II. Man Ûlabainy Je Than. 8 - Iaai Bible 1901 (New Caledonia)

¹ KA um dö je huna a twente, wale hnö Solomona hna op uma umö Iehova hnyin, me umen bi uma,

² me haba je taun a hia but ham hnö Hiram kö Solomona, me Solomona ame up ödrin me olaba lakon Isaraela hnyin.

³ Ke haba Solomona ame he Hamathe-zoba ai, me hom ûhnyûkongo.

⁴ Me e ame op Tademora hnyi hnyebuba, me je taun hia hnân ip omjeû, waleji e ame otilâ hnyi Hamath.

⁵ Ke e ame op Bethe-horona ethö, me Bethe-horona eû, li taun adre up haginy, me je hak veto, me je homagöule, me je ohmâiny;

⁶ me Baalath, me je taun hnân ip omjeû anyi Solomona, me je taun hobi kâu je kariota, me je tauniny anyin tavat tabö hors, me je ûnyi hia ame we Solomona he ka op hnyi Jerusalema, me Lebanona, me je ke keihen hia hnyei e ame musi hnyin.

⁷ Ke haba tavat hia a kolon a at Heth, me Amora, me Perizi, me Hivi, me Jebusi, wale a ca at Isaraela;

⁸ ke lakudrin a je wan hwabodrin hnyi hnyei, waleji a ca ohia hnen lakon Isaraela, me haba Solomona ame wia keihen gadrin he ka bi athnyaba, ke ne o but hnyi bong ang.

⁹ Haba Solomona ame ca kunâ lakon Isaraela he ka bi athnyaba hnyi anyin huliwa; ke ödrin tavat vat, me je taben ae beönua, me taben anyin je kariota, me tavat tabô hors.

¹⁰ Wale je taben ae beönua unyi Solomona than, ödrin tu haded ke fifte, hnyat muso tavat.

¹¹ Ke haba Solomona ame hom but momo nöku Farao ûnyi hnyi taun anyi Davita ka hnyi uma e ame op hobi kâu: anyin a haingen, ka habe, Ame ca he öiök ka laba hnyi uma umö Davita than Isaraela, anyin ae kap je dok adre me oâ tang tangö Iehova kâu.

¹² Ke haba Solomona ame hudo je hut kö Iehova hon taben hut anyi Iehova, wale e ame ânyâ cicö poretiko,

¹³ kʼ ame bi hanymen adre me thu hnyi ke bong me ke bong, kʼ ame hudo hoton hnanyibu anyi Mose, hnyi je sabath, me je tehi a teb ûnyi, me hnyi je bijeû adre me thu, wale kun hnyi huna, wale bijeûiny areto adre me ca levenâ, me bijeûiny je wik, me bijeûiny uma hunuma.

¹⁴ Ke e ame hûna hoton hna otilâ ga Davita a kamen je deo hanymen tavat bihut, me at Levi ka je hanymödrin, he ka ogânâ, me huliwa hnyi hnyimakan tavat bi hut hoton huliwa hnyi ke bong me ke bong: me tavat tuö hwanuma hoton je dö hnyi je homagöule: anyin a hia but hûna helâe Davita aten Khong.

¹⁵ Kʼ ödrin e ca ohavâ hnanyibu anyin than ka tavat bi hut, me at Levi, ge ta je ûnyi hia, me ta je omjeû.

¹⁶ Ke a hia but Solomona penapena anyin ta je huliwa ke ne o but hnyi bong adre me bi taben hnyin uma umö Iehova, ke ne o but a um dö. Kʼ adre umö uma umö Iehova helâe.

¹⁷ Ke haba Solomona ame he Eziona-gibera ai, me Eloth ai, hnyi hobat köiöiny hnyei Edoma.

¹⁸ Ke haba Hirama ame kunâ kâu je hu a deny lathnyabainy, me lathnyabainy a hnyat wâhmakhmeto köiö; kʼ ödrinʼ e tha he me lathnyabai Solomona Ofira ai, me hom gol ûheny e a foa haded ke fifte je talan, me hom e kö Solomona than.