At Khet 9 - Iaai Bible 1901 (New Caledonia)

¹ OGE me ûnykûme ta je ûnyi eling eû hnyi hnyekuk, he ka wâ wia ta je ûnyi e; a haba tavat ae wisa ke tavat ae metâ, ke anyidra ta je huliwa, me wale hnyi hnyamen Khong: ame ne ibetengiö, ame ne ûöhûköti, e ca khana tavat: e hnyi hnyimakodra ta je ûnyi e.

² E tha ûcû thibi ta je ûnyi hia ame o ka tavat hia: khaca thibi ûnyi ame o ka at ae wisa me at ae kong; ka at ae so, me at ae bo so, me at ae bo kong; me ka at ame bi hut, me ka at ame ca bi hut: e ûcû at ae so me at ae kong; e ûcû at ame ûhihinyköu me at ame ot ûhihinyköu.

³ Walang ûnyi ae kong hnyi ta je ûnyi adre ânyâ hmelen seûno, a khaca thibi ûnyi ame o ka tavat hia: eke, e ûnöngöt minya thö hnyekon tavat ge hulo, ke e bi hwen monu hnyi ta je hnyekudra, kʼ ödra tiga möt bi, ke hwaban e adre me he ka tavat adre mokcu.

⁴ Anyin a haba at ame tiga hanen tavat ae möt me hu geju bi unyin: anyin ae so kuli ae möt hon liona ae mok.

⁵ Anyin ae khana tavat ae möt a gʼ adre me he ka mok: ke ca khana bi tavat adre mokcu ke ûnyi, ke ba hmetu bi hwaban kodra; anyin adre hnying bi gadra.

⁶ A tha hia but walang ang anyidra ibetengiö, me anyidra ûöhûköti, me anyidra hmonyin; ke adre me ca he hmetu ka hnyi hanen nyiele balua ke huliwa adre ânyâ hmelen seûnö.

⁷ He thö u, an ju âm jeû, me senyin me ijem ânyâm waina me hnyok ame hobâ; anyin a hia but Khong walang ang kap ânyâm ta je huliwa.

⁸ E so e hau bala je khaûâm; ke ca he ka hia wakaco hnyi hon bâm.

⁹ Möt senyin dö tha u me âiâm u me hnyok kâu hnyi je bonginy ânyâm möt ae ûnyi baû: anyin a wale jekhom hnyi möt ang, me hnyi ânyâm huliwa u je huliwan hmelen seûno.

¹⁰ Haba hna wâ hnen li hnyamâm he ka ânyâ, ânyâ thö hnen hwegiâm; anyin ae ba huliwa, me ûnykûme, me wâhmakhmeto, me metâ, hnyi erkemok, u me he ka hnyin.

¹¹ Oge me hmetu me wâ hmelen seûno, a gʼ ame ca bân ka o at ae hâhâ can, ke haba khaca ame ca ton bi at ae hwege, ke haba khaca e ca tren jeû at ae metâ, ke haba khaca ame ca o je omjeû ka at ame wâhmakhmeto, ke betenge baû, ka at ame huliwa tremang; ke haba ûen, me ûnyi ame o monu, ame o kodra hia.

¹² Anyin a haba at, e ca khana bi ûen: helâ me ta je wâ adre me hnok hnyi ert, me ta je meno adre me hnok hnyi hnewe, ke ame hnok dö e ûcû mödra tavat hnyi ûen ae kong, e ka ie o ködra.

¹³ Oge hia but wâ minya metâ helâng hnyi hmelen seûno, ke haingök, E gan hmâ:

¹⁴ wale a gʼ ame hu taun ae ûhnyûkong, ke wakhalet thibi aten; kʼ ame he than ae gan ûcon kʼ ame igigilo e, me op ta je tabiny vat cicö e:

¹⁵ ke adre me wâ ke aten e ae metâ ae theduoc, ke e ame omelo taun ge anyin metâ; ke ba at ame ûnykûme ka at eling ae theduoc.

¹⁶ Me oge me ha, ka habe, E so metâ hon tang hwege: ke so bi adre me hûkotiâ metâ anyin at ae theduoc, kʼ adre me ca long hwan hofuc.

¹⁷ Adre me long hofuc ae menyik hwan tavat ae metâ, hon hna ha hwegiâ hnen at ame musi unyin tavat ae monu.

¹⁸ E so metâ hon je omjehen vat; ke haba at hulo a khaca, me ame okongoâ so ae gan hmâ.