Daniela 5 - Iaai Bible 1901 (New Caledonia)

¹ HABA Belesaza than ame ânyâ bijeû ae gan ka anyin je taben a wan thauzan, ke e ame ic waina hnyi hnyimakan thauzan.

² Hnyi ûen e ame ic waina Belesaza ame ûkhûnöng he ka hom je kaia gol me sileva, waleji a hûgûnâ Nebukaneza a kamen ûnyi hnyi hnyin uma kap e Jerusalema; me me ic kâu than, me anyin je taben, me laâiân, me anyin je momo.

³ Me adre me hom je kaia gol waleji adre hûgûnâ ûnyi hnyi uma umen Khong hnyi Jerusalema; me ame ic kâu than me anyin je taben, me laâiân, me anyin je momo.

⁴ Adre me ic waina me ogânâ je khong gol me sileva, me bras, me fao, me uto, me veto.

⁵ Haba hnyi awa eling ame o but je banyen at, me sihnalimen cico taben lamepa hnyi hna up uma hnyi uma umen than: ke a wâ but than hanen hnyam at a sihnalimen.

⁶ Me ame hwio hnyimakan than, ke ame ohmakâ e hnen je ûnykûmenen; ke ame memen dut je jeien hnyin, ke ame öbubuny but li boucan.

⁷ Haba than ame ha hwegiâ he ka hom tavat bihihwakecin, me at Kaledaia, me tavat tren khong. Ke than ame ha ka tavat metâ hnyi Babulona, ka habe, Haba at ama aû hna sihnalimen ang, me omanenâ könya bongon e, me adre me he ka okhavâ ge ûkhaû ae udrudrâ hlit, ke ovhekinyâ ge sawakiny gol, ke e ame he ka tot me at a kuniny unyin je musi hnyi dokhu.

⁸ Ke ame o but tavat metâ hia anyin than: ke ca khanʼ ödrin he ka aû hna sihnalimen, me omananâ bongon ka than.

⁹ Me ame hmak gan hmâ Belesaza than, me ame ke bongon bi hnyimakan, me ame hlohlo anyin je taben.

¹⁰ Ke ame didro momo than ka hnyi uma han ûnyi hnyi hofuc hwan than me anyin je taben: ke haingen momo than, ka habe, E so e möt than nyiele balua; ca hmak bi ge je ûnykûmenâm, ke ca okebongonâ hnyimâkâm:

¹¹ e hu ke at hnyi dokhom dokhu a e unyin hanon je khong ae kap; ke haba hnyi ûen kamâm, me adre me wâ unyin melam, ke wâ ûnykûme, ke metâ, helâ me metâ anyin je khong: ke haba Nebukaneza than a kamâm, wale than a kamâm bi, me e ame otilâ e hnân taben ka ta je magoi, ke tavat bihihwakecin, ke at Kaledaia, ke tavat tren khong;

¹² anyin adre me wâ hnyok ae beönua unyi Daniela eling, ke wâhmakhmeto, ke wâ ûnykûme, kʼ ame omanenâ bongon je bwi, kʼ ame wia je hofuc ae iyong, ke thang ta je vhet, ke haba than ame hwenyi ien e me Beletisaza. Ke walang, e so he ka hum Daniela, me ame he ka omanenâ bongon.

¹³ Me adre me hum Daniela ka hnyi hnyimakan than. Ke haingen than kö Daniela, ka habe, U Daniela hanen je bâ anyin at Juda, waleji hnen than a kamök hna hom ûheny Juda?

¹⁴ Oge hia but löng gam a e unyâm hanon je khong, ke adre me wâ melam unyâm, ke wâ ûnykûme, ke metâ ae beönua.

¹⁵ Ke adre hia but hom tavat ae metâ ka hnyi hnyimakök, a tavat bihihwakecin, inʼ adre me he ka aû hna sihnalimen ang me omanenâ könya bongon: ke ca khanʼ ödra omanenâ bongon ûnyi e.

¹⁶ Ke oge me löng gam a e khanö u he ka omanenâ bongon, me thang ta ja vhet: ke walang a ne khanö u he ka aû hna sihnalimen, me omanenâ könya bongon, me adre me he ka okhaûo u ge ûkhaû ae udrudrâ hlit, me ovhekinyi u ge sawakiny gol, ke u me he ka at a kuniny bi unyin je musi hnyi dökhu.

¹⁷ Haba Daniela ame thu hnyi hnyimakan than, me ha, ka habe, Hnen ju unyâm ânyâm je bwihlany, ke ham bi ka ke at hwaban ûnyi gam; ke so bi oge me he ka aû köu than hna sihnalimen, me omanenâ köu bongon.

¹⁸ Than lö, Khong ae Beönua ame ham kö Nebukaneza a kamâm dökhu, me hna ogânâ, me mec, me hmanenang:

¹⁹ ke can hna oganâ e adre me ham kâu, me ame öbubuny me ot hnyi hnyimakan tavat hia, me ta je hnyei, me je ve hwen hnyei: e ame hlingâ hnen hna behlingâ, me omelo hnen hna beomelö; ke e ame ogânâ hnen hna beogânâ, me ohnyikânâ hnen hna beöhnyikânâ.

²⁰ Ke hnyi ûen ame bi gan hnyekon, ke hwege hnyekon me me huliwa hnyi hop, me adre me ohnyikânâ e ûnyi hnyi hon theroniny dokhon dokhu, ke adre me hûgûnâ gan anyin hmanenang:

²¹ ke adre obâ e unyin tavat; ke helâ but me je meno hnyekon, ke e ame tha laba me je asinainy hnyot; e ame han önying helâ me bolok, ke khubet unyin ge dân hau ûnyi hnyi drany: ke ne o but e ame wâ a gʼ ame musi Khong ae Beönua hnyi dökhu dokhon tavat, me e ame otilâ hon e hnen hna weny kâu.

²² Ke haba u, Belesaza a nokon lö, u je ca öhnyikânâ hnyekom, ke so bi e khanö u ta je ûnyi hia eling;

²³ ke u je bi gan ka Thaniny drany; ke adre hia but hom je omjehen umen uma ka hnyi hnyimâkâm, ke u je hia but, ke ânyâm je taben, ke laâiâm, ke ânyâm je momo, ic waina kâu; ke u je hia but ogânâ je khong sileva, me gol, me bras, me fao, me uto, me veto, wale adre me ca bwele, me löng, me khana: ke haba Khong at ame muso homenâm, ke e unyin dem je gethen hia, me u je ca ogânâ:

²⁴ me ame kunâ ûnyi gan hanen hnyam ang, me ame sihnalimen hofuc ang.

²⁵ Ke walang hofuc adre set, ka habe, MENE, MENE, TEKEL, UPARESIN.

²⁶ Ke walang bongon ûnyi e, ka habe, MENE; a hia but Khong aû dokhom dokhu me bi obiny.

²⁷ TEKEL; adre hia but tuluti u hnyi tulut uhni me ö u a u hâhâ thö.

²⁸ PARES; adre hia but kia dokhom dökhu me ham ka at Madai me Peresi.

²⁹ Me haba Belesaza ame hûna, me adre me okhaûo Daniela ge ûkhaû ae udrudrâ hlit, me ovhekinyâ e ge sawakiny gol, me haimemenâ gan a e ame he ka at musi a kuniny bi hnyi dokhu.

³⁰ Ke adre me hlingö Belesaza than Kaledaia hnyi hnyinghet eling.

³¹ Ke haba Dariu at Madai ame kap musi hnyi dökhu, kʼ ame ne sikste tu je hunainy.