Daniela 3 - Iaai Bible 1901 (New Caledonia)

¹ HABA Nebukaneza than ame ânyâ hnatheat gol, ke sikste kubit ibeûen goranyai, ke siks ta kubit ûlauen: me e ame otilâ e hnyi dok ae tha hon hnyi Dura, hnyi hnyei Babulona.

² Ke haba than Nebukaneza ame ûkhûnöng he ka ûkhacaköuâ tavat musi ae gan, ke je gavena, ke tavat musi, ke tavat owisa, ke tavat tuö omjeû, ke tavat ha bongon hnanyibu, ke tavat ûhnei ge hnanyibu, ke tavat musi hia hnyi hnyei, ka hnyi dok adre me he ka okabâ hnyin hnatheat wale a otilâ hnen Nebukaneza.

³ Ke ame ûkhacaköu tavat musi ae gan, ke je gavena, ke tavat musi, ke tavat owisa, ke tavat tuö omjeû, ke tavat ha bongon hnanyibu, ke tavat ûhnei ge hnanyibu, ke tavat musi hia hnyi hnyei, ka hnyi okabâ hnatheat wale a otilâ hnen Nebukaneza than; me adre me ûtitilen hnyi hnyimakan hnatheat wale a otilâ Nebukaneza.

⁴ Me ame ha gânâ hnen at bi hnyimen musi, ka habe, Walang hnanyibu köbun tavat lö me je hnyei, me je ve hwen hnyei, ka habe,

⁵ Haba ûen öbun e he ka long hnyin ifucin trutru, ke utkowi, ke kitara, ke sabeka, ke saniter, ke sumefono, ke ta je ûnyikhumöng hia, me öbun e he ka ta ju hnyikânâi me khudrung ka hnatheat gol, wale a otilâ Nebukaneza than:

⁶ ke haba at ame ca he ka hnyi ta, me khudrung, me adre me he ka khûâ e hnyi awa eling ka hnyi thop ae möt hnyin meic.

⁷ Anyin a wale hnyi ûen tavat hia adre me long ifucin trutru, ke utkowi, ke kitara, ke saniter, ke ta je ûnyikhumöng hia, me ame ta hnyikânâi tavat hia, me je hnyei, me je ve hwen hnyei, me khudrung ka hnatheat gol a otilâ Nebukaneza.

⁸ Anyin a wale hnyi ûen eling ame hakekeny keihen at Kaledaia, me khûâ at Juda.

⁹ Adre me ha kö Nebukaneza than, ka habe, E so u möt than nyiele balua.

¹⁰ U, than lö u je otilâ hnanyibu a haba at ama long ifucin trutru, ke utkowi, ke kitara, ke sabeka, ke saniter, ke sumefono, ke ta je ûnyikhumöng hia, me ame he ka ta ju me khudrung ka hnatheat gol:

¹¹ ke haba at ame ca he ka hnyi ta me khudrung, me adre me he ka khûâ ka hnyi thop ae möt ge meic.

¹² Wale keihen at Juda u je hia but otilâ hon ta je ûnyi hnyi hnyei Babulona, jia Sadereka, ke Mesaka, ke Abedenego; haba hnyat eling, than lö, ödrin e ca long köu: ödrin e ca bi I athnyaba ka ânyâm je khong, me khudrung ka hnatheat gol u je otilâ.

¹³ Me ame hmönyi Nebukaneza ke wathethot, me ûkhûnöng he ka hum Saderaka, ke Mesaka, ke Abedenego. Me adre me hom je hnyat eling ka than.

¹⁴ Ke haba Nebukaneza ame ha ködrin, ka habe, Hawa Saderaka, ke Mesaka, ke Abedenego lö e hu can gabun a öbun e ca bi athnyaba ka khonguk, me khudrung ka hnatheat gol oge otilâ?

¹⁵ Walang ang, öbun e ne penapena, öbun ka long ifucin trutru, ke utkowi, ke kitara, ke sabeka, ke saniter, ke sumefono, ke je ûnyikhumöng hia me öbun e he ka ta me khudrung ka hnatheat gol oge me ânyâ, me so ling: ke so bi öbun e ne ca he ka khudrung, haba hnyi awa eling, me adre me he ka khûʼ öbun ka hnyi thop ae möt hnyin meic; ke ewa khong ame he ka hûgûnʼ öbun hnyi li hnyamok?

