Daniela 7 - Iaai Bible 1901 (New Caledonia)

¹ HNYI huna a bâni Belesaza than Babulona, Daniela ame bwi, ke hu ûnyi ame manen kâu hon hnen hna mokut: me e ame sihnalimen bwi, me ha önyen ta je ûnyi.

² Haingö Daniela, ka habe, Oge me wâ hnyi hna omanenâ könya hnyi lit, ke wâ bi, ame ûhalupköu vak ta ang hon köiö ae gan.

³ Ke vak ta meno ae gan ame o ûnyi hnyi köiö ae ve bongudrin.

⁴ Haba at a bân, me helâ me liona, ke hu li labenyin aeto gan: inya oge me wâ ke ne o but adre hia thö hnimö li labenyin, ke adre kap e goranyai ûnyi hnyi kânâ, me otilâ e ge li can helâ me at, ke adre me ham kâu hnyekon at.

⁵ Ke wâ bi ke meno, at a loiny, helâ me bea, ke adre ogöranyâ ke keihen, ke kun ta jeien vhak hnyi hnyimen wanben ga nyon: ke adre me ha kâu, ka habe, Todrö, an gânâ ju utiö.

⁶ Hwaban e, inya oge me wâ, ke wâ bi ke meno helâ me lepad, ke e hu hnyi hoton vak ta labenyin meno ame gâ; ke vak ta ban meno eling; ke adre ham kâu he ka musi.

⁷ Hwaban e, inya oge me wâ hnyi je hna omanenâ hnyi lit, ke wâ bi meno a vakiny adre outen, ke tren man, ke ti hwege; ke e hu je nyon ae gan a fao; e ame oloû me thu omomono, me ututo je kolon ge je can; ke ve e bi me je meno a bân a kun; ke ten je faoiny.

⁸ Inya oge me ûnykûme je faoiny, ke wâ bi, ame o but hnyi wanben ke faoiny ae ûhnyûkong, ke adre oc wia hnyi hnyimakan e ta faoiny a kun a bân; ke wâ bi, hnyi faoiny eling je ecmak helâ me je emakan at, me hnyem at ame ha je ûnyi ae gan.

⁹ Inya oge me wâ ke ne o but adre otilâ je theron, ke ame laba hon ke hingat at kâû adrem: e hau anyin ûkhaû helâ me kiona, ke helâ me leûnen mamoe ae so leûnen ban, ke helâ me bâhlân meic anyin theron, ke helâ me meic ame hlâ je waengen.

¹⁰ Ke ame hingölö wagewe meic me patrutrua ûnyi hnyi hnyimakan: kʼ adre me bi athnyaba kâu tavat a wan thauzan je thauzan, kʼ ame utitilen hnyi hnyimakan khaca miriad je miriad: kʼ adre me penapena he ka ûhnei, kʼ adre me ulolo je tusi.

¹¹ Ke oge me wâ hnyi ûen eling, a can ifucin hwan ae gan hwan faoinyʼ meno; haba, inya oge me wâ ke ne o but adre me hlingö meno, ke ohia unyin, kʼ adre me hna e me me thong meic.

¹² Ke haba kolon je meno, me adre me hûgûnâ musi gadrin: ke so bi adre me obeûâ melidrin, ke ne o but hnyi ke huna me ûen.

¹³ Ke oge me wâ je hna omanenâ hnyi lit, ke wâ bi, ame tha o me je ûlâiny drany, at helâ me nokon at, ke e ame o ka hingat kâû adrem, mʼ adre me hom e ka hnyi hnyimakan.

¹⁴ Ke adre me ham kâu musi, ke hmanenang, ke dokhu, me me he tavat hia, ke ta je hnyei, ke je ve hwen hnyei ka bi athnyabainy: ke haba anyin musi, me musi ae tethmâ, kʼ ame ca he ka hia; ke haba dokhon dokhu, me adre me ca he bi ka ohia.

¹⁵ Ke haba inya Daniela, me ogo me hlöuhlöu eû hnyi hnyekuk, kʼ ame ohmaki nya je hna omanenâ könya hon hnok hna mokut.

¹⁶ Me oge me hakekeny ka ke at ame tot, me hnö e ge hnathuiny ta je ûnyi eling. Me e ame ha könya, me omanenâ bongon ta je ûnyi, ka habe,

¹⁷ Haba ta meno ang ae gan a vak, me walödrin vak ta than, ödrin e he ka o ûnyi hnyi hmeledrany.

¹⁸ Ke ame he ka kap dokhu hnen tavat ae kap anyi Beönua, mödrin e hu bala bi dokhu, wale nyiele nyiele balua.

¹⁹ Ke oge me bekhanö nya hnathuiny meno a vakiny ae ve bongon bi me je meno hia, kʼ adre me outen, ke haba je nyon, me je fao, ke bras je boûjimen, at ame oloû, ke thu omomono, kʼ ame uto je kolon ge je can;

²⁰ ke hawa ge je faoinyʼ a ten hnyi ban, ke fao ame o kʼ ame ta ju kun ta faoiny hnyi hnyimakan; wale fao ae hu je ecmak, ke hnyem, at ame ha ta je ûnyi ae gan, ke gan hmâ unyin hon je lahanen.

²¹ Ke inya oge me wâ, ke ame vat fao eling me tavat ae kap, me hwege bi hudra;

²² ke ne o but ame o hingat at kâû adrem, ke adre me hna ka tavat ae kap anyi Beönua he ka owisa; me ame o thö ûen me hu dokhu ge tavat ae kap.

²³ Haingen, ka habe, Haba meno a vakiny me wale dokhu a vakiny eang hmelen, ae ve bongon bi me ta je dokhu hia, e ame he ka an hmeledrany hia me uto e, me thu omomono e.

²⁴ Ke haba je fao a ten, ûnyi hnyi hnyin dokhu eling ame he ka o je than a ten: ke hwabaödrin dö ame he ka o khaca; ke e ame he ka ve e me je than a bân, ke e ame he ka hom ûhnyûkongoâ kun ta than.

²⁵ Ke e ame he ka fuc bi gan kö Beönua, me ovecâ tavat ae kap anyi Beönua: ke e ame he ka ûnykûme ka wia je ûen, me je hnanyibu; ke adre me he ka hnʼ ödrin ka hnyi hnyamen, ke ne o but ame o ke ûen me li ûen, me haf ûen.

²⁶ Ke adre me he ka laba he ka ûhnei, ke adre me he ka hûgûnâ anyin musi, he ka ohia e, me oumo, ke ne o but obiny.

²⁷ Ke haba dökhu, me musi me ûganiny ta je dökhu eang hmeledrany hia, adre me he ka ham ka tavat ae kap anyi Beönua: dökhu ae hmâ dokhon dökhu, ke ame he ta je musi hia ka bi athnyaba me löng kâu.

²⁸ Walang obiny ûnyi. Ke haba inya Daniela oge me hmak ge ta je ûnykûmenök, me ame ke man bi hnyimakök: ke oge me tuö unyi eling eû hnyi hnyekuk.