Deuteronomi 12 - Iaai Bible 1901 (New Caledonia)

¹ WALANG je hnanyibu me je hna owisa öbun e he ka tuö he ka ânyâ hnyi hnyei a ham köu hnö Iehova Khongon lakâmâm he ka hu e hnyi ta je bong bongon anyibun möt hia eang hmelen.

² Öbun e be ka ti ohia ta je dok hia adre me bi athnyabainy hnyin je khongudrin hnyi je hnyei öbun e he ka hu, walʼ ethö hon je bucen ae beû, me je dok ae görany, me hmelen je ûö hia ae hat:

³ ke öbun e he ka kia anyidra je taben hut, me khûâ oamemâ anyidra je veto ame tot, me thong degecâ anyidra je Aseira ge meic; ke öbun e he ka sö degecâ je hnatheatiny anyidra je khong; ke öbun e he ka ohia je iödra ûnyi hnyi dok eling.

⁴ Öbun e ca he ka ânyâ helâe kö Iehova Khongubun.

⁵ Ke haba dok ame he Iehova Khongubun ka ûca ûnyi hnyi anyibun je tribu hia me me ip eling ien bi, awe öbun e he ka elâm e wale hnyaban me he kâ e:

⁶ ke öbun e he ka hom kâ e anyibun je hudiny leû, me anyibun je hut, me anyibun je ke keihen a libenyitainy, me je hudiny kap goranyai hnyi hnyamöbun, me anyibun je khöbi, me anyibun je hudiny ibetengiö, me je nokon a bân hnyi halebun je kau me mamoe:

⁷ ke öbun e he ka han e hnyi hnyimakö Iehova Khongubun, me öbun e he ka senyinâ ta je ûnyi hia öbun e ânyâ, öbun me anyibun je lap, wale ame ohnahici u hnyin Iehova Khongom.

⁸ Ca he öbun ka ânyâ hoton ta je ûnyi hia ate me ânyâ eang hnyi bong ang, wale ae ve so hnyi li emakan ke at me ke at:

⁹ anyin a öbun e tiga ca o ka hnyi hna menâ me hwajekon ame ham köu Iehova Khongubun.

¹⁰ Ke öbun ka he ka hanyâûâ Joridano, me labā hnyei a ham Iehova Khongubun me ibun, ke e ame omenʼ öbun ge je iwahnaihmiony hia möbun igigilö, me öbun e laba hnahic;

¹¹ awe, haba dok ame he Iehova Khongubun ka ûca hnân umen ien bi; me öbun e he ka hom kâ e ta je ûnyi oge hûna köbun; wale je hudiny leû, me anyibun je hut, me anyibun je ke keihen a libenyitainy, me je hudiny kap goranyai hnyi hnyamöbun, me anyibun ta je khöbi hia ae ûnyi hnathu kö Iehova:

¹² ke öbun e he ka senyin hnyi hnyimakö Iehova Khongubun, öbun, me lakubun obaga, me lakubun wahlu, me lathnyabaibun obaga me omomo, me at Levi hnyi anyibun je lap, anyin ae ba hwajekhon, ke ba iny bi unyibun.

¹³ Wâ wia u nye he ka hudo ânyâm je hudiny leû hnyi je dok hia u me wâ:

¹⁴ ke so thibi hnyi dok ame he Iehova ka ûca hnyi ânyâm ke tribu, ke u me he ka hudo eling ânyâm je hudiny leû, me ânyâ eling ta je ûnyi hia oge hûna köu.

¹⁵ Ke so bi e khatö u he ka hlingâ me han utioiny hnyi ânyâm je lap, hoton je weny hnyekom hia, me hoton hnahic ûnyi ga Iehova Khongom, wale e ame ham köu: kʼ ame he ka hnyi han hnen tavat ae bo kong me tavat ae bo so, helâ me zebi, me aila.

¹⁶ Ke so bi öbun e ca he ka han dren: kʼ öbun e he ka hingâlâ e hon kânâ helâ me köiö.

