II. Man Ûlabainy Je Than. 13 - Iaai Bible 1901 (New Caledonia)

¹ KE haba hnyi huna a eitini Jeroboama than, me ame hwân Abia ka than hnyi Juda.

² E ame musi hnyi Jerusalema hnyi kun ta huna: ke haba ien hinyen, me, Mikaia momo nöku Uriela at Gibea. Ke ame vat Abia me Jeroboama.

³ Ke haba Abia ame hnyi vat tha e me anyin deo vat wale tavat vat ae hwege, ödrin foa haded thauzan tavat adre ûca: ke Jeroboama ame otilâ metâ vat mʼ adre me vat më haba lahien ödrin eit haded thauzan tavat adre ûca, tavat hwege.

⁴ Haba Abia ame tot hon bucen Zimeri, wale hnyi hnyei ae hut hnyi Eferaima me ha, ka habe, Jeroboama lö, me Isaraela hia, long ju könya;

⁵ hawa, adre ca omanenâ köbun a haba Jehova Khongu Isaraela ame ham dökhuiny Isaraela kö Davita nyiele balua, kâu me je mâtrâniny ge ûhi-hinyköuiny sâlt?

⁶ Ke so bi a hia but Jeroboama nöku Nebata athnyabai Solomona nöku Davita tot me ûkhin fuc ka tuhan.

⁷ Ke a hia but ûkhacaköu kâu tavat ae monu, je atö Belial, wale ödrin e ohwegiʼ ödrin bi kö Reoboama nöku Solomona, ke tiga hidröu Reoboama, me tiga but hnyekon, ke ca khana bi he ka hlic ödrin.

⁸ Ke walang ang öbun e ûnykûme he ka hlec dokhu dokhu Iehova unyin je laku Davita; ke öbun se hia hmonyin, ke e unyibun li nokon kau gol wale a ânyâ Jeroboama hobi köbun hnân li khong.

⁹ Hawa öbun e ca hia but obâ tavat bihut kö Iehova, je mâtrâni Arona, me at Levi, me otilâ tavat bihut hobi köbun hoton hwakecin aten ke je hnyei? me me a ne he ke at ka tha e me nak bolok me seven ta je mamoe baga hnân okabâ e bi, me e ame he ka at bihut ka at a ca khong bi.

¹⁰ Ke haba ohmun, me, Khonguhmun Iehova, ke ohmun e ca hna degecâ; ke haba tavat bihut ödrin e huliwa kö Iehova unyihmun, me, ödrin je mâtrâni Arona, me at Levi hnyi je hanymodrin:

¹¹ ke ödrin e le kö Jehova je hut me je utö ae bo so hnyi je hnyomaktu me sahac: ke ödrin e ip gaga areto hnân omanenâ hon laulau gol ae so; me taben lamepa gol me je lamepainy he ka möt hnyi je sahac: anyin a ohmun e tuö huliwa anyi Iehova Khonguhmun; ke öbun e hia but hna degecâ.

¹² Ke wâ bi e unyihmun Khong me ban kohmun, me anyin tavat bihut me je trutru ame fuc haten ot, he ka tûâ haten ot gabun. Lakon Isaraela lö, ca vat bi me Iehova Khongon lakamöbun; anyin öbun e ca he ka hnahic.

¹³ Ke haba Jeroboama ame ikhâlâ ke vat hotudrin; ke haba ödrin e tot hnyi hnyimakan at Juda, ke vat adre ikhâlâ hotudrin.

¹⁴ Kʼame bwele hotudrin ai at Juda, me wâ bi, e but vat hnyi hnyimaködrin me hotudrin: me ödrin e tenge kö Iehova, ke haba tavat bihut ödrin e tûâ je trutru.

¹⁵ Me haba at Juda ödrin e hongot hwege; ke ame tiga hongot at Juda, me haba Khong ame kuc Jeroboama me Isaraela hia hnyi hnyimakö Abia me Juda.

¹⁶ Ke haba lakon Isaraela ödrin e kec ge at Juda: ke Khong ame hnʼ ödrin ka hnyi hnyamödrin.

¹⁷ Ke haba Abia me lakeiny ödrin e kuc ödrin, ke gan hmâ hna hlingʼ ödrin: ke ame ta but a mokcu hnyat a faiv haded thauzan at Isaraela, hnyat adre ûca.

¹⁸ Me adre me hom ûhnyûkongo at Isaraela hnyi ûen eling, ke hwege but at Juda, anyin a ödrin e labageju kö Jehova Khongon lakamödrin.

¹⁹ Ke Abia ame hnu Jeroboama, me hûgûnâ gan je taun, wale Beth-ela me je tauniny, me Jesana me je tauniny, me Eferona me je tauniny.

²⁰ Kʼ ame ca hwege hmetu bi Jeroboama hnyi ta je bong bongu Abia: ke Jehova ame kot e me ame mokcu.

²¹ Ke ame hwege tot Abia, me e ame hok je momo a fotin me laâiân, me hnokoâ twente tu lakon je baga, ke sikstin lakon je in.

²² Ke haba kolon je hna ânyâ hnö Abia, me ta je hwakecin, me hwan ta je hofuc, me, adre hia but sihnalimen hnyi tusiny hna omanenâ ta je ûnyi a set hnö Ido a perofeta.