At Khet 8 - Iaai Bible 1901 (New Caledonia)

¹ IE at ae ûcû me at ae metâ? ke ie at ae khana bongon ta je ûnyi? Haba metâ anyin at ame omelamâ hnyimakan, me wia thö hwegien hnyimakan.

² Haingök, Vheno thö hnanyibu anyin than, ke ûnyi ge ûhihinyköu hnyi hnyimakan Khong.

³ Ca logot bi he ka he gan; ca hwege ka hnyi ûnyi ae kong: anyin a e ame ânyâ hia weny.

⁴ Anyin ae hu man maniny hofuc hwan than; ke ie at ame he ka ha kâu, ka habe, Ieû u me ânyâ?

⁵ Haba at ame vheno hnanyibu, me ame ca he ka wâ ûnyi ae kong; ke haba hnyeûkon at ae metâ ame wâhmakhmeto ûen me hna owisa:

⁶ anyin a haba ta je ûnyi hia, me e hu ûen me owisa; anyin a haba okongon at, me hmak kâu:

⁷ anyin ae ca khana ûnyi ame he ka o; ke ie at ame he ka omanenâ kâu ge ûen ame he ka o?

⁸ E ba at ame tren musi hon hanu, he ka behânâ hanu; ke ba at ame muso bong mok; ke ba at adre me hna ûnyi hnyi vat eling: kʼ ame ca he hwakecin ae kong ka omelo tavat adre me mâdrâ e.

⁹ Oge hia but wâ ta je ûnyi hia eling, ke oge me ûnykûme eû hnyi hnyekuk ta je ûnyi hia adre me ânyâ hmelen seuno: e hu ûen adre me muso ke at ge ke at bi me me kong.

¹⁰ Me oge me wâ minya tavat ae kong adre konâm, kʼ adre me o but ka hnyi erkemok; ke haba tavat adre hia but ânyâ so me adre me he but ûnyi hnyi dok ae kap, kʼ adre me hnying ödra hnyi taun: wale ke thatûnyi.

¹¹ Anyin adre me ca ie bi hwaban huliwa ae kong, anyin a wale e hwege hnyekon tavat he ka mâdrâ hulo.

¹² Eja ke ne a ne khaca haded hna ânyâ hulo hnen at ae kong, kʼ adre osehia bongon je bong, ke so bi, oge me wâ but a gʼ ame he ka so ka tavat adre me outen Khong, a tavat ot hnyi hnyimakan:

¹³ ke ame ca he bi ka so at ae keng, kʼ adre me ca he ka osehia bongon je bong, ke helâ me hmenu; anyin a e ame ca ot hnyi hnyimakan Khong.

¹⁴ E hu thatûnyi adre me ânyâ eang hmeledrany; a gʼ ame aat ka tavat ae wisa helâ me hna ânyâ ka tavat ae kong: ke haba khaca, ame aat ka tavat ae kong helâ me hna ânyâ ka tavat ae wisa: haingök, Wale ke thatûnyi.

¹⁵ Me oge me haisoâ hna hobâ, anyin ae ba so ka at hmelen seûno, ke so bi adre me he ka han me ic me senyin: anyin a wale ûnyi ame he ka tha e me at hnyi anyin huliwa hnyi bongon ta je bong hia wale a ham kâu Khong hmelen seûnö.

¹⁶ Hnyi ûen oge me ûnykûme eû hnyi hnyekuk he ka khana metâ, me wâ ta je ûnyi adre me ânyâ eang hmelen; (anyin ae hu at ame ca mokut hnyi lany me lit:)

¹⁷ me oge me wâ hia huliwa anyin Khong, ae ca khana bi at he ka wâ ta je huliwa adre me ânyâ hmelen seûno: anyin ame ne he at ka huliwa me elâm e, me e ame ca he ka wâ; eke, ame ne ûnykûme ge at ae metâ he ka khana e, me ca khana bi he ka wâ.