II. Man Ûlabainy Je Than. 12 - Iaai Bible 1901 (New Caledonia)

¹ KE adre hia but ohmâ dokhon dokhu Reoboama kʼ ame hwege but, me e ame hna degecâ hnanyibu anyi Jehova tha e me Isaraela hia.

² Ke haba hnyi huna a thabûngi Reoboama than, me ame o but Sisaka than Aigupito Jerusalema ai he ka vat, anyin ödrin e ânyâ hwakecin ae kong kö Jehova,

³ me je kariota a twelv haded, me tavat tabô horse a sikste thauzan: ke ca hnân bi aû tavat adre me tha he më ûheny Aigupito; a at Lubi, me Suki, me Aithiop.

⁴ Ke e ame hûgûnâ je taun adre up haginy anyin at Juda, me o hnyi Jerusalema.

⁵ Haba Semaia a perofeta ame o kö Reoboama, me je taben hnyi Juda a hnyat ûkhacaköu hnyi Jerusalema ga Sisaka, me ha ködrin, ka habe, Walang hna ha hnö Jehova, ka habe, Öbun e hia but digic nya, anyin a wale oge hia but hna degeci öbun bi ka hnyi hnyamö Sisaka.

⁶ Me ame oûhnyûkongu ödrin bi je taben hnyi Isaraela me je than, me haingödrin, ka habe, E wisa Jehova.

⁷ Ke a wâ but Iehova a ödrin e oûhnyûkongi ödrin bi, me ame o but hofuc ho Iehova kö Semaia, ka habe, Ödrin e oûhnyûkongi ödrin; awe, oge me ca he bi nya ka ohiʼ ödrin: ke so bi oge me he ka omi omeli ödrin, kʼ adre me ca he ka hingâlâ anyik hmonyin ka hnyi hon Jerusalema a deny Sisaka.

⁸ Ke so bi ödrin e he ka bi lathnyabainy; me me khanʼ ödrin bi anyik huliwa, me huliwainy je dökhuiny ta je hnyei.

⁹ Ke ame o but Sisaka than Aigupito ka Jerusalema, me hom je omjeûiny uma umö Iehova, me uma umen than; e ame hom hia thibut: kʼ ame hom minya je bec gol waleji a ânyâ Solomona.

¹⁰ Haba Reoboama than ame ânyâ je bec bras me hwaban, me hna but e ka taben tavat tue, tavat adre me tuö hwanumen uma umen than.

¹¹ Ke haba hnyi je ûen ame didro than ka hnyi uma umö Iehova, me ame o but tavat tue me hom je bec, ke ödrin e hom hmetu bi ka hnyi hnyeuleny tavat tue.

¹² Ke e ame ka oûhnyûkongo e bi, me ame hwio ûnyi gan hmonyin anyi Iehova, me e ame ca ti ohia e: ke haba khaca e hu ta je ûnyi ae so adre me wâ hnyi Juda.

¹³ Ke haba Reoboama than ame ohwegiâ e bi hnyi Jerusalema, kʼ ame musi bi: ke fâti wan je hunai Reoboama hnyi ûen e ame hwân ka musi, ke seventiny je huna e ame musi hnyi Jerusalema, wale taun a ûca ga Iehova ûnyi hnyi ta je tribu hia hnyi Isaraela, he ka ip hnyin ien: ke haba ien hinyen, me, Naama momo Amona.

¹⁴ Ke e ame ânyâ hulo, anyin a e ame ca penapena hnyekon ke ka elöm Iehova.

¹⁵ Ke haba je hna ânyâ hnö Reoboama a bân me biliny, hawa, adre ca sihnalimen hnyi tusi anyi Semaia a perofeta, me Ido at wâ, hoton bongon je dö? Ke haba Reoboama me Jeroboama ödru me labö vat hnyi je bong.

¹⁶ Ke ame tha mokut ut Reoboama me lakamen, me adre me konâm e hnyi taun anyi Davita: ke ame than biju Abia a nokon hwaban.