Amosa 8 - Iaai Bible 1901 (New Caledonia)

¹ WALANG hna omanenâ könya ge Than Iehova: ke wâ bi tang wan ûö ae mat.

² Ke e ame ha könya, ka habe, Amosa lö, ieû u je wâ? Me haingök ka habe, tang wan ûö ae mat. Me haingo Iehova könya, ka habe, A o but obiny ka lakeik a at Isaraela; oge me ca he hmetu ka he me digic ödra.

³ Ke haba je khu-möng hnyi uma kap, me ame he ka helâ me kuku tenge hnyi bong eling, haingen Than Iehova: kʼ ame he ka se hia ta je komok; kʼ adre me he ka khûâ hnyibu ödra hnyi je dok hia.

⁴ Long ju hofuc ang öbun tavat öbun e beutâ ta je theduoc, me ota tavat ae vec hnyi hnyei,

⁵ haingodra, ka habe, ame he ka um kehö manen a tehi, mʼ ate me ûcû anyita hwit? ke sabath, mʼ ate me khong tang hwit? ke adre me oûhnyûkongoâ efa kʼ adre ogânâ sekel, kʼ adre omono tulut ge iyawo:

⁶ mʼ ate me ûco tavat ae ba ta ûnyi, hwaban sileva, ke at ae theduoc hwaban li tangen hnyeûca, ke ûco ta je tiren hwit.

⁷ A hia but Iehova khemanyinâ ûnuainy Jekob, ka habe, E hnathu oge me ca he balua ka hnying anyidra ta je huliwa.

⁸ Hawa, ame ca he tavat ka öbubuny can eling, ke tenge hia tavat adre me labâ e? eke, e ame he bi ka khibi hia helâ me Wagewe; ke e ame he ka bwebwelâ, kʼ ame he ka dit hmetu ju, helâ me wageweiny Aigupito.

⁹ Ke haingen Than Iehova, ka habe, Hnyi ûen eling oge me he ka odilâ seûno hnyi jebigo, me olidrâ hnyei hnyi lany.

¹⁰ Ke oge me he ka wia anyibun je bijeû ka hnyi tenge, me anyibun je khumöng hia ka hnyi, tenge thungaû; ke oge me he ka oâ ka hnyi ta je hnyin hia mano ae gan nân, me ohadreûâ ta je ban hia; ke oge me he ka wia e helâ me hwatenge can nokon a khaca, me obiny e helâ me bong vec.

¹¹ Haingen Than Iehova, ka habe, Wâ bi ame he ka o je bong, me oge me he ka kunâ hmiâ ka hnyi hnyei, ca hmiâ ge ba han me köiö, ke hmiâ bi ge hofuc ho Iehova.

¹² Ke adre me he ka he monu ûnyi hnyi ke köiö ka, hnyi ke köiö, ke ûhedra hnyi hwadro ke ne o but jimeyö; adre me he ka wadring monu he ka elâm hofuc ho Iehova, ke adre me ca he bi ka wâ.

¹³ Hnyi bong eling ame he wahlu ae hmanenang me wahidröu ka momonu ge beic.

¹⁴ Tavat adre me khemanyinâ hulöiny Samaria me ha, ka habe, Dana lö, kia inya Khongom; ke kia inya gethen ûheny Bere-seba; ke adre me he ka ta, ke adre me ca he hmetu bi ka tot.