نەزمىلەر شاھى 6 - ھازىرقى زامان ئۇيغۇرچە تەرجىمىسى

يېرۇسالېم قىزلىرى:

¹ ئېيتقىنا ئەي گۈزەللەرنىڭ گۈزىلى، ئاشىقىڭ كەتتى قايسى تەرەپكە؟ ساڭا بىز ئىزدىشىپ بېرەيلى بىرگە.

قىز:

² ئاشىقىم كەتتى ئۆزىنىڭ گۈلزارىغا، دورا ئۆسۈملۈك بېغىدا ھۇزۇرلىنىشقا، ئۇ يەردىن قىزىلگۈللەرنى يىغىشقا.

³ مەنسۇپتۇرمەن ئاشىقىمغا، ئۇمۇ ماڭا، ھۇزۇرلىنار ئۇ قىزىلگۈللەر ئارىسىدا.

بەشىنچى بۆلەك يىگىت:

⁴ ئى سۆيۈملۈكۈم، گۈزەلدۇرسەن تىرزاھ شەھىرىدەك، يېقىملىقسەن يېرۇسالېمدەك، ھەيۋەتلىكسەن تۇغ كۆتۈرگەن قوشۇندەك.

⁵ ماڭا قاراۋەرمە، ئېلىپ قاچقىن كۆزۈڭنى، مەپتۇن بولۇپ قالماقتىمەن سېنىڭ شەھلا كۆزۈڭگە. گىئلاد تېغىدىن ئويناقلاپ چۈشۈۋاتقان ئۆچكىلەردەك، دولقۇنلايدۇ قارا، بوستان چاچلىرىڭ شۇنچە.

⁶ چىشلىرىڭ بىر توپ قويدۇر يېڭى قىرقىپ، يۇيۇلغان، كەم-كۈتىسىز جۈپ-جۈپ بولۇپ، قاتىرىغا تىزىلغان.

⁷ چۈمبىلىڭدە يوشۇرغان مەڭزىلىرىڭ، قىزارغاندۇر خۇددى ئانارنىڭ دانىسىدەك.

⁸ باردۇر شاھنىڭ ئاتمىش خانىش _ ئايالى، سانسىزلىغان كېنىزەك، سەكسەن توقىلى.

⁹ لېكىن مېنىڭ كۆڭلۈمدە پەقەت سەنلا. مەشۇقۇم مېنىڭ غۇبارسىز كەپتىرىمدۇر، ئۇ ئانىسىنىڭ ئەركىسىدۇر، ئۇ ئانىسىنىڭ ئەڭ قەدىردانىدۇر. ھەممە قىزلار ئۇنى كۆرسە داڭلىشار، خانىش ۋە توقاللارمۇ ماختىشار:

¹⁰ «كىمدۇر ئۇ تاڭ سەھەردەك پارلىغان، گۈزەل ئايدەك چاقنىغان، ئىللىق قۇياشتەك يورۇغان، يۇلتۇزلاردەك ھەيۋەت بولۇپ كۆرۈنگەن؟»

¹¹ كىرگەن ئىدىم ياڭاقلىققا، كۆرەرمەنمۇ دەپ جىلغىدىكى چېچەكلەرنى، يۇمران ئۈزۈم نوتىلىرى، ئانارنىڭ چېچەكلىرىنى.

¹² ھاياجاندىن چۆمدۈم خۇشاللىق دەرياسىغا، خۇددى ئولتۇرغاندەك خان جەمەتى ھارۋىسىغا.

يېرۇسالېم قىزلىرى:

¹³ ئى شۇلاملىق قىز، قايتىپ كەلگىن ئارىمىزغا، يەنە بىر قېتىم زەن سېلىپ باقايلى ساڭا. نە ۋەجىدىن زەن سېلىپ، قارىماقچى بوپ قالدىڭلار شۇلاملىق قىزغا، ئىككى قاتار قىزلار ئارىسىدا ئۇسسۇل ئويناۋاتقان ئۇنىڭغا؟