At Khet 2 - Iaai Bible 1901 (New Caledonia)

¹ HAINGÖK eû hnyi hnyekuk, ka habe, Awe, oge me he ka cubic u ge senyin; anyin a wale he thö vheno thö so: ke wâ bi, wale ke thatûnyi.

² Oge me ha ge hwen hluhluma, ka habe, Hwen monu e: ke ge senyin, e ame hö?

³ Oge me ûnykûme eû hnyi hnyekuk he ka osenyinâ unyik ge waina, ke ame tiga lelö hnyekuk hnen metâ, me he ka kât hmâ hwen monu, mʼ oge me he ka wâ ûnyi ae so ka tavat he ka ânyâ hnyi hmeledrany hnyi ta je bonginy anyidra möt.

⁴ Oge me ânyâ je huliwa ae gan hmâ: oge me op umök je uma; o ge me tâ je hnyei vine;

⁵ ke oge me bi ik, me bi anyik je utkânâ, me tâ eling ta je ûö hia ame ve wa wan:

⁶ oge me ânyâ anyik je köiö, hnân hû kânâ ame kû hnyin ta je ûö:

⁷ oge me ûco je hlu baga me momo, ke e hu je athnyabaik adre hnokoâ hnyi hnyabak; e hu minya unyik ye hnahat kau me je mamoe, ae nua hudra hia adre bödra ka laba hnyi Jerusalema:

⁸ oge me ûkhöûnâ minya sileva, me gol, me je omjehen je than, me je hnyei: e hu gak minya tavat khumöng obaga me omomo, me je weny tavat, wale omomo ae se hia.

⁹ Ke oge me gan dut me tren gânâ hudra hia tavat adre bödra ka laba hnyi Jerusalema: ke e bi minya unyik anyik metâ.

¹⁰ Ke oge me ca behânâ ta je ûnyi hia ame bewâ hnen li emakök: oge me ca thawâ hnyekuk ûnyi hnyi ta je senyin hia, anyin ame senyin hnyekuk ge anyik ta je huliwa hia; ke wale troban anyik ta je huliwa hia.

¹¹ Me oge me wâ ta je ûnyi hia ame ânyâ hnen li hnyamok, me ta je huliwa oge me huliwan he ka ânyâ; ke wâ bi, thatûnyi hia, ke ame han ang, ke ba troban hmelen seûno.

¹² Ke oge me hwio he ka wâ metâ, me hwen monu, me hwakecin ae unyi baû: anyin ae hö at ame he ka o hwaban than? me wale thibi e adre hia but ânyâ ehac.

¹³ Ke oge me wâ but ae ûnyi hnathu metâ hon hwen monu, helâ me lany ae ûnyi hnathu hon menekholom.

¹⁴ Haba at ae metâ me hu li emakan hnyi ban, ke ame he at ae monu hnyi menekholom: ke so bi oge me wâ a gʼ ame o khaca thibi ûnyi ka tavat hia.

¹⁵ Ke haingök eû hnyi hnyekuk, ka habe, Haba ûnyi ame he ka o ka at ae monu, me ame he ka o minya könya; awe, hnân eû a iny metâ gan hmâ? Me oge me ha eû hnyi hnyekuk, ka habe, Wale minya ke thatûnyi.

¹⁶ Anyin adre me ca ûnykûme nyiele balua at ae metâ me at ae monu; anyin adre me he ka hnying hia hnyi je bong ame he ka o. Ekölö ame he ka mok at ae metâ helâ me at ae monu!

¹⁷ Me oge me höcö möt; anyin ae vec könya huliwa adre me ânyâ hmelen seûno; anyin a thatûnyi hia, kʼ ame han ang.

¹⁸ Ke oge me höciâ anyik ta je huliwa hia wale oge me ânyâ hmelen seûno: anyin a hamök he ka hna e ka at ame he ka hwöhwabök.

¹⁹ Ke e khanö ia ame ne he ka at ae metâ ame ne at ae monu? ke e ame he bi ka musö anyik ta je huliwa hia wale oge me huliwan, me omanenâ hnyin metâ hnyi hmelen seûno. Wale ke thatûnyi.

²⁰ Anyin a wale oge me hwihwiö kʼ ame hmak hnyekuk ge ta je huliwa hia oge me ânyâ hmelen seûno.

²¹ Ke waleû at ame huliwa hnyi metâ, me wâhmakhmeto, me ti khana; ke so bi e ame he ka hna e ka at a ca hnyi huliwan bi me hnân weûhûneny. Wale minya thatûnyi, me monu ae gan hmâ.

²² Anyin a ieû ame hu ke at ge anyin ta je huliwa hia, me ivecin hnyekon, waleji e ame huliwa hnyin hmelen seûno?

²³ Anyin a e ame vec thibi hnyi bongon taje bong, kʼ ame huliwa hnyi hloûhloû; eke, ame ca mokut bi hnyekon hnyi je hnyinghet. Wale ke thatûnyi.

²⁴ E ba nua soiny at hon he ka han me ic me hna hnyekon he ka senyin so hnyi anyin huliwa. Oge me wâ minya e, a ûnyi ge Khong.

²⁵ Ke ie at ae khana han, ke ie at ae khana senyin, huk?

²⁶ Anyin a Khong ame ham metâ ka at kʼ ame osenyinâ e, ke wâhmakhmeto, ke senyin: ke e ame ham huliwa ae hmak ka at ae kong, he ka ûkhacaköuâ me ûkhöûnâ, me me he ka ham bi ka at ame osenyinâ Khong. Wale ke thatûnyi, ke ame han ang.