II. Man Ûlabainy Je Than. 6 - Iaai Bible 1901 (New Caledonia)

¹ ME haba Solomona ame ha, ka habe, A hia but ha Iehova a gʼ ame he ka laba hnyi menekholom.

² Ke oge me hia but op uma hnân hnyabam, a dok u me he ka laba hnyin nyiele balua.

³ Me haba than ame hwio me hahnahicâ ûkhacaköu hia anyin Isaraela: kʼ ame todrö ûkhacaköu anyin Isaraela hia.

⁴ Me e ame ha, ka habe, Ole kö Iehova, Khongu Isaraela, at ame fuc ge hnyimen kö cica Davita, me ohwâdâ ge li hnyamen, ke haingen, ka habe,

⁵ Hwân hnyi bong oge me hom lakeik ûhedrin Aigupito, me oge me ca ûca ke taun hnyi je tribu Isaraela hia, he ka op uma hnyin, me me laba eling iök; ke oge me ca ûca ke at me me tuhan lakeik Isaraela:

⁶ ke oge me ûca Jerusalema, mʼ adre me ip eling iök; ke oge me ûco Davita he ka musi hon lakeik a Isaraela.

⁷ Ke e hu eû hnyi hnyeku cica Davita weny he ka op uma hnân hobi kâu iö Iehova, Khongu Isaraela.

⁸ Ke haba Iehova ame ha kö cica Davita, ka habe, Anyin a eû hnyi hnyekom he ka op uma hobi kâu iök, me so hnâm hna hnyok:

⁹ ke so bi, u me ca he ka op uma, ke hamen nokom bi at ame he ka o ûnyi gam, e bi ame he ka op uma hobi kâu iök.

¹⁰ Ke a hia but Iehova ohwâdâ hwan hofuc a ha; anyin a oge me o but hwabö cica Davita, me tabâ theroniny Isaraela, helâ me hna ha bânâ hnö Iehova, ke oge me hia but op uma hobi kâu iö Iehova, Khongu Isaraela.

¹¹ Ke oge hia but ip eling tang, wale adre hitangen hnyin ûhihinyköu anyi Iehova, wale e ame ânyâ me lakon Isaraela.

¹² Ke e ame tot cicö taben hut anyi Iehova, hnyi hnyimakan ûkhacaköu hia anyin Isaraela, me lau li hnyamen:

¹³ (ke a hia but Solomona ânyâ ke tap a bras, faiv kubit ibeûen, ke faiv kubit ûlauen, ke kun ta kubit goranyai, me ip e hnyi wanben hnyeule; ke e ame tot hon, me cibouca hnyi hnyimakan ûkhacaköu hia anyin Isaraela, me hai hnyi dranyai li hnyamen:)

¹⁴ ke e ame ha, ka habe, Iehova lö, Khongu Isaraela, e ba ke Khong ae ûcû möu, ethö hnyi drany me eang hmeledrany; at ame tuö ûhihinyköu me ibetengiö ka lathnyabaem, tavat adre me vheno hnyi hnyimakâm me je hnyekudrin ae bekhot:

¹⁵ at ame tuö hobi kâu athnyabaem a cica Davita waleji ge hnâm hna ha bânâ kâu: eke, u je fuc ge hnyimâm, me ohwâdâ ge hnyamâm, helâ me hnyi bong ang.

¹⁶ Anyin a wale, Iehova lö, Khongu Isaraela, tuö thö hobi kâu athnyabaem a cica Davita waleji u je ha bânâ kâu, ka habe, Ame ca he ka ba hwabâm hnyi hnyimakök, he ka tabâ theron hnyi Isaraela; ame ne he thibi lakom ka tuö dedrin je gethen, he ka vheno anyik hnanyibu helâ me hnâm hna hia but vheno hnyi hnyimakök.

¹⁷ Ke walang ang, Iehova lö, Khongu Isaraela, e so adre me ohnatho hwâm hofuc, waleji u je ha ka athnyabaem a Davita.

¹⁸ Ke hawa, e hnathu ame he Khong ka tha laba me tavat eang hmeledrany? wâ bi, e ca ûcû köu drany me draniny ta je drany; ke ti ca ûcû köu uma ang oge hia but op!

¹⁹ Ke so bi Iehova Khonguk lö, ö u wâ ju hic hijin athnyabaem me anyin sumat, me long hwatenge me hic hijin athnyabaem hnyi hnyimâkâm:

²⁰ me me bwela but li emakâm cicö uma eang hnyi lany me lit, wale cicö dok waleji u je ha gan a u je he ka ip iâm eling; me long hic hijin athnyabaem cicö dok ang.

²¹ Ö u long ju hic hijin athnyabaem me lakem a Isaraela, ödrin ka he ka hic cicö dok ang: eke, ö u long ju hnyi hnyabam ethö hnyi drany; ke u ka long ut, ö u hna but.

²² Ame ne monu ke at ka ke at bi, kʼ adre me kunâ e he ka khemanyin, ke ka o but me khemanyin cicö ânyâm taben hut hnyi uma ang:

²³ awe, ö u long ju hnyi drany, me ânyâ, me owisa ka lathnyabaem, me bi hwaban ka at ae kong, me oâ ka hnyi hon ban hwakecin ae kong; me owisa ka at ae wisa, me hna kâu hoton hwakecin ae wisa.