¹⁶ Me ame thu Saderaka, ke Mesaka, ke Abedenego, me ha ka than, ka habe, Nebukaneza lö, e ca ûcû kohmun he ka thu köu hnyi ûnyi e.

¹⁷ A ne helâe, me khana Khonguhmun, at ohmun e bi athnyabainy he ka hûgûnʼ ohmun ûnyi hnyi thop ae möt hnyin meic; me e ame he ka hûgûnʼ ohmun ûnyi hnyi hnyamâm, than.

¹⁸ Ke so bi a ne ba, me wâhmakhmetoâ ju than a ohmun e ca he ka bi athnyaba je khongom, me khudrung ka hnatheat gol u je otilâ.

¹⁹ Me ame unöngötö Nebukaneza ge hmonyin, ke ke bongon bi hnyimakan kö Saderaka, ke Mesaka, ke Abedenego: ke e ame fuc me hûna kodra a gʼ adre me he ka oseven okahwa meic hon hnödra hna labö okahwa e.

²⁰ Me e ame hûna ka ke je taben, a hanen je deo vat unyin he ka cö Saderaka, ke Mesaka, ke Abedenego, me khûʼ ödrin ka hnyi thop ae möt hnyin meic.

²¹ Me adre me ca hnyat eling, ke hu tangen cadrin, ke hnabicödrin, ke ukot, ke je khaûödrin, me khûʼ ödrin ka hnyi wanben thop ae möt hnyin meic.

²² Anyin a wale, ke can ame hwege hna hûna hnen than, ke ti kahwa hmonyin meic, me ame hlingâ ge bâhlân meic tavat adre me hum Saderaka, ke Mesaka, ke Abedenego.

²³ Ke haba hnyat eling a kun, wale Saderaka, ke Mesaka, ke Abedenego, me ödrin e ta adre me cʼ ödrin ka hnyi thop ae möt hnyin meic.

²⁴ Me ame uthmâhmâ Nebukaneza than, me ie tot: me e ame thu me ha ka anyin tavat ûhnenamö, ka habe, Hawa, otin e ca khûâ kun ta hnyat adre ca ka hnyi meic? Me adre me thu me ha ka than, ka habe, E, than.

²⁵ Me e ame thu me ha, ka habe, Wâ bi, oge me wâ hnyat a ödrin vak kʼ adre thang bi, ödrin e ngenu hnyin meic, kʼ ödrin e ca kong bi; ke haba unyin at a vakiny, me helâ me unyin ke khong.

²⁶ Me haba Nebukaneza ame hakekeny ka hnyi hnyimen thop ae möt hnyin meic, me ha, ka habe, E, Saderaka, me Mesaka, me Abedenego, je athnyabainy Khong ae Beönua, ai öbun, kâ âng. Me ame didrut Saderaka, me Mesaka, me Abedenego ûnyi hnyi hnyin meic.

²⁷ Ke ame wâ hnyat eling hnen tavat musi ae gan, ke je gavena, ke tavat musi, ke tavat ûhnenamö anyin than, wale adre ûkhacaköu, ae ba maniny meic hon je unyidrin, ke a ca hlâ bi leûnen bodrin, ke a ca wia bi tangen li cadrin, ke ca bon meic unyidrin.

²⁸ Ke haba Nebukaneza ame ha, ka habe E so adre haisoâ Khongu Saderaka, me Mesaka, me Abedenego, at ame kunâ anyin angela, me omelo je athnyabainy hnyat adre me labageju kâu, ke ödrin e wia hofuc hwan than, me hna je unyidrin, mʼ ödrin e ca he ka bi athnyaba me khudrung ka ke khong bi.

²⁹ Anyin a wale oge me otilâ hnanyibu, a haba tavat hia, me ta je hnyei, me je ve hwen hnyei, adre ne he ka ha ûnyi ae kong ge Khongu Saderaka, me Mesaka, me Abedenego, me adre me he ka subâ omomonu ödra, me wia umödrin je uma hnân digic thatûnyi: anyin ae ba ke khong ae khana he ka ûhomeli helâe.

³⁰ Haba than ame ogö-ranyi Saderaka, me Mesaka, me Abedenego, hnyi hnyei Babulona.