II. Man Ûlabainy Je Than. 5 - Iaai Bible 1901 (New Caledonia)

¹ KE helâe adre umö ta je huliwa a ânyâ Solomona hobi kâu uma umö Iehova. Me Solomona ame odilâ thö je ûnyi a okabâ Davita a kamen; wale sileva me gol me je ûnyi hia, me ip hnyi uma omjeûiny uma umen Khong.

² Haba Solomona ame ûkhacaköuâ wahingatiny Isaraela, me je ban hia anyin je tribu, kamen ae beönua ge lakon Isaraela, Jerusalema ai, he ka hom tangen ûhihinyköu anyi Iehova ûnyi hnyi taun anyi Davita, wale Ziona.

³ Ke ame ûkhacaköu thö tavat Isaraela hia ka than hnyi bijeû, wale hnyi tehi a seveniny.

⁴ Ke ame o but wahingatiny Isaraela hia, me at Levi ödrin e vadren tang.

⁵ Ke ödrin e hom tang me ama hnân ûkhacaköu, me ta je ûnyi ae kap hia hnyi uma hnân ûkhacaköu; wale je ûnyi a hom tavat bihut a at Levi.

⁶ Ke haba Solomona than, me ûkhacaköu hia anyin Isaraela, tavat adre tha ûkhacaköu kâu hnyi hnyimakan tang, me, ödrin e hudo je mamoe me bolok a ca hnân aû ûseiny anyin ae se hia.

⁷ Ke haba tavat bihut ödrin e hom tangen ûhihinyköu anyi Iehova ka hnyi hnen, ka hnyi umen hofuc hnyi hnyin uma, wale dok ae ti kap, eû hmelen je labenyin li kerubi.

⁸ Anyin a li kerubi ödru me lau li labenyidru hon tang, ke haba li kerubi ödru me tube ethö tang me li venyâiny.

⁹ Ke ame beû li venyâ me me manen li hnyiban li venyâ hnyi tang cicö umen hofuc, ke ca manen bi eû. Ke ka eling ke ne o but hnyi bong ang.

¹⁰ Ke ba ûnyi hnyin tang ke li veto thibi ae lau waleji a ip Mose hnyin hnyi Horeba, waleji hnyi ûen Iehova ame ûhihinyköu me lakon Isaraela, hnyi ûhedrin Aigupito.

¹¹ Ke ame didrut tavat bihut ûnyi hnyi dok ae kap, (anyin adre me okabâ tavat bihut hia ae ling, kʼ ödrin e ca huliwa gaga;

¹² me at Levi minya hnyat khumung, ödrin hia, wale Asafa, me Heman, me Jeduthun, me je lakudrin, me je liamekeiny mödrin, adre khavâ mano lino, kʼ ödrin e hom je simebalo, me je nabeli, me je kitara hnyi ke keihen taben hut e deiö, ke tha ödrin me tavat bihut a wan haded ke twente ödrin e tûö trutru:)

¹³ ke haba tavat tûö trutru me tavat khumöng, me, helâ me at a khaca, he ka hai khumöng helâ me khaca thibi hofuc he ka ogânâ me ole kö Iehova; ke ödrin e fuc goranyai ge je trutru me simebalo me je ûnyi khumöngʼ me oganö Iehova, me ha, ka habe, Anyin ae so e, anyin a nyiele balua anyin ibetengiö; me haba hnyi ûen eling ame unöngötö uma ge ulâ, wale uma umö Iehova,

¹⁴ me me ca khana bi tavat bihut he ka tot me ânyâ hudrudrin, can ûlâ: anyin a unöngötö uma umen Khong ge hmanenangi Iehova.