Daniela 11 - Iaai Bible 1901 (New Caledonia)

¹ KE hnyi huna a bani Dariu at Madai, inya oge me tot he ka hadruâ e me ha hwegien.

² Ke walang ang oge me he ka omanenâ köu hnathu. Wâ bi, ame he ka o kun ta thaniny Peresi; kʼ ame he bi ka tren omjeû ae gan at a vakiny hon ta hnyat a kun: ke e ka hwege bi deny ta je omjehen, me e ame he ka obwebwelâ hia ûcon dökhu Heleni.

³ Ke ame he ka tot ke than at ae hwege, at ame he ka musi ge musi ae gan, me ânyâ helâ me weny.

⁴ Ke e ka tot, me ame he ka hmetru dokhon dökhu, me adre me he ka kia vâkâ e ka hnyi vak ta anginy drany: ke ca hobi kâu bi je mâtrâniny, ke ca hoton anyin musi; anyin adre me he ka oc dokhon dökhu, me me hobi kâu ke je hnyat, ke ca ödrin bi.

⁵ Ke ame he ka hwege thaniny hwaiöu, tha e me ke taben unyin, kʼ ame he ka hwege hon e me musi bi, ke haba anyin musi me musi ae gan.

⁶ Ke e ka um dö je huna me ödru me he ka ûkhacaköu; kʼ ame he hlu nokon than hnyi hwaiö ka senâ than hnyi hwadro he ka ânyâ ûhihiny-köu: ke haba hwegien benyin hlu me ame ca he ka tethmâ; kʼ ame ca he minya baga ka tot, ke benyin; ke adre me he ka hna but hlu, me tavat adre me hom e, me at ame hnokoâ e, me at ame ha hwegien hnyi ûen eling.

⁷ Ke ame ke ka o ke khûen ge iwân hlu, hnyi hnen at eling, wale ame he ka o ka hnyi utbavat, me ame he ka delec hnabâ anyin than hnyi hwadro, me bi ovhelidra, ke ame he ka hwege:

⁸ me hom bâ Aigupito ai je khongudrin, me anyidra je hna theat adre okoiâ, me anyidra je kaia ae ti so, a sileva me gol; ke e ame he ka hokhnyok hnyi je huna ae se ge than hnyi hwadro.

⁹ Ke e ame he ka he hnyi dokhu dokhon than hnyi hwaiöu, ke e ame he ka hmetu ka hnyi iny bi hnyei.

¹⁰ Ke ame he je lakon ka vat, me ûkhacaköu köiö köien at ae gan, adre me he ka o me bahihingâlâ, me vheno: ke adre me he ka hmetu me vat, ke ne o but hnyi hnen hnabâ.

¹¹ Ke ame he ka hmonyin hnyekon than hnyi hwaiöu, ke e ame he ka he me vat më, wale a than hnyi hwadro: ke e ame he ka otilâ metâ utbavat ae gan, ke adre me he ka hna utbavat eji ka hnyi hnyamen.

¹² Ke ame he ka bi gan utbavat, ke ame he ka gorany bi hnyekon: ke e ame he ka ota je miriad, ke e ame ca he ka ton.

¹³ Ke ame he ka hmetu than hnyi hwadro, me otilâ utbavat ae gan hon a bân; ke e ka um dö je ûen, wale je huna, me e ame he ka oâ je utbavat ae gan me omjeû ae gan.

¹⁴ Ke hnyi ûen eling ame he ka tot ka than hnyi hwaiöu tavat ae se hia: ke ame he ka bi gan tavat ûokonguny hnyi em hnyei mʼ adre me ohmâ hna omanenâ; ke adre me he ka ta.

¹⁵ Me ame he ka o than hnyi hwadro, me okhibö goranyai kânâ, me hûgûnâ taun adre up haginy ae so: ke ame ca he ka ton je utbavat hnyi hwaiöu, me tavat e ame ûca, ke ame ke ka ba tang hwege hnân he ka ton.

¹⁶ Ke haba at ame he ka he ûcon, me ame he ka ânyâ hoton weny, ke ba at ame he ka ot hnyi hnyimakan: ke e ame he ka tot hnyi hnyei ae hmanenang, ke e bi hnyi hnyamen ûokonguny.

¹⁷ Ke e ame he ka hnyimakan dö he ka o me hom maniny dokhon dökhu hia, me tavat ae fofâ unyin: ke e ame he ka ânyâ weny: ke e ame he ka ham kâu hlu nokon momo me me kong; ke e ame ca he bi ka tethmâ me tha hien më.

¹⁸ Hwaban dö e, e ame he ka hnyimakan ka hnyi je bomene, me hûgûnâ keihen ae se: ke haba ke than ame he bi ka biobiny hnen hna haikongoâ; eke, e ame he ka wia kongon kâu bi.

¹⁹ Me e ame he ka hnyimakan ka hnyi je hnabâiny iny hnyei: ke e ame he ka haû me ta, ke adre me ca he hmetu ka wâ e.

²⁰ Ke ame he ka tot ke at hwaban e, at ame he ka kunâ at hok fat he ka vheno hmanenanginy dökhu: ke adre me he ka ohia e hnyi ke je bong, ke ca hnen bi hmonyin, ke ca hnen bi vat.

²¹ Ke ame he ka tot hwaban e, at adre me hûkotiâ, waleji adre me tiga ca ham kâu hmanenanginy dokhu: ke e ame he ka o hnyi ûen ûsoköu, me hu dokhu ge hofuc ûtakû.

²² Ke ame he ka khutu takoû e je vat ae uoû hnyi hnyimakan, me hmouca but; eke, thaniny ûhihinyköu minya.

²³ Ke hwaban do hna ûhihinyköu më, me ame ho ka othoiâ: anyin a e ame he ka he me hwege hnyi hnyei ae ûhnyûkong.

