Deuteronomi 1 - Iaai Bible 1901 (New Caledonia)

¹ WALANG ta je hofuc a ha Mose ka lakon Isaraela hia hnyi hoton Joridano, hnyi hnyebuba, hnyi Arabah cicö Sufe, hnyi wanben Parana me Tofel, me Labana, me Hazeroth me Dizahab.

² Eleven ta je bong ka he ûheny Horeba gethen hnyi bucen Seira ke ne o but Kadesi-banea.

³ Ke haba hnyi huna a fâte, hnyi tehi a eleveniny, hnyi bong a bâniny tehi, me haba Mose ame ha ka lakon Isaraela ta je ûnyi hia hoton hna hûna hnö Iehova kâu gadra;

⁴ hwaban hnen hna kuc Sihona thaniny at Amora, at ame laba Hesebona, me Oga thaniny Basana, at ame laba Asaterotha hnyi Ederei:

⁵ hoton Joridano, hnyi hnyei Moaba, me ame hwân Mose ka omanenâ hnanyibu eang, ka habe,

⁶ Haba Iehova Khonguta ame ha köta e Horeba, ka habe, So ju hnobun hna laba hnyi bucen eang:

⁷ hwio thʼ öbun me he ka hnyi bucen anyin at Amora, me je dok ae hakekeny kâ e, hnyi Arabah, hnyei ae hu je bucen hnyin, me hnyei ae hnyikânâ, me hnyi ke keihen ka hnyi Hwaiöu, me hobatköiö, a hnyei iny at Kanana, me Lebanona, ke ne o but hnyi wagewe ae gan, a wagewe Euferate.

⁸ Wâ bi, oge hia but ip hnyei hnyi hnyimaköbun: he thʼ öbun me labā hnyei waleji ame khemanyin ka lakamöbun, a Aberahama, me Isaaka, me Jekob, he ka ham ködrin, me je mâtrânidrin hwabödrin.

⁹ Ke oge me ha köbun hnyi ûen eling, ka haba, E pason könya a inyʼ khaca he ka tuʼ öbun:

¹⁰ hnö Iehova Khongubun hna osehiʼ öbun, ke wâ bi, helâ me je okhûiny drany ûsehiaibun hnyi bong ang.

¹¹ E na he ju Iehova Khongon lakamöbun ka osehi ʼöbun a je thauzaniny, me ohnahici öbun hoton hnen hna ha köbun!

¹² Oge me he ka kâmâu hna hake vadren hmakibun, me honöbun je hok, me anyibun je iwatretra?

¹³ Ûca thʼ öbun hobi köbun tavat ae metâ, tavat wâ tremângâ, a tavat adre wâhmakhmeto, hoton anyibun je tribu, ke oge me he ka otilʼ ödrin me hnân je taben köbun.

¹⁴ Ke öbun e thu könya me ha, ka habe, E so he ka ânyâ hofuc u me ha.

¹⁵ Waleling me oge me hom ta je taben anyibun je tribu, tavat ae metâ, adre wâhmakhmeto, me otilʼ ödrin hnân je homakan köbun, a je taben thauzan, me je taben haded, me je taben fifte, me je taben ten, me tavat musi, hoton anyibun je tribu.

¹⁶ Ke oge me hûna ka tavat owisa hnyi ûen eling, ka habe, Öbun e he ka löng je iwatretra anyin je liamekeiny möbun, me owisa wia ka at me liamekeiny mē, me atkanyua unyin.

¹⁷ Ca he öbun ka wâhmakhmetoâ hnyi ûhnei; e so öbun e löng wia hofuc hwan at ae gan me at ae ûhnyûkong; ca he öbun ka ot hnyi hnyimakan at; anyin a ûnyi ge Khong hna owisa: ke haba ûnyi ae hmak köbun, öbun e he ka hom könya mʼinye löng dö.

¹⁸ Ke oge me hûna köbun hnyi ûen eling ge ta je ûnyi hia öbun e he ka ânyâ.

¹⁹ Ke ûheta Horeba me ötin e vheno hnyebuba ae gan me hnân outen, waleji öbun e wâ, hnyi gethen ûheny hnyi bucen iny at Amora, hoton hnö Iehova Khonguta hna hûna köta, mʼ ate me o but Kadesi-banea.

²⁰ Ke oge me ha köbun, ka habe, Öbun e o but walang ang ka hnyi bucen at Amora, wale hnö Iehova Khonguta hna ham köta.

²¹ Wâ bi, hnö Iehova Khongom hna ip hnyei hnyi hnyimâkâm: ölö thö me labā, helâ me Iehova Khongon lakâmâm ame ha köu; ca ot bi me öbubuny.

²² Me öbuu hia öbun e hakekeny könya, me ha, ka habe, E so ate me kunâ bânâ ke je hnyat, ke ödrin e he ka ecmâkâ hnyei hobi köta, me hmetuhmetu he ka thumetu ota ge deta gethen he ka ölö, me je taun ate me he ka o ka hnyin.

