he ka ogâ kâu, me löng kâu; ke haba khaca, u me ca he ka betenge gan, me hna, ke u me ca he ka ikhâlâ:

⁹ ke u me he bi ka hlingâ; u ma bâm ka ip hnyamâm hon he ka hlingâ, ke biliny bi je hnyamen tavat hia.

¹⁰ Ke u me he ka lûâ e ge veto, me me mokcu; can e ame heleû deny he ka thong u ûnyi ga Iehova Khongom, at ame hum u ûheny hnyi hnyei Aigupito, ûnyi hnyi hnyaba ae ûthaluo.

¹¹ Kʼ ame he at Isaraela hia ka löng, me ot, kʼ adre me ca he hmetu ka ânyâ ûnyi eling unyâm a ûnyi ae kong.

¹² Ke u je ne löng hnyi ke taun a ham köu Iehova Khongom he ka labā, ka habe,

¹³ A he but ke je hnyat ae kong ûheny unyâm, ke ödrin e hia but thang aten anyidrin taun, me ba, ka habe, E so ötin e he ka bi athnyabainy ke je khong ae ca khanʼ öbun;

¹⁴ awe, u me he ka hnei, me elâm, me hnö wia; ke ame ne hnathu, me manen a gʼ adre hia but ânyâ ûnyi eling ae ikiki unyâm:

¹⁵ me u me he ka ti kot tavat aten taun eling ge hele vat, me ti ohia, me ta je ûnyi hia hnyin e, me omenoiny hia, ge hele vat.

¹⁶ Ke u me he ka khon ta je ûnyi hia adre hûgûnâ ka hnyi wanben gethen, me le degecâ taun ge meic, me ta je ûnyi hia adre hûgûnâ, hobi kö Iehova Khongom: kʼ ame be ka hna digic thatûnyi nyiele balua, kʼ adre me ca he hmetu ka op e.

¹⁷ Ke e so ame ca he ka kece ka hnyi hnyamâm ûnyi adre ohnauhangoâ: me me he Iehova ka degec ûbâhlâiny hmönyin, kʼ ame he ka betenge gam, me hnyok köu, me osehiö u, helâ me hnen hna khemanyin ka lakâmâm;

¹⁸ u ka he ka löng hoton hofuc ho Iehova Khongom, he ka tuö anyin je hnanyibu, wale oge me hûna köu hnyi bong ang, he ka ânyâ ûnyi ae wisa hnyi hnyimakö Iehova Khongom.