II. Man Ûlabainy Je Than. 15 - Iaai Bible 1901 (New Caledonia)

¹ KE ame o but hanon Khong kö Azaria nöku Obed:

² me e ame he ka ûkhanö me Asa, me ha kâu, ka habe, Asa lö, long ju öbun könya, Juda me Beniamina hia: e bala bi Iehova unyibun hnyi ûen öbun e tha öbun më; ke öbun e ne elâm me öbun e he ka wâ e; ke öbun e ne degec, me e ame he ka digic öbun minya.

³ Ke se hia je bong ae ca hu Khong ae hnathu unyin at Isaraela, ke ba at ûne a at bihut, ke ba hnanyibu:

⁴ ke so bi hnyi ûen ödrin e hmetu kö Iehova, Khongu Isaraela hnyi anyidrin vec, me elâm e, awe ödrin e wâ e.

⁵ Ke haba hnyi je bong eling me ba hnahic ka tavat adre me didrut me didro, ke gan hmâ vec ködrin hia a aten ta je hnyei.

⁶ Ke ödrin e hmouca but, kʼ ame iwahnaihmiony ke hnyei me ke hnyei, me ke taun me ke taun: anyin a Khong ame bwebweli ödrin ge ta je vec hia.

⁷ Ke hwege thʼ öbun, ke ca ohimö je hnyamöbun; anyin adre me he ka bi hwaban anyibun huliwa.

⁸ Ke a hia but Asa long je hofuc eling, me hna perofeta hnö Oded a perofeta, me e ame hwege me ohia ta je ûnyi ae ikiki ûnyi hnyi hnyei Juda me Beniamina hia, me je taun e ame hûgûnâ hnyi hnyei ae hut hnyi Eferaima; ke a ame ânyâwia taben hut anyi Iehova, cicö poretiko anyi Iehova.

⁹ Ke e ame ûkhacaköuâ at Juda me Beniamina hia, me je atkanyua unyidrin ûhedrin Eferaima, me Manase, me Simeona: anyin ae se hia at Isaraela adre me utut unyin, hnyi ûen ödrin e wâ a Iehova Khongon ame tha e më.

¹⁰ Me ödrin e ûkhacaköu hnyi Jerusalema hnyi tehi a kuniny, hnyi huna a fiftininy musi anyi Asa.

¹¹ Ke ödrin e hudo kö Iehova hnyi bong eling ke je ûnyi adre me sö, wale ödrin e hom, seven haded je bolok, ke seven thauzan je mamoe.

¹² Ke ödrin e ûhihinyköu he ka elöm Iehova Khongon lakamödrin ge hnyekudrin ae bekhot me hanudrin ae bekhot;

¹³ ke haba at ama höcö elöm Iehova Khongon Isaraela me adre me he ka hlingâ, ame ne ûhnyûkong ame ne gan, ame ne baga ame ne momo.

¹⁴ Ke ödrin e khemanyin kö Iehova ge hwan ae gan, me hongot, tha e me je trutru me sofara.

¹⁵ Ke haba at Juda hia ödrin e senyinâ hna khemanyin: anyin ödrin e khemanyin ge hnyekudrin ae bekhot, me elâm e ge wedrin ae bekhot; me ödrin e wâ e: ke haba Iehova ame omenʼ ödrin igigilo.

¹⁶ Ke haba Maaka hinyö Asa than, me e ame wia degecâ e me me ca momo than hmetu, anyin a e ame ânyâ hna theati Aseira; ke Asa ame sö degecâ idola anyin momo, me oamamâ e, me thong degecâ hnyi wagewe Kederon.

¹⁷ Ke adre ca hom degecâ je dok ae gorany hnyi Isaraela: ke so bi, e wisa hnyeku Asa, hnyi bongon je bong hia.

¹⁸ Ke e ame odilâ ka hnyi uma umen Khong ta je ûnyi a okabâ kamen, me ta je ûnyi a ka okabâ, sileva, me gol, me ta je kaia.

¹⁹ Ke ba hmetu vat ke ne o but hnyi huna a thote faiviny musi anyi Asa.