II. Man Ûlabainy Je Than. 2 - Iaai Bible 1901 (New Caledonia)

¹ KE haba Solomona ame ûnykûme he ka op uma hobi kâu iö Iehova, me ke uma hnân dokhon dokhu.

² Ke Solomona ame aû tavat a ödrin sevente thauzan tavat sukhöûnâ, ke eite thauzan tavat si utö hnyi je bucen, ke theri thauzan ke siks haded tavat tuʼ ödrin.

³ Ke haba Solomona ame ukhûnöng kö Hirama thaniny Turo, he ka ha, ka habe, U me he ka ânyâ könya, helâ me hnâm hna ânyâ kö cica Davita, me hmâ kân je arasi hnân op umen uma hnân laba hnyin.

⁴ Wâ bi, inya oge me op uma hobi kâu iö Iehova Khonguk, he ka okabâ kâu, me he ka leû utö ae bo so hnyi hnyimakan, me hnân hobi kâu bala thibut areto hnân omanenâ me je hudiny leû hnyi je hnyomakatu me sahac, hnyi je sabath, me je tehi ae teb ûnyi, me je bijeû adre thu anyi Iehova Khonguhmun. Wale hna otilâ ka at Isaraela nyiele balua.

⁵ Ke e gan hmâ uma oge me op, anyin ae beönua Iehova Khonguhmun hon ta je khong.

⁶ Ke ie at ae khana he ka op uma hobi kâu, anyin ae ca ûcû kâu drany me draniny ta je drany? ke iny ia, me inye he ka op uma hobi kâu, ke so bi he ka leû utö ae bo so thibi hnyi hnyimakan?

⁷ Walang ang kunâ thö könya at ae metâ he ka huliwan gol me sileva, me bras, me fao, me udrudrâ hlit, me dra vec, me udrudrâ, me at ae khana he ka khavi hnalimen, he ka tha e me tavat ae metâ eang unyik hnyi Juda me Jerusalema, waleji a penapena ga cica Davita.

⁸ Kunâ minya ju könya je ûö arasi, me kop, me alemuga, ûheny Lebanona; ke wâ bi ame he ka tha he lathnyabaik me lathnyabaem,

⁹ wale he ka penapena hobi könya je utö ae se: anyin ae ti gan hmâ uma oge me he ka op.

¹⁰ Ke wâ bi, oge me he ka ham ka lathnyabaem a hnyat si utö je tulut hwit adre kokot a twente thauzan, ke twente thauzan je tulut bali, ke twente thauzan je bath waina, ke twente thauzan je bath wakaco.

¹¹ Me haba Hirama than Turo ame thu hnyi tusi a kunâ kö Solomona, ka habe, Anyin a Iehova ame betenge ge lakeiny, me ame otilö u he ka tuhödrin.

¹² Haingö Hirama minya, ka habe, E so adre me ole kö Iehova. Khongu Isaraela, at a op drany me hmele drany, at a ham nokon ae metâ kö Davita than, at wâhmakhmeto, me wâ ûnykûme, me me op uma hobi kö Iehova, me uma hobi kâu dokhon dokhu.

¹³ Ke walang ang oge me kunâ ke at a aten cica Hirama, at ae metâ, me wâhmakhmeto,

¹⁴ nokon momo Dana, ke at Turo kamen, at ae khana he ka huliwan gol, me sileva, me bras, me fao, me veto, me utö, me udrudrâ hlit, me udrudrâ, me lino ae ûhnyûkong nân, me dra vec; me he ka khavi hnalimen, me ûnykûme wia ta je ûnyi adre me hna kâu: me ame he ka tha e me lakem ae metâ, me hnyat ae metâ lakei Davita than a kamâm.

¹⁵ Ke walang ang tuhok lö, e so u ma kunâ jem ka lathnyabaem hwit, me hale, me wakaco, me waina, waleji u je ha:

¹⁶ ke ohmun e he ka si utö hnyi Lebanona hoton wem: kʼ ohmun e he ka mâtâ eû hnyi köiö Jopa ai köu bi; ke u me he ka hom Jerusalema ai.

¹⁷ Ke Solomona ame aû ta je atkanyua hia hnyi hnyei Isaraela, hwaban hna öû ödrin ga Davita a kamen; kʼ adre ō ödrin a wan haded ke fifte theri thauzan siks haded tavat.

¹⁸ Ke ame otilâ sevente thauzan gadrin he ka sukhöûnö ûnyi, ke eite thauzan he ka si utö hnyi je bucen, ke theri thauzan ke siks haded he ka muso tavat huliwa.