At Khet 7 - Iaai Bible 1901 (New Caledonia)

¹ E ÛNYI hnathu ien ae lung so hon wakaco ae so; ke ûnyi hnathu bong mok, hon bong ate o hnyin.

² E so he ka he ka hnyi uma ödra ka tenge hnyin, hon he ka he ka hnyi uma ödra ka bijeû hnyin: anyin a wale obiny tavat hia; ke ame he at ae möt ka ûnykûme e eû hnyi hnyekon.

³ E so hloûhloû hon hluma: anyin ae so but hnyok hnen hnyimak ae menyöng.

⁴ E bi hnyekon at ae metâ hnyi uma adre me tenge hnyin, ke e bi hnyekon tavat ae monu hnyi uma adre me senyin hnyin.

⁵ E so he ka long ûthaö hnen at ae metâ, hon he ka long khumöng anyin tavat ae monu.

⁶ Anyin ame fifica je wahleûhleû hmelen öt, ke helâe ûhlumainy at ae monu: ke thatûnyi e.

⁷ Haba behom gânâ ame omonoâ at ae metâ; ke haba bwihlany ame okongoâ wâ ûnykûme.

⁸ E so obiny ke ûnyi hon hwân: ke so hokhnyok hon hnyok bi gan.

⁹ Ca logot hnyekom he ka hmonyin, anyin a haba hnyekon at ae monu, me wale hnyaban hmonyin.

¹⁰ Ca ha bi, ka habe, A hawa ae so je bong a bân hon je bong ang? anyin ae ca meta bi hnam hna hnö e.

¹¹ E so metâ, ae ûcû e me hwajekhoû: eke, e ti beönua e ka tavat adre me wâ seûno.

¹² Anyin a haba metâ me hnân söng, helâ me mone bi me hnân söng: ke haba nuainy wâhmakhmeto a gʼ ame he metâ ka tuö möt anyin at ae tren e.

¹³ Ûnykûme ju huliwa anyin Khong: anyin a ie at ae khana he ka owisa hnen hna ohwalö?

¹⁴ Senyin dö hnyi bong sot, ke ûnykûme ju hnyi bonginy vec: Khong ame ânyâ khaca me me ûcon khaca, me me ca he bi at ka wâ ta je ûnyi ame he ka o hwaban e.

¹⁵ Wale hia wânök hnyi je bong bongon anyik hnyok baû: e hu at ae wisa ame mokcu hnyi hwakecin ae wisa, ke hu bi at ae kong ame möt beû hmâ hnyi hwakecin ae kong.

¹⁶ Ca he ka hwakecâm ae ti wisa; ke ca ogânâ hmönyinâ ânyâm metâ: anyin a ieû u me he ka hamâm hlingö u bi?

¹⁷ U ma ca he ka ti kong, ke ca he bi ka monu: anyin a ieû u me he ka mok ke tiga ca ûâm bi?

¹⁸ E so u ma kât ûnyi ang; eke, ca hom hmetu hnyamâm ûnyi hnyin: anyin a haba at ame outen Khong, me ame he ka o ûnyi hnyi je ûnyi e hia.

¹⁹ E man hmonyin metâ ka at ae metâ hon tavat musi a ten hnyi taun.

²⁰ Anyin ae ba at ae wisa eang hmeledrany, a at ame ânyâ so kʼ ame ca ânyâ hulo.

²¹ Ke haba khaca ca he ka hnyok bi ta je hofuc hia adre me ha; wâ u nye long athnyabaem me hangö u but:

²² anyin e khanö u hnyi hnyekom minya a u je osehia hangâ keihen.

²³ Oge hia but ohnathoâ ta je ûnyi hia e hnen metâ: haingök, Oge me he ka metâ; ke e ame ûsâûkâûöâ mönya.

²⁴ Haba ûnyi ae sâkâû but, me dit hmonyin; ie at ae khana he ka wâ e?

²⁵ Oge me hwihwiö, me ûnykûme eû hnyi hnyekuk he ka khana, me elâm, me wâ metâ, me bongon ta je ûnyi, me khanö nya hnyikongon monu, me hwen monuiny monu:

²⁶ ke oge me wâ ke ûnyi ae hiny hon mok, wale momo a haba hnyekon bi me je hnewe me je ert, ke je ûnyi hnân ûce at li hnyamen: haba at ae so hnyi hnyimakan Khong, me ame he ka kec gan; ke ame he ka hnok at ae kong gan.

²⁷ Haingen at Khet, ka habe, Wâ bi, walang hnok hna wâ, iny ka tuluto ke ûnyi me ke ûnyi, me inye wâ bongon:

²⁸ wale oge me tiga elâm bi, ke oge me ca wâ bi: oge wâ but baga a khaca ûnyi hnyi thauzan; ke oge me ca wâ bi momo unyidra hia.

²⁹ Wâ bi, waleû ûnyi a khaca oge me wâ, a Khong ame op at he ka wisa; ke adre me elâm bi je biûnyi ae se hia.