Daniela 4 - Iaai Bible 1901 (New Caledonia)

¹ INYA Nebukaneza than, ame ha ka tavat hia, me je hnyei me je ve hwen hnyei bi, tavat adre me labâ hmeledrany hia, ka habe, E so ame osehiâ anyibun hnahic.

² Oge me ûnykûme e so he ka omanenâ ta je haten me je ûnyi hnân lâiâ waleji a ânyâ könya Khong ae Beönua.

³ E ti beönua anyin je haten! ke ti gan hmâ anyin ta je ûnyi hnân lâiâ gan! dokhu ae hmâ nyiele balua dokhon dokhu, ke hwân hnyi ke dö, ke ne o but ka hnyi ke dö anyin musi.

⁴ Inya Nebukaneza oge me menâ hnyi umök uma, ke iny sot hnyi hnyabak.

⁵ Oge me bwo bwi, me ame ooti nya; ke oge me hmak ge je hna ûnykûme hon hnok hna mokut, ke ta je ûnyi ae manen könya.

⁶ Anyin a wale oge me otilâ hnanyibu he ka hom könya tavat metâ hia hnyi Babulona, me me hamödra he ka omanenâ bongon bwi.

⁷ Me ame o könya ta je magoi, ke tavat bihihwakecin, ke at Kaledaia, ke tavat tren khong: me oge me ha bwi hnyi hnyimakodra; ke adre me ca omanenâ könya bongon.

⁸ Ke hwaban e ame o but könya Daniela, ke ien Beletisaza, kʼ adre tha ien me anyik khong, ke e unyin hanon je khong ae kap: me oge me ha kâu bwi me ha, ka habe,

⁹ Beletisaza lö, tuhan je magoi, e khanö nya but a e unyâm hanon je khong ae kap, ke ba ke ûnyi ae iyong ae hmak köu, anyin a wale ha thö könya hna wâ hnyi bwik waleji oge me bwo, me bongon e.

¹⁰ Ke walang hnok hna wâ hon hnok hna mokut; Wâ bi, inya oge me wâ ûö hnyi wanben hmeledrany, ke beû hmonyin goranyai.

¹¹ Ke ame kû thö ûö, ke hwege bi, ke haba ibeûen e, me ame o but hnyi drany, me e manen ke ne o but hnyi je can hmeledrany.

¹² Ke e hmanenang je lan, ke se hia je wan, ke hu han hnyin e hobi kâu hia: ke haba ta je menoiny hnyot me adre me tung hmelen, ke haba je meno adre me gâ ethö, me adre me tabâ je anginy, kʼ adre me han ta je ûnyi hia ae möt ûnyi hnyin e.

¹³ Wale ûnyi oge me wâ hon hnok hna mokut, ke wâ bi at hmâkâ ke e kap ame utut ûheny hnyi drany.

¹⁴ Me e ame hongot hwegiâ, ka habe, Sö but ûö, ke subâ but ta je anginy, ke jijingâ degecâ but je lan, ke ve khûâ je wan e: e so e kec ut ûnyi hnyi hmelen e ta je meno adre me he, ke je meno ame gâ ûnyi hnyi je anginy.

¹⁵ Ke so bi hnen ju hnyiban e ke iwân eû hnyi kânâ, ke ohmâ ju e ge je tö fao ke bras, hnyi hna önying ae hât hnyi kânâ; ke so e ame khubet ge dân hau ûnyi hnyi drany, ke so e ame he ka tha jekhon me ta je menoiny hnyot hnyi hna önying:

¹⁶ adre me he ka wia hnyekon at a e, me ham bi kâu hnyekon meno, ke ne o but ame um dö je ûen a seven.

¹⁷ Hnen musi anyin tavat hmâkâ ûnyi eling, me hnen hofuc hwan tavat ae kap hna hûna eling: me me khana tavat ae möt a gʼ ame musi At ae Beönua hnyi dokhu dokhon tavat, ke e ame ham kâu hnen hna weny, me otilâ hon e hoûmonu.

¹⁸ Wale bwik waleji oge bwo, inya Nebukaneza than: ke hamâm Beletisaza he ka omanenâ bongon könya, anyin ae ca khana bi tavat hia ae metâ hnyi dökhuk dokhu he ka omanenâ könya bongon; ke e khanö u, anyin a e unyâm hanon je khong ae kap.

¹⁹ Me ame hlohlo Daniela, Beletisaza ke ien, hnyi ong ûen, ke ame ohmâkâ e hnen je hna ûnykûme. Me ame ha than, ka habe, Beletisaza lö, ca he ka hmak ge bwi me bongon e. Ke haingö Beletisaza, ka habe, thân lö, e na ödrin ju tavat adre me hûkötiö u bwi e, ke e na ödra ju je iwahnaihmiony möu bongon e.

