II. Man Ûlabainy Je Than. 18 - Iaai Bible 1901 (New Caledonia)

¹ KE e gan hmâ omjeû me hmanenangi Jehosafata; ke e ame liameûngon me Ahaba.

² Ke hwaban ke je huna, me e ame he Samaria ai kö Ahaba. Ke Ahaba ame hlingâ ta je mamoe me kau ae se hobi kâu me anyin bunyen, me siwhegiâ e he ka tha he Ramothe-gileada ai.

³ Ke haba Ahaba than Isaraela ame ha kö Jehosafata than Juda, ka habe, Hawa, otu ma tha he Ramothe-gileada ai? Haingen, ka habe, Iny ûcû möu ke ûcû lakeik me lakem; otin a tha he ka vat.

⁴ Ke haingö Jehosafata ka than Isaraela, ka habe, Me hnö unyi Iehova hnyi bong ang.

⁵ Me haba than Isaraela ame ûkhacaköuâ ta je perofeta a ödrin foa haded, me ha ködrin, ka habe, Hawa, ohmun e he ka he Ramothe-gileada ai he ka vat, ame ne ba? Me ödrin e ha, ka habe, He thö; kʼ ame he Khong ka hna e ka hnyi hnyamen than.

⁶ Me haingö Jehosafata, ka habe, E ba hmetu ke perofeta eang anyi Iehova, mʼ otin e he ka hnö minya e?

⁷ Ke haingen than Isaraela kö Jehosafata, ka habe, Khaca biju at otin e he ka hnei Iehova a deny e: ke hûkötianök e; anyin a e ame ca labö perofeta so gak bala, ke kong bi: wale jia Mikaia nöku ʼ Imela. Me haingö Jehosafata, ka habe, Than lö, ca ha helâe.

⁸ Me than Isaraela ame hawâ ke eunuka, me ha, ka habe, Ie he thö ka hawo Mikaia nöku Imela.

⁹ Ke haba than Isaraela me Jehosafata than Juda ödru me ve laba hon anyidru li theron, adre khavâ je ûkhaû, ke ödru me laba hnyi dok ae ba ûnyi hnyin hnyi hna didro ka hnyi homagouleny Samaria; ke haba ta je perofeta hia ödrin e perofeta hnyi hnyimakodra.

¹⁰ Ke haba Zedekia nöku Kenaana ame ânyâ li faoiny meno a fao bi, me ha, ka habe, Walang hna ha hnö Iehova, ka habe, U me he ka hagutâ at Suria ge li ûnyi ang ke ne o but ame hiʼ ödra bi.

¹¹ Ke haba ta je perofeta hia ödrin e perofeta helâe, me ha, ka habe, He thö Ramothe-gileada ai, me hnahic: anyin ame he Iehova ka hna e ka hnyi hnyamen than.

¹² Ke haba ûthumetu at a he ka hawo Mikaia ame ha kâu, ka habe, Wâ bi, haba ifucin je perofeta ödrin e omanenâ so ka than ge hnyem a khaca: e na so minya ju hwâm hofuc helâ me hodrin, me u ma he ka fuc so.

¹³ Me haingö Mikaia, ka habe, Kia inya Iehova, ke haba hofuc ame he Khonguk ka ha, me oge me he bi nya ka ha.

¹⁴ Kʼ ame o but e ka than, me than ame ha, ka habe, Mikaia lö, hawa, ohmu me he ka he Ramothe-gileada ai he ka vat, ame ne ba? Ke haingen, ka habe, He thʼ öbu, me hnahic; kʼ adre me he ka hnödrin ka hnyi li hnyamöbu.

¹⁵ Ke haingen kâu than, ka habe, Hawa oge me he ka ibi ove ha köu a u ma ca ha könya ke hofuc ke hnathu thibi hnyi iö Iehova î

¹⁶ Ke haingen, ka habe, Oge me wâ but at Isaraela hia adre me ve avâ but hon je bucen helâ me je mamoe ae ba at ame tuö: ke haingö Iehova, ka habe, E ba tuhan tavat eang; ve hmetu ju ödrin ka hnyi je hnyabadrin me hnahic.

