At Khet 4 - Iaai Bible 1901 (New Caledonia)

¹ KE oge me hmetu me wâ je hna seda hia hmelen seûno: ke wâ bi je deköien tavat adre me oveci ödra, ke ba at ame hadruʼ ödra; ke tren hwege tavat adre me oveci ödra, ke ba at ame hadruʼ ödrin bi.

² Ke oge me ha hnahicâ tavat ae mok a gʼ adre mokcu e hac, hon tavat adre möt a gʼ adre me möt walang ang;

³ eke, ke hnahic hudru hia at ae tiga ca o, at ame tiga ca wâ huliwa ae kong adre me ânyâ hmelen seûnö.

⁴ Me oge me wâ ta je huliwa hia, me ta je unyi hia ae so adre me huliwan, a gʼ ame behnyokâ at ge ke at bi can e. Wale ke thatûnyi, ke adre me han ang.

⁵ At ae monu ame hûkâlâ li hnyamen, me ka an bi viny.

⁶ E so e khaca hnyam ae unöngöt tha e me laba wia, hon li hnyam ae tha unöngöt bi tha e me huliwa me hna han ang.

⁷ Me oge me hmetu me wâ ta je ûnyi baû hnyi hmelen seûno.

⁸ E hu at a khaca, a hake e bi; eke, e ba nokon me liamekeiny; ke so bi e ba obiny anyin ta je huliwa hia, ke ca sekon li emakan ge omjeû. Haingen, ka habe, Inya oge me huliwa hobi kö ia, me ka behanö nya bi ge ta je ûnyi ae so? Wale ke thatûnyi, me huliwa ae kong.

⁹ E so li at a lö hon at a khaca; anyin ödru me he ka hu hwaban ae so anyidru huliwa.

¹⁰ Ame ne ta ke at me hamen ke at he ka lelö hanen: ke e köiö ge at a khaca e ka ta but, ke ba hanen he ka lelö hmetu e.

¹¹ Walang khaca, ame ne tha mokut li at a lo, ödru me he ka mage: ke ame he ka kâmâu ka mage at a khaca?

¹² Ke ame ne ton ke at hon at a khaca, e khana li at a lo he ka tot kâu; ke ame ca ie mou tö a kun ta waamoiny.

¹³ E so hidröu ae theduoc ke at ae metâ bi, hon than a hingat at ae monu, wale at ame höcö long, ödra ka he ka nâ.

¹⁴ Anyin a e ame dit ut unyi hnyi uma ceat he ka than; eke, adre me hnokoâ hnyi dokhon dokhu ke ba omjeû.

¹⁵ Oge wâ but ta je ûnyi ae möt, adre me he hmelen seûno, a tha ödra me hidröu, wale at a loiny, at ame hwöhwaban.

¹⁶ Ca hnân bi aû tavat e ame muso: ke so bi adre me ca he ka senyin kâu hwaban dö e. E hnathu e thatûnyi e, kʼ ame han ang.