²⁴ Ke adre me ne kot lakem a Isaraela hnyi hnyimakan iwahnaihmiony can anyidrin monu köu; kʼ ödrin e ne he ka hmetu me ha iâm, me hic me khöû hnyi hnyimâkâm hnyi uma ang:

²⁵ awe, ö u long ju hnyi drany me hna konginy lakem a Isaraela, me ohmetu ödrin ka hnyi hnyei waleji u je ham ködrin me lakamödrin.

²⁶ Ke adre me ne hlöng drany, me ba we, can hwakecidrin ae kong köu; ke ödrin e ne he ka hic cicö dok ang, me ha iâm, me hwio ûnyi hnyi anyidrin monu, u ka oveci ödrin:

²⁷ awe, ö u long ju hnyi drany, me hna hwakecin ae kong anyin lathnyabaem, me lakem a Isaraela, u ka nʼ ödrin ge gethen ae so ködrin he ka vheno; me kunâ but we ka hnyi em hnyei, wale u je ham ka lakem me me idrin.

²⁸ Ke a ne hu hmiâ hnyi hnyei, kʼ ame ne mok ae cap, kʼ ame ne ut, me löhau, me wahamon, me ihmâ; kʼ ame ne theling ödrin iwahnaihmiony mödrin hnyi hnyei adre me bi anyidrin je taun hnyin; ame ne ke je vec ame ne ke je mok;

²⁹ kʼ ame ne he ke at ka hic me sumâtâ, kʼ ame ne lakem hia a Isaraela, tavat adre me ve wâhmakhmeto vec me anyidrin hmak, mʼ ödrin e hai li benyidrin cicö uma ang:

³⁰ awe, ö u long ju hnyi drany a hnyabam, me hna, me ham ka tavat hia thithö helâ me dedrin je gethen, ke u je wâhmakhmeto je hnyekudrin; (anyin a hake u ke thibi at ame wâhmakhmeto hnyekon tavat;)

³¹ mʼ adre me ka outö u, me vheno dem ta je gethen hnyi ta je bong hia bongon anyidrin möt hon kânâ, waleji u je ham ka lakamöhmun.

³² Ke haba atkanyua a ca hanen bi lakem a Isaraela, ke e ka o ûnyi hnyi hnyei ae sâkâû ge iâm ae gan, me hnyamâm ae hwege, me benyâm adre hai; ke ödrin ka o but me hic cicö uma ang;

³³ awe, ö u long ju ethö hnyi drany wale hnyabam, me ânyâ helâ me ta je hofuc hia ame hawo u hnyin atkanyua; me me khana iâm ge ta je hnyei hia thithö eang hmeledrany, me outö u helâ me hnen lakem a Isaraela, me me khanʼ ödrin a gʼ adre hwenyi ien uma ang, wale oge ânyâ ge iâm.

³⁴ Ame ne he but lakem he ka vat me je iwahnaihmiony mödrin, hnyi je gethen hia u me he ka kunʼ ödrin hnyin, ke ödrin e he ka hic köu cicö taun ang wale u je ûca, me uma oge hia but op hobi kâu iâm:

³⁵ awe, ö u long ju ethö hnyi drany hijidrin hic me anyidrin sumat, me owisa ködrin.

³⁶ Ödrin e ne ânyâ hulo köu (anyin ae ba at ame ca ânyâ monu,) me u me hmönyâm ködrin, me hnʼ ödrin ka je iwahnaihmiony, me adre me lili ödrin a je hwenbâ ka hnyi ke hnyei ame ne sâkâû ame ne hakekeny;

³⁷ ke so bi odrin e ne ûnykûme hmetu hnyi hnyei ödrin e laba hwenbâ hnyin, me hwio thö, me khöû köu hnyi hnyei ödrin e laba hwenbâ hnyin, me ha, ka habe, Ohmun e hia but ânyâ hwakecin ae kong, me hwali, me monu;

³⁸ ödrin e ne hmetu köu ge hnyekudrin ae bekhot me hanudrin ae bekhot hnyi hnyei ödrin e laba hwenbâ hnyin, wale adre lili ödrin me hwenbâ ka hnyin, me hic cicö idrin hnyei, waleji u je ham ka lakamödrin, me taun u je ûca, me uma wale o ge ânyâ hobi kâu iâm:

³⁹ awe, ö u long ju hnyi drany, wale hnyabam, hijidrin hic me hnödrin je hna sumat, me owisa ködrin; me hna monu anyin lakem wale ödrin e monu köu.

⁴⁰ Walang ang, Khonguk lö, inya o ge me sumatö u, ö u bwela ge li emâkâm, me teve-hlöng ge li hnyikönyâm, hic adre hic hnyi dok ang.

⁴¹ Ke walang, Iehova Khong lö, todrö ka hnyi hnâm hna mokut, u me tangen hwegiâm: Iehova Khong lö, e so adre me khavâ ge ûhomeli ânyâm tavat bihut, me senyinâ hwakecin ae so ânyâm tavat ae kap.

⁴² Iehova Khong lö, ca he ka wia degecâ hnyimakan hnâm hna hû: ûnykûme thö je ibetengiö anyi Davita a athnyabaem.