¹⁷ U me ca he ka han hnyi ânyâm je lap je ke keihen a libenyitainy ânyâm hwit, me ânyâm waina, me ânyâm wakaco, me nokon halem kau a bân, me mamoe, me ânyâm je khöbi wale u je bi khöbi, me ânyâm je hudiny ibetengiö, me hudiny kap goranyai hnyi hnyamâm:

¹⁸ ke u me he ka han ta je ûnyi e hnyi hnyimakö Iehova Khongom, hnyi dok ame he Iehova Khongom ka ûca, u, me nokom baga, me nokom hlu, me athnyabaem baga me momo, me at Levi hnyi ânyâm je lap: ke u me he ka senyinâ hyni hnyimakö Iehova Khongom ta je ûnyi hia u me he ka ânyâ.

¹⁹ Wâ eâu u nye he ka hna degecâ at Levi hnyi bongom ta je bong hia hnyi em hnyei.

²⁰ Ke e ka he Iehova Khongom ka ogânâ je hnyigöulem, helâji me hnen hna ha köu, ke u je ne he ka ha, ka habe, Oge me he ka han meno, anyin a iny behan meno; awe, u me he ka han hoton wem.

²¹ Ke ame ne ti sâkâu gam dok ame he Iehova Khongom ka ûca me me ip ien hnyin, awe, u me he ka hlingâ halem ke je kau me mamoe, a ham köu Iehova, helâ me hnok hna hûna köu, ke u me he ka han hnyi ânyâm je lap, hoton je weny hnyekom hia.

²² U me he ka han e helâ me hnödra hna han zebi, me aila: kʼ ame he at ae bo kong me bo so he ka hnyi han.

²³ Ke so bi, wâ eâu, me ca he ka han dra: anyin a haba dra, me, wale möt; ke u me ca he ka tha han möt me utioiny.

²⁴ U me ca he ka han e, ke u me he ka hingâlâ e hon kânâ helâ me köiö.

²⁵ U me ca he ka ban e; mʼ u me so bi, me lakom hwabâm, u ka ânyâ wisa hnyi hnyimakö Iehova.

²⁶ Ke haba ânyâm je ûnyi ae kap, me ânyâm je khöbi, me u me he ka hom me he ka hnyi dok ame he Iehova ka ûca:

²⁷ ke u me he ka hudo ânyâm je hudiny leû, a utiö me dra hon taben hut kö Iehova Khongom; ke adre me he ka hingâlâ dren ânyâm je hut hon taben hut anyi Iehova Khongom, ke u me he ka han utioiny.

²⁸ Wâ wia me löng hoton ta je hofuc eang, wale oge me hûna köu, mʼ u me so, me lakom hwabâm nyiele balua, u ka ânyâ ûnyi ae so me wisa hnyi hnyimakö Iehova Khongom.

²⁹ Ke ka he Iehova Khongom ka subâ degecâ je hnyei hnyi hnyimâkâm, wale u me he ka hnyin me he ka hu, ke u ka tren, me labā idra;

³⁰ me wâ eâu, wâ e nye nuc u, u ka he ka he hotudra, e ka hia but obʼ ödra hnyi hnyimâkâm; ke wâ u nye hnei ge anyidra je khong, me ha, ka habe, Adre me kâmâu je hnyei eang ka bi athnyaba anyidra je khong? ke oge me he bi nya ka ânyâ helâe.

³¹ U me ca he ka ânyâ helâe kö Iehova Khongom: anyin adre hia but ânyâ ka anyidra je khong ta je ûnyi ae ikikiâ Iehova, wale e ame hûkötiâ anyin adre me labö le ge meic lakudra obaga me wahlu ka anyidra je khong.

³² Haba ta je ûnyi hia oge me hûna köbun, me öbun e he ka tuö me ânyâ: u me ca he ka bi hanen ka hnyin, me ohia hanen.