Deuteronomi 11 - Iaai Bible 1901 (New Caledonia)

¹ ANYIN a wale u me he ka hnyok kö Iehova Khongom, ke u me he bala ka tuö hnen hna otilâ, me anyin je hnanyibu, me hnen je hna owisa, me hnen je hna hûna.

² Khanʼ öbun ju hnyi bong ang: anyin a oge me ca fuc ka lakubun, tavat ae ca khana ke ca hnyi wâ hna bi hwaban ûnyi ga Iehova Khongubun, ge ûganiny, me hnyamen ae hwege, me benyin adre hai,

³ me anyin je ûöman, me anyin je huliwa, waleji e ame ânyâ kö Farao than Aigupito hnyi Aigupito, me lakeiny hia;

⁴ me hnen hna ânyâ ka tavat vat hnyi Aigupito, ka haledra je hors, me anyidra je kariota; waleji hnyi hnen hna khutukhavâ but Köiö ae Dra, waleji hnyi hnödra hna hnu öbun; me hnö Iehova hna ohiʼ ödra ke ne o but hnyi bong ang;

⁵ me hnen hna ânyâ köbun hnyi hnyebuba ke ne o but öbun e o eang;

⁶ me hnen hna ânyâ kö Dathana me Abirama li laku Eliaba nöku Reubena; waleji hnyi hna memang hnyimen kânâ me ut ödrin me anyidrin je lap, me umödrin je uma mano, me tavat ae möt hia ödrin e hnu hotudrin, hnyi hnyimakan at Isaraela hia:

⁷ ke so bi öbun e hia but wâ ge je emaköbun ta je huliwa ae gan hia anyi Iehova, waleji e ame ânyâ.

⁸ Anyin a wale hamöbun he ka tuö je hnanyibu hia oge me hûna köbun hnyi bong ang, mʼ öbun e hwege, me he, me hu hnyei öbun e he kâu, mʼ öbun e he ka hu;

⁹ me me se hia bongubun je bong hnyi hnyei ame khemanyin Iehova ka lakamöbun he ka ham ködrin me mâtrânidrin, a hnyei ame di hnen debai me hani.

¹⁰ Anyin a haba hnyei u me he ka he kâu mʼ u me he ka hu e, me ca helâ me hnyei Aigupito waleji u me o but ûheny hnyin, ke u je ta hatungâm je hatong, me bi deny köiö ge cam helâ me hna belökâ je khölak:

¹¹ ke haba hnyei öbun e he ka hnyin me me he ka hu e, me wale hnyei ae hu je bucen me je hnyigöulen bucen, kʼ ame ijem dân we ûnyi hnyi drany:

¹² e hnyei ame tuö hnö Iehova Khongom; ke e bala bi hon e li emakö Iehova Khongom, hwân hnyi hnyimakan huna ke ne o but hnyi obiny.

¹³ Ke öbun e ne he ka ti löng hoton anyik je hnanyibu oge me hûna köbun hnyi bong ang, he ka hnyok kö Iehova Khongubun, me bi athnyabainy ge je hnyekubun ae bekhöt, me hanubun ae bekhöt,

¹⁴ me oge me he ka ham we hobi kâu ibun hnyei hnyi ûen e, wale we a bân, me we a biliny, me u me he ka ip ânyâm je hwit, me ânyâm waina, me ânyam wakaco.

¹⁵ Ke oge me he ka ham hna önying ka hnyi em hnyei, hobi kâu halem omeno, ke u me he ka han me sekom.

¹⁶ Wâ wia öbun, wâ e nye iyawâ je hnyekubun, mʼ öbun e saû bi, me bi athnyabainy je khong me khudrung ködrin;

¹⁷ me ame he ka ubâhlâ hmönyin anyi Iehova köbun, me e ame he ka hlöng drany, me me ba we, kʼ ame ca he kânâ ka okûâ waniny; me ame he ka ie hiʼ öbun ûnyi hnyi hnyei ae so Iehova ame ham köbun.

¹⁸ Anyin a wale e so öbun e ohmâ hok hofuc eang eû hnyi je hnyekubun, me je hanubun; ke öbun e he ka ca ju e hnân haten hon je hnyamöbun, kʼ ame he ka hnân wen bariny hnyi wanben li emaköbun.

¹⁹ Ke öbun e be ka nâ hofuc e ka lakubun, me ûhnenamö gan, u ka laba hnyin umâm uma, me he eû hnyi gethen, ke u ka he ka mokut me köûö hmetu bi.

²⁰ Ke u me he ka sihnalimen e hnyi je uthwanumen umâm uma, me hnyi je homagöulem:

²¹ me me se hia bongubun je bong me bongon lakubun hnyi hnyei waleji a khemanyin hnö Iehova ka lakamöbun he ka ham ködrin, helâ me ta je bong bongon drany walethö hon hmeledrany.

²² Anyin a öbun e ne labö tuö je hnanyibu eang wale oge me hûna köbun he ka ânyâ, he ka hnyok kö Iehova Khongubun, he ka vheno deny je gethen hia, me kece kâu;

²³ awe, ame he Iehova ka obâ je hnyei hia eang ûnyi hnyi hnyimaköbun, ke öbun e he ka hu je hnyei ae gan me hwege hubun.

²⁴ Ame he ka ibun je dok hia ame he ka uto ge je hnyeûcabun: hwân hnyi hnyebuba, me Lebanona, hwân hnyi wagewe, a wagewe Euferate, ke ne o but hnyi köiö e jio, me wale hnyigöulöbun.

²⁵ E ba at ame he ka tot hnyi hnyimaköbun: kʼ ame he Iehova Khongubun ka ootâ me öbubunâ je hnyei gabun wale öbun e he ka uto, helâ me hnen hna ha köbun.

²⁶ Wâ bi, inya oge me ip hnyi hnyimaköbun hnyi bong ang hnahic me hnaû-hangö:

²⁷ wale hnahic, öbun e ne löng hoton je hnanyibu anyi Iehova Khongubun, walang oge me hûna köbun hnyi bong ang;

²⁸ ke hnaûhangö, öbun e ne ca löng hoton je hnanyibu anyi Iehova Khongubun, me saû bi ûnyi hnyi gethen oge me hûna köbun hnyi bong ang, he ka hnu hoton je khong monu, ae ca khanʼ öbun.

²⁹ Ke ka hia but Iehova Khongom lili u ka hnyi hnyei u me he ka he ka hnyin me me gam, me u me he ka ip hnahic hon bucen Girizim, ke hnaûhangö hon bucen Ebala.

³⁰ Hawa ca hoton Joridano li dok e, cicö hna dit hnen seûno, hnyi hnyei ing at Kanana tavat adre me laba hnyi Araba cicö Gilegala hakekeny sawajo anyi More!

³¹ Anyin a hamöbun he ka hanyâûâ Joridano, me he he ka hu hnyei wale a ham köbun Iehova Khongubun, ke öbun e he ka hu e me labā.

³² Ke hamöbun he ka tuö me ânyâ je hnanyibu hia, me je hna owisa wale oge me ip hnyi hnyi-ʼ maköbun hnyi bong ang.