II. Man Ûlabainy Je Than. 22 - Iaai Bible 1901 (New Caledonia)

¹ KE haba aten Jerusalema adre me otilö Ahazia a nokon a wakeiat hmonyin ka than hwaban: anyin a hia but hlingâ je tuhan hia hnen deo vat adre tha o me at Arabia ka hnyi hna hunuma. Me Ahazia nöku Jorama than Juda ame musi

² Fâte tu je hunai Ahazia hnyi ûen e ame hwân ka than; ke e ame musi hnyi Jerusalema khaca huna: ke haba ien hinyen, me, Athalia momo nöku Omeri.

³ Ke e ame vheno minya gethen deny lap anyi Ahaba: anyin a hinyen ame labö ûsabö më he ka ânyâ ûnyi ae kong.

⁴ Ke e ame ânyâ hulo hnyi hnyimakö Iehova, helâ me lap anyi Ahaba: anyin a ödrin je hnyat ûsabö më hwaban mok anyin kamen, me e ame kong ut.

⁵ E ame vheno minya anyidrin ûhnenamö, me tha he me Jorama nöku Ahaba than Isaraela he ka vat me Hazaela than Suria hnyi Ramothe-gileada: ke ame aat dö Jorama ge at Suria.

⁶ Ke e ame hmetu Jezerela ai he ka bi anyin je aat, wale hnân je aat hnyi Rama waleji e ame vat me Hazaela than Suria. Ke haba Ahazia nöku Jorama than Juda ame he he ka û Jorama nöku Ahaba hnyi Jezerela, anyin a e mok.

⁷ Ke ûnyi ge Khong mok anyi Ahazia, can e ame he kö Jorama: anyin a e ame o but, me e ame tha he me Jorama ka vat me Jehu, nöku Nimesi, at ame hû ga Iehova he ka subâ degecâ lap anyi Ahaba.

⁸ Ke haba Jehu ame tiga bi hwaban lap anyi Ahaba, me e ame wâ a gʼ ame bi athnyabai Ahazia hnen je tuhan Juda me lakon je liamekeiny me Ahazia, me e ame hlingʼ ödrin.

⁹ Me e ame elöm Ahazia, ke ödrin e kât e, (ke e ame ikhölö hnyi Samaria), me adre me hom e kö Jehu, me hlingâ e; ke ödrin e konâm e, anyin a haingödrin, ka habe, E nöku Jehosafata, at ame elöm Iehova ge hnyekon ae bekhot. Ke ba hmetu bi maniny lap anyi Ahazia he ka kât dökhu.

¹⁰ Ke a wâ but Athalia hinyö Ahazia a ga mokcu nokon, me e ame todrö me hlingâ je mâtrâniny lap hia anyin than Juda.

¹¹ Ke haba Joseba momo nokon than, ame hum Joasa nöku Ahazia, me hom duöngâ ûnyi hnyi lakon than adre me hlingâ, me tha ip e me at ame hat hnyi hnyeule mokut. Me Joseba momo nöku Jorama than, öiö Jehoiada at bihut, (anyin a e hani Ahazia) ame ikhâlâ e ga Athalia, me me ca hlingâ e hnen momo e.

¹² Ke e ame laba unyidrin hnyi uma umen Khong, kʼ ame luba-duöng hnyi siks ta huna: ke Athalia ame musi hnyi hnyei.