At Khet 3 - Iaai Bible 1901 (New Caledonia)

¹ E HU bonginy ta je ûnyi hia, me ûen hobi kâu ta je huliwa hia hnyi hmeledrany:

² e hu ûen hna hnöku ota, me ûen mok; ûen he ka tā, me ûen oc hmetu hna tā;

³ ûen hlingâ, me ûen ometo; ûen hagutâ, me ûen otilâ;

⁴ ûen tenge, me ûen hluma: ûen hnyamok, me ûen bibiâ;

⁵ ûen khûâ degecâ je veto, me ûen ûkhöûnâ je veto; ûen ûdeluö, me ûen ca he ka delûâ;

⁶ ûen hlo, me ûen okolo; ûen tuö, me ûen degec;

⁷ ûen kia, me ûen tibet; ûen laba hnyibû, me ûen fuc;

⁸ ûen betenge, me ûen hûkotiâ; ûen vat, me ûen ûsoköu.

⁹ Ieû troban ka at ame huliwa hnyi ta je ûnyi e ame ânyâ?

¹⁰ O ge wâ but huliwa ae hmak wale a ham Khong ka tavat he ka huliwan.

¹¹ E ame hia but ânyâ ta je ûnyi hia he ka hmanenang hnyi je ûen ae ûcû: ke khaca, e ame ip ûnykûme ka hmeledrany eû hnyi hnyekudra, ke so bi, at ame ca wâ huliwa ame ânyâ Khong ûnyi hnyi hwân, ke ne o but hnyi obiny.

¹² E khanö nya ae ba soidra, hon he ka senyin, me ânyâ so, ödra ka tiga möt.

¹³ Ke haba khaca, ae ka han me ic tavat, me senyin so hnyi anyidra huliwa, wale bwihlany anyin Khong.

¹⁴ E khanö nya a haba hna ânyâ hnen Khong ame he ka e nyiele balua: adre me ca he ka bi hanen ka hnyin, ke adre me ca he ka ohia ûnyi hnyin: ke Khong ame ânyâ e me me ot at hnyi hnyimakan.

¹⁵ Haba ûnyi kâû adrem ka e bi walang ang; ke haba ûnyi ame he ka o, me ûnyi kâû adrem: ke Khong ame elâm ûnyi ae hia.

¹⁶ Ke oge me wâ hmetu hmelen seûno, ae hnyi umen owisa, a e bi ling hwakecin ae kong; ke e bi hnyi hnen hwakecin ae wisa, wale bi e hwakecin ae kong.

¹⁷ Haingök hnyi hnyekuk, ka habe, Hamen Khong he ka owisa ka at ae wisa me at ae kong: anyin ae hu ûen ta je ûnyi hia me ta je huliwa hia.

¹⁸ Haingök hnyi hnyekuk, ka habe, Wale can tavat, me me he Khong ka cubic ödra, me he ka omanenâ kodra a ödra ûcû me ta je meno.

¹⁹ Anyin a haba ûnyi ame o ka at, me ame o minya ka meno; kʼ ame o ködru ûnyi a khaca; haba mok anyin ke at, me helâ me mok anyin ke at; eke, e tha ûcû homenödru; ke ca beönua bi at hon meno: anyin a thatûnyi hia.

²⁰ Kʼ ame he ödru lo hia ka hnyi dok a khaca; ûhedru hia eû hnyi kânâ, kʼ ödru me he ka wia hmetu hia me me kânâ.

²¹ Ie at ae khana hanon at ame ölö goranyai, me hanon meno ame utut kâû hnyikânâi?

²² Anyin a wale oge me wâ but ae ba soiny at ae nua hon he ka senyinâ anyin ta je huliwa; anyin a wale jekhon: anyin a ie at ame he ka hom hmetu e, me me wâ ta je ûnyi hwaban?