Daniela 12 - Iaai Bible 1901 (New Caledonia)

¹ KE haba hnyi ûen eling ame he Mikaela ka tot, wale than ae gan at ame tot singiny aten em hnyei: ke ame he ka hu ûen vec, e ba helâe hwân hnyi hna hwenyi ien, me hnyei, ke ne o but hnyi ûen eling: ke hnyi ûen eling adre me he ka omelo aten em hnyei, ödra hia adre me wâ hna sihnalimidra hnyi tusi.

² Ke se hia tavat adre me mokut eû hnyi kânâ adre me he ka hmak hmetu, keihen ka hnyi möt nyiele balua, ke keihen ka hnyi hmehma me ikikiâ nyiele balua.

³ Ke haba tavat ae metâ, me adre me he ka umumelam helâ me melaminy drany; ke haba tavat adre me wia tavat ae se hia hnyi hwakecin ae wisa, me ödra helâ me ta je okhû nyiele balua.

⁴ Ke haba u Daniela lö, ikhâlâ ju je hofuc, me ohmâ ju haten tusi, ke ne o but hnyi ûen obiny: kʼ ame he tavat ae se ka wadring ehele, me ame he metâ ka gan tot.

⁵ Ke inya Daniela oge me wâ, ke wâ bi, ke li at ödru me tot, ke at hnyi baten wagewe, ke ke at hnyi ke baten wagewe.

⁶ Ke haingen ke at ka at ame khavâ lino, at ame laba hon köien wagawe, ka habe, Ke ne o but kehö obiny ta je ûnyi eling hnân lâiâ?

⁷ Ke oge me long at ame khavâ lino, at ame laba hon köien wagawe, me ame ogöranyâ hnyamen a metân me hnyamen a meny ka hnyi drany, me khemanyin gan at ae möt nyiele balua a gʼ ame he ka hobi kâu ûen, me lo li ûen, me ûen me haf: ke e ka hia but oveseâ maniny hnyei ae kap, awe, ame he ka hwâdâ ta je ûnyi hia eling.

⁸ Ke oge me löng, ke oge me ca wâ ûnykûme: me oge me ha, ka habe, Tuhok lö, ieû obiny ta je ûnyi eî

⁹ Ke haingen, ka habe, Daniela lö, he thö; anyin adre hia but ikhâlâ me ohmâ haten ta je ûnyi e ke ne o but hnyi ûen obiny.

¹⁰ Ame he tavat ae se hia ka obosoi ödra, me ohawʼ ödra, me ânyâwi ödra; ke ame he tavat ae kong ka ânyâ hwakacin ae kong bala; ke ame ca he ke at ae kong he ka wâ ûnykûme: ke so bi, ame he tavat ae metâ ka wâ ûnykûme.

¹¹ Ke hwân hnyi ûen adre me he ka ohia hnyin hudiny leû adre hudo hnyi je bong hia, ke ne o but adre me otilâ ûnyi ae ikiki at ame öba wan, me wan thauzan tu haded ke nainte je bong.

¹² Hnahic hnen at ame lubahingen ke ne o but hnyi je bong a wan thauzan ke theri haded ke thote faiv.

¹³ Ke he thö u ke ne o but obiny: anyin a u me he ka menâ, me tot hnyi jekhom, e ka um dö je bong.