نەزمىلەر شاھى 3 - ھازىرقى زامان ئۇيغۇرچە تەرجىمىسى

¹ ئورنۇمدا يېتىپ، كېچىچە ئىنتىزار بولدۇم ئاشىقىمغا، لېكىن ئۇ كەلمىدى ئۆيۈمگە.

² ئورنۇمدىن تۇرۇپ، ئايلىناي شەھەرنى، ئارىلاپ ھەممە كوچا، مەيداننى، ئىزدەي ئەمدى ئاشىقىمنى. شۇنچە ئىزدىدىم، لېكىن تاپالمىدىم زادىلا ئۇنى.

³ جېسەكچىلەر مېنى كۆرۈپ توختىدى، سورىدىم مەن ئۇلاردىن: _ كۆردۈڭلارمۇ ئاشىقىمنى؟

⁴ ئۇلاردىن ئايرىلىپلا تاپتىم ئاشىقىمنى. قويۇپ بەرمىدىم قۇچاقلاپ ئۇنى، تاكى ئەكىرمىگۈچە ئانامنىڭ ئۆيىگە _ ماڭا ھامىلىدار بولغۇچىنىڭ خانىسىگە.

⁵ ئېھ يېرۇسالېم قىزلىرى، ئۆتۈنەي سىلەردىن، ئويغاتماڭلار دالىدىكى مارال ۋە جەرەنلەرنى، ۋاقتى كەلمىگۈچە ئويغاتماڭلار مۇھەببەتنى.

ئۈچىنچى بۆلەك: توي كۈنى يېرۇسالېم قىزلىرى:

⁶ كىم ئۇ چۆل تەرەپتىن كېلىۋاتقان چاڭ توزۇتۇپ، مۇرمەككى ۋە مەستىكى رۇمىنىڭ ھىدىنى پۇرىتىپ، ئىپار-ئەنبەر كاراۋىنىنىڭ خۇش ھىدىنى تارقىتىپ؟

⁷ قاراڭلار، ئۇ سۇلايماننىڭ تەختىراۋانىدۇر، ئۇنى قوغداپ كېلىۋاتقان ئاتمىش پالۋان ئىسرائىللارنىڭ ئەڭ مۇنەۋۋەر باتۇرلىرىدۇر.

⁸ ئۇلارنىڭ ھەممىسى يانلىرىغا قىلىچ ئاسقان، قىلىچ بىلەن جەڭ قىلىشقا ماھىرلاردۇر. كېچىدىكى تاسادىپىي تەھدىتلەرگە ئۆتكۈر قىلىچى بىلەن تەيياردۇر.

⁹ سۇلايمان ياساتقان بۇ تەختىراۋان، لىۋاننىڭ ياغاچلىرىدىن ياسىلىپتۇ.

¹⁰ ئۇنىڭ خادىلىرى كۈمۈشتىن، يۆلەنچۈكى ئالتۇندىن ياسىلىپتۇ. سۆسۈن رەختتىن سېلىنچا سېلىنىپ، ئىچى يېرۇسالېم قىزلىرى تەرىپىدىن مۇھەببەت بىلەن بېزىلىپتۇ.

¹¹ ئى يېرۇسالېم قىزلىرى، چىقىپ قاراپ بېقىڭلار سۇلايمان پادىشاھقا! تۇرىدۇ ئۇ، تويى بولغان، كۆڭلى شادلانغان، ئانىسى ئۇنىڭغا تاجنى كىيدۈرگەن كۈنىدىكى قىياپەتتە.