¹⁷ Haba than Isaraela ame ha kö Jehosafata, ka habe, Awe, oge ca ha köu a e ame ca he ka perofeta so gak, ke ûnyi bi ae kong?

¹⁸ Ke haingö Mikaia, ka habe, Anyin a wale long ju hofuc ho Iehova: oge ō Iehova but ame laba hon anyin theron, ke ame ûtitilen je dö hnyi drany hnyi ke keihen metâ me meny.

¹⁹ Ke haba Iehova ame ha, ka habe, Ie at ame he ka cubic Ahaba than Isaraela, me me he ka hnyi Ramothe-gileada? Me ame ha helâng ke at, ke helâe ke at.

²⁰ Me ame he but ke hanu me tot hnyi hnyimakö Iehova, me ha, ka habe, Oge me he ka cubec e. Ke haingö Iehova kâu, ka habe, Ame he ka kâmâu?

²¹ Haingen, ka habe, Oge me he ka he but, ke oge me he ka bi hanu ae thoi hnyi hnyimen ta je perofeta hia. Haingen, ka habe, U me he ka cubec e, kʼ u me he ka tom: he but, me ânyâ helâe.

²² Ke walang ang, wâ bi, a hia but Iehova ip hanu ae thoi hnyi hnyimen ânyâm ta je perofeta eang; ke a hia but Iehova ha ûnyi ae kong gam.

²³ Haba Zedekia nöku Kenaana ame hakekenyâ, me khaû wahicö Mikaia me ha, ka habe, A deny ua hanu Iehova ûheny unyik he ka ha bi köu?

²⁴ Ke haba Mikaia ame thu, ka habe, Wâ bi, u me he ka wâ hnyi bong u me he ka kec ka hnyeule eiö hnyin he ka lubaduöng.

²⁵ Haba than Isaraela ame ha, ka habe, Hum Mikaia thö, me hom e kö Amona at ame muso taun, me Joasa nokon than;

²⁶ me ha, ka habe, Walang hna ha hnen than, ka habe, Ip ju e hnyi uma ceat, me han ge aretoiny vec, me köiöiny vec, ke ne o but oge me o me hnahic,

²⁷ Haba Mikaia ame ha, ka habe, U je ne he ka o me hnahic awe, a ca ha Iehova a deny inya. Ke haingen, ka habe, Long ju öbun tavat hia.

²⁸ Haba than Isaraela me Jehosafata than Juda ödru me he Ramothe-gileada ai.

²⁹ Me haingen than Isaraela kö Jehosafata, ka habe, Oge me he ka oiyongi nya bi, me hnyi vat; ke u me he ka khavâ ânyâm je ûkhaû. Me than Isaraela ame oiyongâ e bi, me e ame hnyi vat.

³⁰ Ke haba than Suria ame hûna ka je taben anyin je kariota, ka habe, ca he bi ka vat me tavat ae ûhnûykong me gan, ke hake than Isaraela thibi.

³¹ Ke haba je taben kariota ödrin e ö Jehosafata, me ödrin e ha, ka habe, Wale but ang than Isaraela. Anyin a wale ödrin e saû kâu he ka kot: ke haba Jehosafata ame hongot goranyai, me Iehova ame hadruâ e; ke Khong ame ohmetu ödrin gan.

³² Ke ame wâ ge je taben kariota a ca than Isaraela, me ödrin e hna but.

³³ Ke haba ke at ame hlec mono anyin fana, me ame aat dö than Isaraela hnyi wanben hna hûjâ ûkhaûen vat: me e ame ha ka at ame owisa anyin kariota, ka habe, Saû but, me hum nya ûhek hnyi vat, anyin a oge aat dö.

³⁴ Ke e gan tot vat hnyi bong eling: ke so bi haba than Isaraela ame otilâ e bi hon kariota cicö at Suria ke ne o but sahac: me ame mokcu hnyi ûen ame dit seûno.