II. Man Ûlabainy Je Than. 23 - Iaai Bible 1901 (New Caledonia)

¹ KE haba Jehoiada ame ohwegiâ e hnyi huna a seveniny, me hom je taben haded, wale Azaria nöku Jerohama, me Isamaela nöku Johanana, me Azaria nöku Obed, me Maseia nöku Adaia, me Elisafata nöku Zikeri, me ûhihinyköu mödrin.

² Keʼ ödrin e ngenu hnyi Juda, me ûkhacaköuâ at Levi hnyi je taun hia hnyi Juda, me je kamen ae beönua hnyi Isaraela, me ödrin e tha o hnyi Jerusalema.

³ Ke haba ûkhacaköu hia ödrin e ûhihinyköu me than hnyi uma umen Khong. Me e ame ha ködrin, ka habe, Wâ bi, ame he nokon than ka musi helâji me hnö Iehova hna ha ge laku Davita.

⁴ Walang ûnyi öbun e he ka ânyâ: ke haba ke keihen gabun a kuniny hnyat adre me didro hnyi sabath, tavat bihut me at Levi, me hamöbun he ka tuö je hwanuma;

⁵ ke hamen ke keihen a kuniny ka laba hnyi uma umen than; me ke ke keihen a kuniny biju hnyi homagouleny taben: ke ame he ka hnen hnyi hnyeuleny uma umö Iehova tavat hia thithö.

⁶ Ke ba at ame he ka dit hnyi uma umö Iehova, e so thibi tavat bihut, me tavat huliwa a at Levi; bamödrin he ka dit, anyin a ödrin tavat ae kap: ke hamen tavat hia he ka tuö huliwa anyi Iehova.

⁷ Ke hamen at Levi he ka walö igigilo than, ödrin e ve hom je ûnyi hnân vat; ke ame ne he ke at bi he ka dit ka hnyi uma umö Iehova, me adre me he ka hlingâ: ke öbun e he ka tha e me than e ka didro me didrut.

⁸ Me haba at Levi me Juda hia ödrin e anyâ helâ me hna hûna ga Jehoiada at bihut: ke ödrin e ve hom tavat gadrin, wale tavat adre me he ka didro hnyi sabath, tha ödrin me tavat adre me be ka didrut hnyi sabath; anyin a ca oveseâ je dö hnö Jehoiada.

⁹ Ke haba Jehoiada at bihut ame ham ka je taben haded je ö, me je bec, me je bec ae gan anyi Davita than a e hnyi uma umen Khong.

¹⁰ Me e ame otilâ tavat hia unyin than igigilo, ke ve hu ûnyi vat hnyi hnyamödrin, hwân hnyi ke keihen metân uma ke ne o but hnyi ke keihen meny uma, me baten taben hut.

¹¹ Me ödrin e hom nokon than, me obicâ e ge korona, me ham kâu ûnyi hnân ohnatho, me otilâ e ka than: ke haba Jehoiada me lakon ödrin e hû e; me ödrin e ha, ka habe, E so e möt than.

¹² Kʼ a löng ut Athalia hwan tavat adre me wadring me oganâ than, me e ame he ka tavat hnyi uma umö Iehova:

¹³ me e ame bwele, me wâ bi, ame tot than hnyi anyin tap hnyi hwanuma, ke tha e me than je taben me je trutru; ke ame senyin tavat hia aten hnyei, me tûö je trutru; ke tavat khumöng ödrin e ânyâ je ûnyi khumöng, me hai je khumöng hnân oganâ. Me haba Athalia ame kia anyin je ûkhaû, me ha, ka habe, Ûhûgûnö dokhu, ûhûgûnö dokhu but ang.

¹⁴ Haba Jehoiada at bihut ame hom je taben haded, tavat muso utbavat, me ha ködrin, ka habe, Hom but momo wanben li deo at; ke haba at ame he ka he hoton, adre me he ka hlingâ ge hele vat: anyin ame ha at bihut, ka habe, Ca he ka hlingâ momo hnyi uma umö Iehova.

¹⁵ Me ödrin e hne deny momo; me e ame he ka hnyi uma umen than hnyi gethen deny homagouleny je hors: ke ödrin e hlingâ momo eling.

¹⁶ Haba Jehoiada ame ânyâ anyin ûhihinyköu me tavat hia me than, mʼ ödrin e lakei Iehova bi.

¹⁷ Ke haba tavat hia ödrin e he ka hnyi uma umö Baala, me kia e, me thö omomono je taben hut kâu, me je hna theatâ, me hlingö Matana at bihut anyi Baala cicö je taben hut.

¹⁸ Ke haba Jehoiada ame khenâ huliwainy uma umö Iehova ka tavat bihut a at Levi, waleji Davita ame ve ip hnyi uma umö Iehova he ka hudo je hudiny leû kö Iehova, helâ me hna sihnalimen hnyi tusiny hnanyibu anyi Mose, adre me senyin me khumöng, helâ me Davita ame hûna.

¹⁹ Me e ame ip tavat tuö hwanuma hnyi je homagouleny uma umö Iehova, wâ e nye didro at a bo kong ge ke ûnyi.

²⁰ Ke e ame hom je taben! haded, me je than, me tavat muso tavat, me aten hnyei hia, me hom than ûnyi hnyi uma umö Iehova: ke ödrin e gethen ûnyi hnyi homagöule ethö ka hnyi uma umen than, me ip than hon theroniny dokhu.

²¹ Me ame senyin tavat hia aten hnyei, me ame laba wia taun; kʼ adre hlingö Athalia ge hele vat.