²⁰ Haba ûö u je wâ, waleji ame kû thö me hwege, me beû ke ne o but hnyi drany, me manen ka hmeledrany hia;

²¹ ke hmanenang je lan, ke se hia je wan, ke hu han hnyin hobi kâu hia; ke je menoiny hnyot adre me laba hmelen, me je meno adre me gâ adre bi uma hnyi je anginy:

²² than lö, u ling, anyin a u gan hmâ me hwege; ke ame kû gan ânyâm lung ke ne o thö hnyi drany, me ânyâm musi ke ne o but hnyi je can hmeledrany.

²³ Ke u je wâ than lö at hmâkâ me at ae kap ame utut ûheny hnyi drany me ha, ka habe, Sö but ûö, me ohia e; ke so bi hna biju hnyiban e me iwân hnyi kânâ, ke ohmâ ju e ge tö fao ke bras hnyi hna önying ae hât; ke e ame he ka khubet ge dân hau ûnyi hnyi drany, ke ame he ka tha jekhon me je menoiny hnyot, ke ne o but ame um dö je ûen a seven;

²⁴ than lö, walang bongon, ke wale musi anyin At ae Beönua, ame he ka o ka tuhok a than:

²⁵ a adre me he ka obö u unyin tavat, ke u me he ka tha laba me je menoiny hnyot, ke u me he ka han önying helâ me bolok, ke u me he ka kubet ge dân hau ûnyi hnyi drany, kʼ ame he ka seven je ûâm; ke ne o but ame khanö u thö a gʼ ame musi At ae Beönua hnyi dokhu dokhon tavat, kʼ ame ham e ka hnen hna weny kâu.

²⁶ Ke haba hna hûna he ka hnen biju hnyiban ûö ke wân, me wale ame he ka hmâ köu dokhom dokhu, e ka khanö u thö a gʼ ame musi drany.

²⁷ Anyin a wale, than lö, e na so ju köu bok hofuc, ke soju monu gam, me ânyâ wisa, ke soju hwakecâm ae kong, ke betenge ju ge tavat ae theduoc; mʼ adre me ne he ka obeûâ hnâm hnahic.

²⁸ Me ame aat dö kö Nebukaneza ta je ûnyi hia eling.

²⁹ Ke hwaban je tehi a twelv e ame ngenu hnyi uma umen than e Babulona.

³⁰ Ke haingen than, ka habe, Hawa, ca Babulona ang ae gan, waleji oge me op hnân hnyaban than hnen manik man ae hwege, ke hnân he ka ogânâ anyik hmanenang.

³¹ Ke tiga e hofuc hnyi hnyimen than, me ame o but ke hofuc ûnyi hnyi drany, ka habe, Nebukaneza than lö, adre me ha köu ke hofuc: a gʼ adre hia but hûgûnâ dokhu gam.

³² Me adre me he ka obö u unyin tavat, me u me he ka tha laba me ta je menoiny hnyot; u m he bi ka han önying helâ me bolok ke ame he ka seven je ûâm, ke ne o but ame khanö u thö a gʼ ame musi At ae Beönua hnyi dokhu dokhon tavat, me ham e ka at e ame weny kâu.

³³ Ke haba hnyi awa eling ame hwâdâ thö kö Nebukaneza: me adre me obâ e unyin tavat, me e ame han önying helâ me bolok, ke khubet unyin ge dân hau ûnyi hnyi drany, ke ne o but ame beû but leûnen ban helâ me leûnen aeto, ke helâ me ûjimen bacan meno ame gâ je boûjimen.

³⁴ Ke hwaban je bong, inya Nebukaneza oge me bwele thö goranyai ka hnyi drany, me ame hmetu könya hnyekuk, me oge me haisoi Beönua, ke ogânâ ke ogöranyâ e at ae möt nyiele balua: anyin a nyiele balua anyin musi, ke haba dokhon dokhu ame o but ka hnyi ta je dö hia:

³⁵ kʼ ame ûnykûme a helâ me thatûnyi tavat adre me labâ hia hmeledrany: ke e ame ânyâ hoton weny unyin je köiöiny drany, ke tavat adre me labâ hmeledrany; ke ba at ame he ka thawâ hnyamen me ba kâu ka habe, Ieû u me ânyâ?

³⁶ Hnyi ûen eling ame hmetu hnyekuk könya; ke ame hmetu thö könya anyik lung ke anyik hmanenang, me me mec dökhuk dokhu; ke ame elom nya hmetu hnen anyik tavat ûhnenamö me anyik je taben; ke adre ohmö nya hmetu thö hnyi dökhuk dokhu, ke adre bi hanen anyik hmanenang ae gan.

³⁷ Ke walang ang, inya Nebukaneza oge me olungâ me ogânâ Thaniny drany; anyin ae wisa anyin ta je huliwa hia, ke ûcû deny je gethen: ke e khana he ka hom ûhnyûkongo tavat vheno bi gan.