²³ Ke so könya hobun hofuc: me oge me hom ûheny unyibun je hnyat a twelv, a usa khaca ûnyi hnyi je tribu:

²⁴ ke ödrin e he me öliâ bucen, me o hnyi hnyigöulen bucen e Esekolo, me ecmâkâ e.

²⁵ Ke ödrin e hom hnyi je hnyamödrin jeûiny hnyei, me hom köta, me thumetu ota, ka habe, E so hnyei a ham köta Iehova Khonguta.

²⁶ Ke so bi öbun e höcö ölö, ke öbun e hanyâûâ hofuc ho Iehova Khongubun:

²⁷ ke öbun e ulidro hnyi umöbun je uma, ka habe, Anyin a Iehova ame hûköti ota, me e ame hum ota ûheta hnyi hnyei Aigupito he ka hnʼ ota ka hnyi je hnyamen at Amora he ka ohiʼ ota.

²⁸ Ate me ölö ua? haba je liamekeiny möta ödrin e oköiâ je hnyekuta, haingödrin, ka habe, E gan hmâ tavat me beû huta; ke gan hmâ je taun adre up haginy ke ne o but ka hnyi drany; ke haba khaca ohmun e wâ eling je laku Anaka.

²⁹ Waleling me inye ha köbun, ka habe, Ca öbubun bi ke ca ot bi gadra.

³⁰ Haba Iehova Khongubun at ame he hnyi hnyimaköbun me e ame he ka vat hobi köbun, helâ me hnen hna ânyâ hobi köbun hnyi hnyei Aigupito hnyi hnyimaköbun:

³¹ me hnyi hnyebuba, waleji u je wâ a gʼ ame kop u tilö u Iehova Khongom, helâ me at ame delûâ nokon, hnyi je gethen hia öbun e he hnyin ke ne o but öbun e o but eang.

³² Ke haba hnyi ûnyi eling öbun e ca labageju kö Iehova Khongubun,

³³ at ame hnyimaköbun hnyi gethen, he ka heleû dok hnân otilâ umöbun je uma mano hnyin, a meic hnyi lit, he ka omanenâ köbun gethen öbun e he ka he hnyin, ke ûlâ hnyi lany.

³⁴ Ke Iehova ame löng hobun je hofuc, me e ame hmönyin me khemanyin, ka habe,

³⁵ Haba hnyi dö eang ae kong, me ba at a khaca ame he ka wâ hnyei ae so, waleji oge me khemanyin he ka ham ka lakamöbun,

³⁶ ke so thibi Kaleba nöku Jefune, e ame he ka wâ e; ke oge me he ka ham kâu hnyei waleji a mwi hnyin me je mâtrâniny: anyin a e ame löng bekhötâ hotu Iehova.

³⁷ Ke haba Iehova ame hmönyin minya könya cabun, me ha, ka habe, U me ca he ka hnyi he kâ e:

³⁸ kʼ ame he Josua nöku Nuna at ame tot hnyi hnyimâkâm ka munyi be kâ e: u ma sihwegiâ; anyin a e j ame he ka ohuâ hnyei ka at Isaraela.

³⁹ Ke haba je ûhnyûkongibun, waleji öbun e ha a gʼ adre me he ka hûgûnâ, ke lakubun ae ca khanʼ ödra ûnyi ae so me unyi ae kong hnyi bong e, me adre me he ka munyi he kâ e, ke oge me he ka ham e ködra, inʼ adre me he ka hu e.

⁴⁰ Ke haba öbun bi, hwio thʼ öbun me he ka hnyi hnyebuba gethen ûheny hnyi Köiö ae Dra.

⁴¹ Ke öbun e thu me ha könya, ka habe, E kong hwakecihmun hnyi hnyimakö Iehova, ohmun e he ka he me vat helâ me Iehova Khonguta ame ha kohmun. Me öbun e ve weikâ ta je ûnyi hnân vat, kʼ Öbun hwege he ka öliâ bucen.

⁴² Ke haba Iehova ame ha könya, ka habe, Ha thö ködra, ka habe, Ca he öbun ka ölö, ke ca he öbun ka vat; anyin a ca tha inya möbun; wâ e nye kuc öbun hnen iwahnaihmiony möbun.

⁴³ Me oge me fuc köbun ke öbun e ca löng bi; ke so bi öbun e hanyâûâ musi anyi Iehova, me hwege hnyimaköbun he ka öliâ bucen.

⁴⁴ Me ame o but at Amora, tavat adre me labâ bucen eling, he ka vat möbun, me hnu öbun, helâ me je bi adre me ûhnûhnû, me kuc öbun ke ne o but hnyi Seira, me he ke ne o but Horema.

⁴⁵ Ke öbun e hmetu me tenge hnyi hnyimakö Iehova, ke Iehova ame ca löng hobun, kʼ ame ca tevehling öbun.

⁴⁶ Me öbun e laba ju Kedesi hnyi je bong ae se hia, hoton je bong öbun e labā e.