II. Man Ûlabainy Je Than. 10 - Iaai Bible 1901 (New Caledonia)

¹ KE Reoboama ame he Sekema ai: anyin ame o but hnyi Sekema Isaraela hia he ka otilâ e ka than.

² Kʼ a long ut e Jeroboama nöku Nebata, (anyin a e hnyi Aigupito waleji e ame kec ka hnyin ga Solomona than) me haba Jeroboama ame o hmetu ûheny Aigupito.

³ Me ödrin e ûkhûnöng me hawâ e; ke haba Jeroboama ame tha o me at Isaraela hia, me ödrin e ha kö Reoboama, ka habe,

⁴ Haba kâmâm ame ohmâkâ ûnyi hnân ûhûkâlâköuâ humun: ke walang ang, e so u me be ka ohâhâ huliwa anyin kâmâm ae vec, me ûnyi hnân ûhûkâlâköuâ ae hmak e ame ip huhmun, me ohmun e he ka bi athnyabaem.

⁵ Haba e ame ha ködrin, ka habe, Hmetu thö könya hwaban kun ta bong. Me ame vese thö tavat.

⁶ Haba Reoboama ame ûhnenamö me je hingat, tavat adre me tot hnyi bnyimakö Solomona a kamen ke tiga möt, me ha, ka habe, Ie hofuc öbun e ûnykûme he ka thu ka tavat ang?

⁷ Ke hain-gödrin kâu, ka habe, U je ne he ka menyik ka tavat ang, me osenyini ödrin, me ha ködrin je hofuc ae so, ödrin e ne ka bi athnyabaem hnyi je bong hia thibut.

⁸ Ke e ame degec hofuc hwan wahingat ödrin e ûhnenamö, me e ame ûhnenamö me je hidröu tavat a tha dö mö, ödrin e tot hnyi hnyimakan.

⁹ Ke haingen ködrin, ka habe, Ieû anyibun ûhnenamö, mʼ adre me he ka thu ka tavat ang, ödrin e fuc könya, ka habe, Ohâhâ thö ûnyi hnân ûhûkâlâköuâ waleji a ip kâmâm huhmun?

¹⁰ Me ame ha kâu je hidröu tavat a tha dö mö, ka habe, Walang hofuc u me he ka ha ka tavat ang, ödrin e fuc köu, ka habe, Haba kâmâm ame ohmâkâ ûnyi hnân ûhûkâlâköuâ huhmun, ke u me he ka ohâhâ e huhmun; walang u me he ka ha ködrin, ka habe, Haba bakevicik ame he ka hake hon hnyi cica.

¹¹ Haba cica ame ip hubun ûnyi hnâu ûhûkâlâköuâ ae hmak, ke oge me he bi nya ka bi hanen e hubun: haba cica ame kuc öbun ge je osö, ke oge me he bi nya ka kuc öbun ge je sekopio.

¹² Ke haba Jeroboama me tavat hia ödrin e o kö Reoboama hnyi bong a kuniny, helâ me hna ha ge than, ka habe, Hmetu thö könya, hnyi bong a kuniny.

¹³ Me haba than ame thu hwegiâ ködrin; ke haba Reoboama ame degec hofuc hwan wahingat,

¹⁴ kʼ ame fuc ködrin hoton hofuc hwan wahidröu me ha, ka habe, Haba cica ame ohmâkâ ûnyi hnân ûhûkâlâköuâ hubun, ke oge me he bi nya ka bi hanen kâe: haba cica ame kuc öbun ge je osö, ke oge me he bi nya ka kuc öbun ge je sekopio.

¹⁵ Ke ame ca long bi than ka tavat; anyin a ûnyi ge Khong, me me he Iehova ka ohwâdâ hwan hofuc waleji e ame ha kö Jeroboama nöku Nebata deny Ahia at Silo.

¹⁶ Ke a wâ but Isaraela hia a gʼ ame ca long ködrin than, me ame thu tavat ka than me ha, ka habe, Ewa ke keihöhmun unyi Davita? ke ha jekhöûhmun unyin nöku Jese: Isaraelalö vese thʼ öbun ka hnyi umöbun je uma mano: Davita lö, wâ biju ânyâm lap. Me ame vese thö Isaraela hia ka hnyi umödrin je uma mano.

¹⁷ Ke haba je lakon Isaraela hnyat adre me labā je tauniny Juda, me, ame musi ködrin Reoboama.

¹⁸ Ke haba Reoboama ame kunö Hadorama, at ame o fat; ke haba lakon Isaraela ödrin e lûâ ge veto me ame mokcu. Ke haba Rehoboama ame ie he logot me ölö ka hnyi anyin kariota he ka kec Jerusalema ai.

¹⁹ Waleling me adre me degec lap anyi Davita ke ne o but hnyi bong ang.