Amosa 2 - Iaai Bible 1901 (New Caledonia)

¹ WALANG hna ha hnö Iehova, ka habe, Can kun ta monuiny Moaba, eke, can vak, me oge me ca he ka ohavâ hwaban e; anyin e ame thong je jeien than Edoma me me dröu but:

² ke oge me he ka kunâ meic hon Moaba, me e ame he ka thong degecâ je uma umen than hnyi Kerioth; ke ame he Moaba ka mok hnyi mede, me kuku hwege, me hwan trutru:

³ ke oge me he ka subâ degecâ at owisa hnyi wanben e, me tha hlingâ e me ta je taben hia hnyin e, haingo Iehova.

⁴ Walang hna ha hnö Iehova, ka habe, Can kun ta monuiny Juda, eke, can vak, oge me ca he ka ohavâ hwaban e; anyin adre hia but hna degecâ hnanyibu anyi Iehova, me ca tuö hnen je hna otilâ, ke ame omonu ödra anyidra je thoi, waleji a hnu hoton lakamödra:

⁵ ke oge me he ka kunâ meic hon Juda, kʼ ame he ka thong degecâ je uma umen than hnyi Jerusalema.

⁶ Walang hna ha hnö Iehova, ka habe, Can kun ta monuiny Isaraela, eke, can vak, me oge me ca he ka ohavâ hwaban e; anyin adre hia but ûco at ae so hwaban sileva, ke at ae theduoc hwaban li tangen hnyeûca:

⁷ tavat adre me behnyekudra kânâ a e hon ban tavat ae theduoc, kʼ adre me wia gethen deny tavat ae menyik: kʼ ame he at me kamen unyin hlu a khaca, me okongoâ iök ae kap:

⁸ ke adre me mokulec je ûkhaû adre me ham hnân haten, hnyi hmelen ta je taben hut hia, kʼ adre me ijem waina anyin tavat adre me takoû ge hnanyibu hnyi uma umen Khongudrin.

⁹ Ke so bi, oge me ohia at Amora hnyi hnyimakodra, waleji a helâ me ûgöranyin je arasi ûgöranyidra, ke ûcû me je iwajo tang hwe-giödra; ke so bi oge me ohia wan gadra ethö, me je iwân eû.

¹⁰ Ke oge me hum öbun minya ûnyi hnyi hnyei Aigupito, ke lili öbun hnyi hnyebuba fâte je huna, mʼ öbun e he ka hu hnyei iny at Amora.

¹¹ Ke oge me oâ ke je lakubun mʼ ödrin je perofeta bi, ke wahidröu gabun mʼ ödrin je Nazeri bi. Lakon Isaraela lö, hawa, ca e? haingo Iehova.

¹² Ke öbun e habelen je Nazeri ge waina, ke öbun e hûna ka je perofeta, ka habe, Ca he öbun ka perofeta.

¹³ Wâ bi oge me he ka hlic öbun hnyikânâi helâ me ûkat ame hlec ae unöngöt ge je thi hwit.

¹⁴ Ke ame he ka ba but hnabâ anyin at ae hâhâ can, kʼ ame ca he at ae hwege ka oâ tang hwegien, kʼ ame ca he at ae gan ka omelo e bi:

¹⁵ kʼ ame ca he bi ka tot at ame hok cafana: kʼ ame ca he ka kec mot at ae hâhâ can: ke haba khaca, ame ca he at tabö hors ka omelo e bi:

¹⁶ Ke haba at ae hwege hnyekon wale unyin tavat ae hwege, me e ame he ka kec ke ba ûkhaû hnyi bong eling, haingo Iehova.