Рут 2 - Һазирқи Заман Уйғурчә Тәрҗимиси

Рутниң Боазниң етизида башақ териши

¹ Наоминиң ери Әлимәләкниң уруқ-әвладидин Боаз исимлиқ бай һәм абройлуқ бир туққини бар еди.

² Бир күни Рут Наомиға: — Етизға берип башақ теришимгә мақул болсиңиз, маңа илтипат көрситидиған бирәр адәмниң кәйнидә жүрүп, башақ терәй, — деди. — Мәйли, барғин қизим, — деди Наоми.

³ Рут етизға берип, омичиларниң кәйнидин меңип, чүшүп қалған арпа башақлирини тәрди. Бу етиз дәл Боазниң еди.

⁴ Рут етизда башақ териватқанда, Боаз Бәйтләһәмдин кәлди. У омичиларға: — Пәрвәрдигар силәргә яр болғай! — дәп салам бәрди. — Пәрвәрдигар сизгә бәхит ата қилғай! — дәп салам қайтурди уларму.

⁵ Боаз омичиларға җавапкар кишидин: — Әву кимниң қизи екән? — дәп сориди.

⁶ У: — У моаблиқ қиз екән, Наоми билән биргә Моабтин кәпту.

⁷ У мәндин омичиларниң кәйнидин меңип, арпа бағлиридин чүшүп қалған башақларни теривелишни сориди. Сәһәрдин бери териватиду, кәпидә пәқәт бир аз арам алди, — дәп җавап бәрди.

⁸ Боаз Рутниң йениға берип, униңға: — Әй қизим, гепимгә қулақ салғин! Башқиларниң етизиға берип, башақ териш хиялида болмиғин. Бу йәрдә аял хизмәткарлиримниң қешида тәргин.

⁹ Омичилар қәйәрдә ома ориса, сән аяллар билән биргә шу йәргә барғин. Әр омичилиримға сени бозәк қилмаслиқни тапилаймән. Уссисаң, улар тошқузуп қойған комзәкләрдин су елип ичкин, — деди.

¹⁰ Рут Боазниң алдида тизлинип, бешини йәргә тәккүзүп: — Немишкә мәндәк бир мусапирға илтипат көрситип, бунчивала ғәмхорлуқ қилисиз? — деди.

¹¹ Боаз униңға: — Сән тул қалғандин кейин, қейинанаңға вападар болғанлиғиңни аңлидим. Сениң ата-анаң вә жутуңдин кетип, бу ят хәлиқ ичигә қандақ келип қалғанлиғиңдин толуқ хәвирим бар.

¹² Қилған яхшилиқлириңни Пәрвәрдигар өзәңгә яндурғай. Сән қанити астида паналиқ издигән Пәрвәрдигар, йәни исраиллар етиқат қилип кәлгән Худа саңа мол илтипатини яғдурғай, — деди.

¹³ Рут униңға: — Ғоҗам, сиз маңа бәк чоң яхшилиқ қилдиңиз, гәрчә мән сизниң хизмәткарлириңиздин болмисамму, маңа шундақ мулайим сөзләрни қилип, көңлүмгә тәсәлли бәрдиңиз, — дәп җавап қайтурди.

¹⁴ Тамақ вақти болғанда, Боаз Рутқа: — Қени, кәлгин, нанға еғиз тәккин. Аччиқсуға тәккүзүп йегин, — деди. Рут омичилар билән биллә олтарди. Боаз униңға қомачтин елип бәрди. У тойғичә йеди вә ашуруп қойди.

¹⁵ Рут орнидин туруп йәнә башақ тәргили кәткәндә, Боаз әр омичилириға: — У бағланған бағламларниң арисида жүрүп тәрсиму уни тосимаңлар вә көңлини рәнҗитмәңлар.

¹⁶ Һәтта униң үчүн бағламлардин азирақ суғуруп чиқирип қоюңлар. Уни әйиплимәңлар, — дәп тапилиди.

¹⁷ Шуниң билән Рут кәч киргичә етизда башақ тәрди. У терип кәлгән арпа башақлирини соқуведи, йерим халтидәк дан чиқти.

¹⁸ Рут арписини көтирип, шәһәргә қайтип кәлди вә қейинанисиға қанчилик арпа тәргәнлигини көрсәтти һәм ешип қалған тамиғини елип униңға бәрди.

¹⁹ Наоми униңға: — Бунчивала көп арпини қәйәрдин терип кәлдиң? Сән кимниң етизида иш қилдиң? Саңа ғәмхорлуқ қилған шу кишигә Худа бәхит бәрсун! — деди. Рут қейинанисиға өзиниң Боазниң етизида ишлигәнлигини ейтип бәрди.

²⁰ Наоми роһланған һалда: — Бизгә вә өлүп кәткән әрлиримизгә өз мәрһәмитини көрсәткән Боазға Пәрвәрдигар зор бәхит яғдурсун! — дәп дуа қилди. У йәнә: — У киши бизниң йеқин туққанлиримизниң бири болиду. Униң бизгә қараш җавапкарчилиғи бар, — деди. Рут:

²¹ — У йәнә мениң таки ома аяқлашқичә өз омичилириниң кәйнидин башақ теришимгә рухсәт бәрди, — деди.

²² Наоми келинигә: — Қизим, шундақ қилғин! Боазниң аял хизмәткарлири билән биллә ишлигин. Әгәр башқа кишиләрниң етизлириға барсаң, сени бозәк қилиши мүмкин, — деди.

²³ Шундақ қилип Рут арпа, буғдайлар орулуп болғанға қәдәр, Боазниң аял хизмәткарлири билән биргә башақ тәрди. У қейинаниси билән биллә туривәрди.