At Khet 12 - Iaai Bible 1901 (New Caledonia)

¹ KE ûnykûme ju At a up u hnyi je bonginy ânyâm hidröu, e tiga ca o ta je bong ae kong, me tiga ca hakekeny bi ta je huna wale u me he ka ha hnyin, ka habe, O ge me ca senyinâ hmetu e;

² e ka tiga ca menekholom bi seûno, me lany, me tehi, me ta je okhû, kʼ ame ca hmetu ta je ûlâ hwaban ûtainy we:

³ hnyi bong adre me he ka öbubuny hnyin tavat tuö uma, ke haba tavat hwege adre me he ka iyâû, ke haba tavat khin hwit adre me ca huliwa hmetu bi, anyin a ödra wakhalet biju, ke menekholom but tavat selat hnyi je mamalama,

⁴ kʼ adre me he ka hlöng je hwanuma eû hnyi gethen; e ka ûhnyûkong ut hwan khin hwit, ke ame he ka tot bi at hnyi ifuciny meno ame gâ, kʼ ame he ka sënyin hia omomo hia adre hnyok ka khumöng;

⁵ eke, adre me he ka outen ûnyi ae gorany, ke e bi eû hnyi gethen ta je ûnyi hnân outen; kʼ ame he saked ka vhong, kʼ ame he ka hmak ge wahamon, ke ba hmetu hna weny: anyin ame he at ka hnyi umen uma a nyiele balua, kʼ ame vheno gethen hnen tavat adre me hnyamok:

⁶ e ka tiga ca mou bi tö sileva, ke tiga ca hmouca kaia gol, ke tiga ca hmouca kaia hnyi an, ke tiga ca ok waengen hnyi taben köiö;

⁷ ke ame hmetu sesâ hnyikânâi, helâ me ehac, ke ame he hmetu hanu ka Khong at ame ham e.

⁸ Awe, haingen at khet, ka habe, E ti thatûnyi ke thatûnyi ta je ûnyi hia.

⁹ Ke haba khaca, anyin ae metâ at Khet, me e ame nâ tavat ge metâ; eke, e ame ûnykûme, me elelâm, me ip gaga ta je vejec ae se hia.

¹⁰ Haba at Khet ame elâm ta je hofuc ae ûcû, ka ta je hofuc adre me sihnalimen hnyi wisa, wale je hofuc ae hnathu.

¹¹ Haba je hofuc hwan at ae metâ, me helâ me ûnyi hnân dö bolok, ke haba ta je hofuc hwan je homakan ta je ûkhacaköu, me helâ me je fao adre me ti ohmâ, a ham ge at a khaca a at tuö mamoe.

¹² Ke walang khaca, nokuk lö, kap ju hna nâ: e ba obiny bi ka hn ödra hna sihnalimen ta je tusi ae se hia; ke ödra ka unö gânâ tusi, me ame sënyin dut unyin.

¹³ Walang obiny ûnyi e; adre hia but long hia: outen ju Khong ke vheno anyin ta je hnanyibu; anyin a wale hanymen ae bekhot ge tavat hia.

¹⁴ Anyin ame he Khong ka hom ta je huliwa hia ka hnyi hna owisa, ke ta je ûnyi hia ae iyong, ame ne ta je ûnyi ae so, kʼ ame ne ta je ûnyi ae kong.