Daniela 1 - Iaai Bible 1901 (New Caledonia)

¹ HNYI huna a kuniny musi a Jehoiakima than Juda, haba Nebukaneza than Babulona ame o hnyi Jerusalema me thelöng e.

² Ke haba Than ame hnö Jehoiakima than Juda ka hnyi hnyamen, tha e me ke je omjehen uma umen Khong; me e ame sukhöûnâ ka hnyi hnyei Sinara ka hnyi uma umen khongon: ke e ame ip je omjehen ka hnyi uma omjeû umen khongon.

³ Ke ame ha than kö Asepenaza at ame muso anyin je eunuka, he ka hom ke je lakon Isaraela, a je mâtrâniny than ke je hnyat ae nua;

⁴ a je thoth ae ba hnyikongudrin, hnyat ae hmanenang he ka wâ, ke hnyat ae khanʼ ödrin je metâ hia, kʼ ödrin e wâhmakhmeto, ke tremângâ je hna ûne, hnyat ae ûcû he ka tot hnyi uma umen than; me hamen be ka nʼ ödrin ge ûne ke hwen Kaledaia.

⁵ Ke haba than ame khenâ ködrin jeû an than hnyi taogo bong, ke waina a belen, me adre me he ka hat ödrin hnyi kun ta huna; me hwaban e me ödrin e he ka tot hnyi hnyimakan than.

⁶ Ke wale unyidra, a hanen lakon Juda, Daniela, ke Hanania, ke Misaela, ke Azaria.

⁷ Ke haba tuhan je eunuka ame hwenyi iödrin: ke e ame hwenyi iö Daniela, me Beletisaza; ke Hanania, me Saderaka; ke Misaela, me Mesaka; ke Azaria, me Abedengo.

⁸ Ke e mou hnyi hnyeku Daniela a gʼ ame ca he ka okongoâ e hnen jeu than, ke waina a belen: anyin a wale e ame sumâtâ tuhan je eunuka, me me ca ka hamen bi okongoâ e.

⁹ Ke haba Khong ame okûâ he ka betenge me hnyok kö Daniela hnen tuhan ta je eunuka.

¹⁰ Me haba tuhan ta je eunuka ame ha kö Daniela, ka habe, Iny ot ge than a tuhok, at ame khenâ ö ʼbun jeû ke belibun: ke anyin a ieû e ame he bi ka wâ je hnyimaköbun ae hlöuhlöu, me ca helâ me hnyimakan wahidröu a tha dö möbun? me öbun e he ka bi joniny bok ka than.

¹¹ Ke haingö Daniela kö Meleza, wale at a otilâ tuhan je eunuka hu Daniela me Hanania me Misaela me Azaria, ka habe,

¹² Më cubic ohmun a lathnyabaem hnyi je bong a ten; me adre me he ka ha ö ʼhmun ge je khölak, me habelihmun ge köiö.

¹³ Ke u me he ka wâhmakhmeto je hnyimaköhmun, me hnyimakan wahidröu hnyat adre me hnyi an jeû an than; ke ânyâ thö kohmun a lathnyabaem hoton hnâm hna he ka wâ.

¹⁴ Me e ame ling ödrin hnyi ûnyi eling, me cubic ödrin hnyi je bong a ten.

¹⁵ Ke ame um dö je bong a ten, me adre me wâ je hnyimaködrin ae hmanenang, ke gan je unyidrin, hon hnyimakan wahidröu hia hnyat adre me an jeû an than.

¹⁶ Me haba Meleza ame hom hmetu jeû an than, me belidrin waina, me ha ö ʼdrin bi ge je khölak.

¹⁷ Ke haba je hidröu eling a vak, me Khong ame ham ködrin wâhmakhmeto me wâûnykûme hnyi je ûne me metâ hia: ke haba Daniela ame metâ hnyi je hna omanenâ hia me ta je bwi.

¹⁸ Ke ame um dö je bong waleji hnen than hna thu bongon he ka hum ödrin, me haba tuhan je eunuka ame hum ödrin ka hnyi hnyimakö Nebukaneza.

¹⁹ Ke haba than ame ûhnenamö mödrin; ke ba ke at gadra hia adre me wâ ae ûcû me Daniela, me Hanania, me Misaela, me Azaria: anyin a wale ödrin e tot hnyi hnyimakan than.

²⁰ Ke haba hnyi ta ûnyi hia ge metâ me wâhmakhmeto, wale ame hnei ödrin gan than, e ame ö ʼdrin a ten beonuâ anyidrin metâ hon metâiny ta je magoi hia me tavat bihihwakecin hnyi dokhon dokhu hia.

²¹ Ke e bi Daniela ke ne o but hnyi huna a bâni Koreso than.