Daniela 8 - Iaai Bible 1901 (New Caledonia)

¹ HNYI huna a kuniny musi anyi Belesaza than, a o thö hna omanenâ könya, wale könya Daniela, hwaban hnok hna wâ a bân.

² Ke inya oge me wâ hnyi hna omanenâ; ke hnyi ûen oge me wâ, me oge me laba hnyi Susani hnyi uma umen than hnyi ke keihen hnyei a Elama; ke oge me wâ hnyi hna omanenâ, ke inya but hnyi wagewe Ulai.

³ Me oge me bwele me wâ, ke wâ bi, mamoe baga ae hu li faoiny ame tot cico wagewe; ke beû goranyai li faoiny; ke beû ke at hon ke at, ke haba at ae beönua, me a biliny ka o.

⁴ Inya oge me wâ mamoe baga ame hagutâ jio, me ka hnyi hwadro, me ka hnyi hwaiöu; ke ca khana ke meno he ka tot hnyi hnyimakan, ke ba at ae khana he ka hûgûnâ gan; ke e ame ânyâ hoton weny, kʼ ame ogânâ e bi.

⁵ Ke inya oge me tiga ûnykûme, ke wâ bi, ame o but got baga ûheny jimeû hon kânâ hia, kʼ ame ca kâlâ kânâ: ke hu fao got ae gan wanben li emakan.

⁶ Ke e ame o but ka mamoe baga a lo li faoiny, waleji oge me wâ ame tot cico wagewe, me utut kâu hnyi tang hwegien ae gan.

⁷ Ke oge me wâ a gʼ ame hakekeny ka mamoe baga, kʼ ame hmonyin kâu, me kot mamoe baga, me thu li faoiny; ke ba maniny mamoe baga he ka tot hnyi hnyimakan: me e ame hagutâ e hnyikânâi, me uto e; ke ba at ae khana he ka hûgûnâ mamoe baga gan.

⁸ Ke haba got baga ame ka ogânâ hmonyin e bi: ke hwege but e me hmetru but faoiny ae gan; ke ame o thö vak ta fao ae gan hwaban e, cico vak ta ang hnyi drany.

⁹ Ke haba ûnyi hnyi khaca fao, me ame o thö ke fao ae ûhnyûkong, kʼ ame gan tot ka hnyi hwaiöu ke deiö, ke ka hnyi hnyei ae hmanenang.

¹⁰ Kʼ ame gan tot ke ne o but hnyi je utbavat hnyi drany; kʼ ame hagutâ hnyikânâi ke je utbavat, ke je okhû, me uto ju.

¹¹ Eke, e ame ka ogânâ e ke ne o but ka hnyi taben je utbavat; kʼ ame hûgûnâ gan hudiny leû adre labö hudo bala, kʼame hagutâ but hnen e, a dok ae kap.

¹² Kʼ adre me tha hna but kâu utbavat me hudiny leû adre me hudo bala, can hna hanyâûâ; kʼ ame hagutâ hnathu hnyikânâi kʼ ame ânyâ weny bi, ke hu sot gan.

¹³ Ke inya oge me löng ke at ae kap ame fuc; ke ame fuc minya ke at ae kap ka at eji a bân ka fuc, ka habe, Ke ne o but kehö hna omanenâ ge hudiny leû adre me hudo bala, ke hna hanyâûâ wale at ame öba wan, a gʼ adre hna dok ae kap me utbavat minya, mʼ adre me uto ju?

¹⁴ Me haingen könya, ka habe, Ke ne o but ka hnyi lo li thauzan ke theri haded ta je sahac me hnyomakatu; ke hnyi ûen eling adre me he ka ânyâwia dok ae kap.

¹⁵ Ke haba inya Daniela, oge me wâ hna omanenâ, me oge me elâm bi he ka wâhmakhmeto e; ke wâ bi, ame tot ke at hnyi hnyimakök helâ me at.

¹⁶ Ke oge me löng ifucin at wanben li baten Ulai, kʼ ame hongot me ha, ka habe, Gaberiela lö, omanenâ thö bongon hna omanenâ ka at ang.

¹⁷ Me e ame hakekeny ka hnyi dok oge me tot hnyin; ke e ame o but, me oge me ot, me ta hnyikânâi; ke e ame ha könya, ka habe, Nokon at lö, wâhmakhmeto ju; anyin ame he ka hwâdâ hna omanenâ hnyi ûen hnyi obiny.

¹⁸ Ke e ame tiga ûhnenaniö mönva, me oge me mokut hnying me ta ju hnyikânâi: ke e ame kâlö nya me otilö nya.

¹⁹ Ke haingen, ka habe, Wâ bi, oge me he ka thumetu u ge ûnyi ama he ka o hnyi ûen hmonyin hnyi obiny: anyin ame he ka hwâdâ hnyi ûen adre thu hnyi obiny.

²⁰ Haba mamoe baga u je wâ a lo li faoiny, me wale li than Madai me Peresi.

²¹ Ke haba got baga at walak, me than Heleni e; ke haba faoiny ae gan wanben li emakan, me than e a bân.

²² Ke haba at ae hmetru, waleji ame o thö vak hwaban, me wale ame he ka o vak ta dökhu ûnyi hnyi hnyei, ke ca helâ me maniny e.

²³ Ke haba hnyi obiny dökhudrin dökhu, hnyi ûen ame he ka bekhot tavat hanyâûâ, me ame he ka o than ae hwege hnyimakan, at ae khana je vhet.

²⁴ Ke ame he ka gan hmâ hwegien, ke ca hnen bi tang hwegien, ke ke bongon bi hnen hna he ka ohia, ke e ame he ka hnahic me ânyâ weny: ke e ame he ka ohia tavat tren man, me tavat ae kap.

²⁵ Ke ûnyi hnyi anyin bihihwakecin ame he ka sot iyawo hnyi hnyamen: ke e ame he ka ogânâ e bi hnyi hnyekon, ke e ame he ka ohia tavat ae se hia adre me laba khotkic: e ame he minya ka tot ka thaniny ta je than; ke so bi, e ame he ka hmetru, ke ca hnen bi hnyam.

²⁶ Ke haba hna omanenâ ge je sahac me hnyomakatu waleji adre ha, me e hnathu e; ke so bi, ikhâlâ ju hna omanenâ; anyin ae se hia je bonginy.

²⁷ Ke inya Daniela oge me ta hnyikânâi me mok hnyi ke je bong; me oge me todrö me mâdrâ huliwa anyin than: ke oge me lâiâ hna omanenâ, ke ba at ame wâ ûnykûme.