²⁴ E ame be ka o hnyi ûen ûsoköu ka hnyi je dok ae so hnyi hnyei; ke e ame he ka ânyâ ûnyi a ca ânyâ lakamen ke lakiben; e ame he ka khenâ kodra hna hûgûnâ ke hna soh, ke je omjeû: eke, e ame he ka bihihwakecin ûcon je hnabâ ke ne o but hnyi ke ûen.

²⁵ Ke e ame he ka obwebwelâ maniny man ke tang hwegein hnyekon, ke je utbavat ae gan, ûcon than hnyi hwaiöu; kʼ ame he than hnyi hwaiöu ka vat, a tha e ke utbavat ae gan hmâ ke hwege: ke e ame ca he bi ka tot, anyin adre me he bi ka ânyâ bihihwakecin kâu.

²⁶ Eke, ame he tavat adre me an an jeû ka kot e, kʼ ame he anyin utbavat ka ti osehia: ke ame he ka û je komok ae se hia.

²⁷ Ke haba li than eling, me ödru me he ka hnyok ûokonguny, ke ödru me he ka ûhnenamö thoi hnyi laulau a khaca: kʼ ame ca he ka hwâdâ: anyin adre me he ka bi obiny hnyi ûen adre thu.

²⁸ Me e ame he ka hmetu ka hnyi iny hnyei me je omjeû ae gan hmâ; ke ame he hnyekon ka höciâ ûhihinyköu ae kap; ke e ame he ka ânyâ weny, me hmetu ka hnyi iny hnyei.

²⁹ E ame he ka hmetu hnyi ûen adre me thu, me he ka hnyi hwaiöu; ke ca helâ me he a bân me biliny.

³⁰ Anyin ame he je huiny Kitim ka he ûcon; anyin a wale, e ame he ka hmak, me hmetu me hmonyin ka ûhihinyköu ae kap, me ânyâ weny bi: e ame he ka hmetu me tha ûhnenamö me tavat adre rae degec ûhihinyköu ae kap.

³¹ Ke ame he ka tot hobi kâu je deo vat, ke adre me he ka okongoâ dok ae kap wale a hnabâ, me ohia hudiny leû adre hudo hnyi je bong hia, ke adre me he ka otilâ ûnyi ae ikiki at ame öba wan.

³² Ke haba tavat ae kong hwakecidra ka hnyi ûhihinyköu, e ame he ka omonu ödra ge hofuc ûtakû: ke haba tavat ae khanʼ ödra Khongudrin adre me he ka hwege me ûjöng.

³³ Ke haba tavat ae metâ unyin tavat, adre me he ka nâ tavat ae se hia: ke so bi adre me he ka ta ge hele vat, me meic, me hwenbâ me soh, hnyi je bong ae se hia.

³⁴ Ke ödra ka ta but, me adre me he ka na omi hadruʼ ödra: ke ame he tavat ae se hia ka bi hiödra ge hofuc ûtakû.

³⁵ Ke ame he keihen tavat ae metâ ka ta, madre me cubic ödra, me ânyâwia, me ohawâ, ke ne o but ûen obiny: anyin ame he ka e hnyi ûen adre thu.

³⁶ Ke ame he than ka ânyâ hoton weny; ke e ame he ka ogânâ e bi, me ogöranyâ e bi hon ta je khong hia, me ha ta je ûnyi hnân outen ge Khongon ta je khong: ke e ame he ka sot ke ne o but ame hwâdâ but hmonyin; anyin adre me he ka ânyâ hna mou hnyok ka hnyin.

³⁷ Ke e ame ea he ka ûnykûme je khongon lakamen, me wenyâ omomo, me ûnykûme ka ke khong bi: anyin a e ame he ka ogânâ e bi hudrin hia.

³⁸ Ke e ame he ka ogânâ khongon je hnabâ hnyi hnen e: ke e ame he ka ogânâ ke khong ae ca khana lakamen, ge gol me sileva, me je veto ae ûnyi hnathu, me je ûnyi ae senem.

³⁹ Ke e ame he ka ânyâ ûcon je hnabâ ae ti hwege a tha hien me khong khanyua; ke haba at ame he ka nom kâu me e ame he ka bi hanen kâu hmanenang: ke e ame he ka kunʼ ödrin ka muso tavat ae se hia, me khenâ hnyei ge hwaban.

⁴⁰ Ke haba hnyi ûen obiny ame he than hnyi hwaiöu ka invinö më: ke ame he than hnyi hwadro ka utut kâu, helâ me hou me je kariota, me tavat tabô hors, me je hu ae se hia; ke e ame he ka dit ka hnyi je hnyei, me ave me vheno.

⁴¹ E ame he ka he minya ka hnyi hnyei ae hmanenang, ke ame he ka ta je hnyei ae se hia: ke ame he ka kec möt gan, Edoma, ke Moaba, ke lakon Amona ae beönua.

⁴² Ke e ame he ka hai hnyamen hon je hnyei: ke ame ca he ka kec möt hnyei Aigupito.

⁴³ Ke e ame he ka muso ta je tang omjeû, je gol, me sileva, me je ûnyi hnathuiny Aigupito hia: ke ame he at Libua me Aithiop ka he hoton.

⁴⁴ Ke ame he ka ohmakâ e je ûthumetu ûheny jimeyö me hnyi hwadro; ke e ame he ka he me hmonyin ae gan ka hlingâ me ti ohia hmonyin tavat ae se hia.

⁴⁵ Ke e ame he ka otilâ je uma manoiny hnyaban hnyi wanben köiö me bucen ae hmanenang ae kap; ke ame he ka o obiny kâu, ke ba at ame he ka hadruâ e.