II. Man Ûlabainy Je Than. 16 - Iaai Bible 1901 (New Caledonia)

¹ HABA hnyi huna a thote siksiny musi anyi Asa, haba Baasa than Isaraela ame he but ka vat me Juda, me op Rama, me me ca khana ke at he ka didrut me didro kö Asa than Juda.

² Haba Asa ame hom sileva me gol ûnyi hnyi uma omjeû hnyi uma umö Iehova me uma umen than, me kunâ kö Ben-adada than Suria, at ame laba hnyi Damaseko, me ha, ka habe,

³ E hu anyitu ûhihinyköu, ke helâ minya lakamötu: wâ bi, inya oge me kunâ köu sileva me gol; he thö ka subâ degecâ ûhihinyköu me Baasa than Isaraela, me me he but gak.

⁴ Haba Ben-adada ame ling Asa, me kunâ anyin je taben vat ka vat me je tauniny Isaraela; me ödrin e kot Ijon me Dana me Abel-maima, me je tauniny ip omjeû hnyi Nafatali.

⁵ Kʼ a long ut Baasa, me e ame hna degecâ he ka op Rama, ke e ame umö ju anyin huliwa.

⁶ Ke haba Asa than ame oc at Juda hia; me ödrin e sukhöûnâ je veto me utö hnyi Rama, waleji a op Baasa; ke e ame hom hnân op Geba me Mizepa.

⁷ Haba hnyi ûen eling ame o but Hanani at wâ kö Asa than Juda me ha kâu, ka habe, Anyin a u je hia but labageju ka than Suria, me ca labageju kö Iehova Khongom, anyin a wale a haûhaû but gam utbavat anyin than Suria.

⁸ Hawa, e ca utbavat ae gan hmâ hmonyin at Aithiope, me Lubi, me se hia hmonyin je kariota me tavat tabô hors? ke so bi anyin a u je labageju kö Iehova, me e ame hnʼ ödrin ka hnyi hnyamâm.

⁹ Anyin ame labö ngele mweimwei li emakö Iehova hnyi hmeledrany hia, he ka hadruâ tavat ae bekhot ut je hnyekudrin kâu. U je hwen monu hnyi ûnyi ang; anyin a hwân hnyi ûen ang u me he bala ka labö vat.

¹⁰ Me ame hmonyin Asa ka at wâ, me ip hnyi uma ceat; anyin a e ame hmonyin kâu can hofuc e. Ke Asa ame ovecâ keihen tavat hnyi ûen eling.

¹¹ Ke wâ bi, haba ta je ûnyi a ânyâ Asa, a bân me a biliny, wâ bi, adre hia but sihnalimen hnyi tusiny je than Juda me Isaraela.

¹² Ke haba hnyi huna a thote naininy musi anyi Asa, me, e ame moko li can; ke ti gan anyin mok: ke so bi e ame ca elöm Iehova hnyi anyin mok, ke je at bi tren bubuny.

¹³ Ke a mokut ut Asa tha e me lakamen, kʼ ame mok hnyi huna a fâte waniny anyin musi.

¹⁴ Me adre me konâm hnyi anyin hing erkemok waleji e ame hia but thu hnân hobi kâu e bi hnyi taun anyi Davita, me ip ju e hnyi hnen hna mokut dok adre öunongöta ge basama, me ke je ûnyi adre me ûhaniken hoton metâiny at ame huliwan je bubuny ke gan hmâ hnödra hna leû utö ae bo so hobi kâu.