II. Man Ûlabainy Je Than. 7 - Iaai Bible 1901 (New Caledonia)

¹ Kʼ a um do Solomona hic, me ame kolu but meic ûnyi hnyi drany, me an hudiny leû me je hut; ke ame unöngötö uma ge hmanenangi Iehova.

² Ke ca khana bi tavat bihut he ka didro ka hnyin uma umö Iehova, anyin a unöngötö uma umö Iehova ge hmanenangi Iehova.

³ Ke haba lakon Isaraela hia ödrin e wâ meic ame kolu me hmanenangi Iehova hon uma; ke ödrin e nom hnyikânâi ka hnyi dek veto, me khudrung, me ole kö Iehova, me ha, ka habe. Anyin ae so; anyin a nyiele balua anyin ibetengiö.

⁴ Ke haba than me tavat hia ödrin e hudo je hut hnyi hnyimakö Iehova.

⁵ Ke Solomona than ame hudo ie bolok a twente tu thauzan, ke wan haded ke twente thauzan je mamoe. Me haba than me tavat hia ödrin e okabâ uma umen Khong.

⁶ Ke haba tavat bihut ödrin e ve tot hnyi je hanymodrin; me tavat Levi me ta je ûnyi khumöng anyi Iehova, waleji a ânyâ Davita than hnân ole kö Iehova, anyin a nyiele balua anyin ibetengiö, waleji hnyi ûen Davita ame ogânâ hnen ta ie ûnyi eling: ke haba tavat bihut ödrin e tûö trutru hnyi hnyimaködrin; kʼ ame tödrö at Isaraela hia.

⁷ Ke Solomona ame okabâ wanben hnyeule wale hnyi hnyimakan uma umö Iehova; anyin a e ame hudo je hudiny leû hnyi dok e me pipikhenyainy je hudiny ole: anyin a haba taben hut a bras, wale a ânyâ Solomona, me ca ûcû hnân ta je hudiny leû, me je hudiny han, me pipikhenya.

⁸ Ke haba hnyi ûen eling haba Solomona ame ânyâ bijeû hnyi seven ta bong, tha e me Isaraela hia, ûkhacaköu ae gan hmâ hmonyin, hwân hnyi homagouleny Hamath ke ne o but wageweiny Aigupito.

⁹ Ke haba hnyi bong a eitiny, me ödrin e ânyâ ûkhacaköu ae ûnyi hnathu: ke ödrin e okabâ taben hut hnyi seven ta bong, me bijeû hnyi seven ta bong.

¹⁰ Ke haba hnyi bong a twente theriny tehi a seveniny, me, e ame kunâ tavat ka hnyi umödrin je uma mano, me senyin me hobâ hnyi je hnyekudrin ge ta je so Iehova ame ânyâ hobi kö Davita, me Solomona, me Isaraela a lakeiny.

¹¹ Helâling Solomona ame umö uma umö Iehova, me uma umen than: ke haba ta je ûnyi hia a o ka hnyi hnyeku Solomona he ka ânyâ hnyi uma umö Iehova, me hnyi umen uma, me e ame umö hnyi hnahic.

¹² Ke Iehova ame manen kö Solomona hnyi ke hnyinghet, me ha kâu, ka habe, Oge hia but long hijâm hic, me ûca dok ang hnân hobi könya bi ke hnân umen bi hut.

¹³ Oge ne hlöng drany me me ba we, ke oge ne kunâ wahamon he ka an hnyei, ke oge ne kunâ mok ae cap ka lakeik;

¹⁴ ke e ka he lakeik, hnyat adre ip iök hudrin, ka oûhnyûkongu ödrin bi, me hic, me elâm hnyimakök, me hmetu ûnyi hnyi dedrin je gethen ae kong; awe, oge me he ka long hnyi drany, me hna anyidrin monu, me osoâ idrin hnyei.

¹⁵ Ke walang ang, oge me he ka bwela, me tevehlöng hic adre me hijö hnyi dok eang.

¹⁶ Ke walang oge hia but ûca me okabâ uma ang, me me eling iök nyiele balua: ke ame he ka eling li emakök me hnyekuk hnyi je bong hia thibut.

¹⁷ Ke haba u, u je ne he ka he hnyi hnyimakök helâ me hna vheno hnö Davita a kâmâm, me ânyâ koton hnok hna hûna köu, me tuö anyik je hnanyibu, me hnok je hna owisa;

¹⁸ awe, oge me he ka otethmâ theroniny dokhom dokhu, helâ me hnok hna ûhihinyköu me Davita a kâmâm, ka habe, Ame ca he ka ba hwabâm hnân musi hnyi Isaraela.

¹⁹ Ke öbun e ne hwio me hna degecâ anyik je hnanyibu, me hnok je hna hûna wale oge ip hnyi hnyimaköbun, me he me bi athnyaba ka ke je khong, me khudrung ködrin:

²⁰ me oge me he bi nya ka oc degeci ödrin ûnyi hnyi ik hnyei wale oge ham ködrin; ke haba uma ang wale o ge hia but okabâ hobi kâu iök me oge me he ka degec ûnyi hnyi hnyimakök, me oge me he ka wia e hnân ûhöûcû me hluma hnyi ta je hnyei hia.

²¹ Ke haba uma eang ae beû gorany ai, ame he ka hnân lâiâ ka tavat adre me he, me ha, ka habe, Anyin a ieû Iehova ame ânyâ helâe ka hnyei ang me uma eang?

²² Ke adre me he ka thu, ka habe, Can ödrin e hna degeci Iehova Khongon je lakamödrin, at ame hum ödrin ûnyi hnyi hnyei Aigupito, me hom ke je khong bi, me khudrung ködrin, me bi athnyaba ködrin: anyin a wale e ame oâ ködrin ta je ûnyi eang ae kong.