Рут 4 - Һазирқи Заман Уйғурчә Тәрҗимиси

Боазниң Рутни некайиға елиши

¹ Бу арида Боаз шәһәр дәрвазисиға берип, у йәрдә олтарди. Узун өтмәй өзи ейтқан Әлимәләкниң әң йеқин туққиниму у йәрдин өтүп қалди. Боаз униңға: — Бурадәр, бу йәргә келип олтарғин! — дәп чақирди, у келип олтарди.

² Боаз йәнә шәһәрниң ақсақаллиридин он нәпирини тәклип қилип, уларниму бу йәрдә олтарғузди. Көпчилик олтирип болғандин кейин,

³ у һелиқи туққиниға: — Бурадиримиз Әлимәләкниң аяли Наоми Моабтин қайтип келип, өзлиригә тәвә зиминини сатмақчи болуватиду.

⁴ Шуңа сени бу иштин хәвәрләндүрмәкчимән. Әгәр сән бу йәрни елишни халисаң, мошу йәрдә олтарған ақсақаллар вә җамаәт алдида алғин. Әгәр елишни халимисаң, очуқ ейтқин. Буни мән билишим керәк, чүнки алди билән сениң елиш һоқуқуң бар. Андин кейин новәт маңа келиду, — деди. Һелиқи туққини: — Алимән, — деди.

⁵ Боаз униңға: — Хоп! Әгәр сән у зиминни Наомидин алсаң, мәрһум оғлиниң моаблиқ тул хотуни Рутниму әмриңгә елишиң һәм мәрһумниң намини сақлап қелиш үчүн әвлат қалдуруп, әвладиға бу йәрни мирас қалдурушуң шәрт, — деди.

⁶ У киши: — Ундақта бу йәрни елиш һоқуқумдин ваз кечимән, чүнки балилиримға қалидиған мирас бөлүнүп кетидикән. Сән алғин! Мән алалмаймән, — дәп җавап бәрди.

⁷ Әйни вақитларда исраиллиқларниң мал-мүлүк, сода-сетиқ ишлирида мундақ бир адәт бар еди. У болсиму сатқучи өз аяқ кийимини йешип, алғучиға берәтти. Улар сода-сетиқниң пүткәнлигини мошу усул билән ипадиләтти.

⁸ Шуңа у киши Боазға: — Сән алғин! — дәп аяқ кийимини селип, Боазға бәрди.

⁹ Боаз у йәрдики ақсақаллар һәм җамаәткә: — Әй җамаәт, гепимгә қулақ селиңлар! Бүгүн һәммиңлар гува болуңлар, мән Наомидин Әлимәләкниң мирасини, йәни Килйон билән Маһлонға тәвә болған йәр-зиминларни өзәмниң илкимгә алимән.

¹⁰ Шуниң билән биргә мәрһумниң мирасиға варис қалдуруш үчүн һәм униң наминиң бурадәрлирим арисида, шундақла өз жутида унтулуп кәтмәслиги үчүн, мәрһум Маһлонниң аяли моаблиқ Рутниму әмримгә алимән. Бүгүн силәр бу ишларға гува болғайсиләр, — деди.

¹¹ Дәрвазиниң йенидики ақсақаллар вә җамаәт: — Шундақ, биз гувадуримиз. Пәрвәрдигар Яқупниң аяллири Раһилә билән Леяһқа нурғун пәрзәнт бәргинидәк, аялиң Рутқиму көп пәрзәнт ата қилғай. Әфратада бай болғайсән, Бәйтләһәмдә иззәт-аброй тапқайсән.

¹² Пәрвәрдигар бу яш аялдин саңа нурғун әвлат ата қилғай, уруқ-әвладиңни Тамарниң Йәһудаға туғуп бәргән оғли Пәрәсниң уруқ-әвладиға охшаш нурғун қилғай, — дәп дуа қилишти.

Боаз билән Рут падиша Давутниң беваситә әҗдадидур

¹³ Шундақ қилип, Боаз Рутни әмригә елип, улар бир тәһийигә баш қойди. Пәрвәрдигарниң қудрити билән Рут һамилдар болуп, бир оғул туғди.

¹⁴ Шәһәрдики аяллар Наомиға: — Пәрвәрдигарға һәмдусаналар болсун! У бүгүн сизгә таянч болидиған бир нәврә ата қилди. Униң нами Исраилда иззәт-аброй тапсун.

¹⁵ Сиз үчүн йәттә оғулдинму әвзәл келиниңиз сизгә яхши қариди, һазир у сизгә бир нәврә туғуп бәрди. Бу нәвриңиз сизниң қолиңизға қол, путиңизға пут болуп, қериған вақтиңизда таянчиңиз болиду, — дейишти.

¹⁶ Наоми бу балини қолиға елип, бағриға чиң басти вә униң һалидин хәвәр алди.

¹⁷ Хошна аяллар бәс-бәстә: — Наоми бир оғул нәврилик болди! — дейишип, балиға Обeд дәп ат қойди. Обeд Йишайниң атиси, Йишай падиша Давутниң атиси еди.

¹⁸ Пәрәстин Давутқичә болғанларниң нәсәбнамиси: Пәрәс Хәзронниң атиси,

¹⁹ Хәзрон Рамниң атиси, Рам Амминадабниң атиси,

²⁰ Амминадаб Нахшонниң атиси, Нахшон Салмонниң атиси,

²¹ Салмон Боазниң атиси, Боаз Обeдниң атиси,

²² Обeд Йишайниң атиси, Йишай Давутниң атисидур.