زەبۇر 147 - ھازىرقى زامان ئۇيغۇرچە تەرجىمىسى

147-مۇناجات

¹ ھەمدۇسانا ئوقۇڭلار پەرۋەردىگارغا، ئىگىمىزنى كۈيلىمەك بەختتۇر بىزگە، خۇشاللىقتۇر مەدھىيە ئوقۇش خۇداغا، ھەمدۇسانالار لايىقتۇر ئۇنىڭ شەنىگە.

² ئىگىمىز قايتىدىن قۇرىدۇ يېرۇسالېمنى، ئىسرائىلغا يېڭىدىن يىغىدۇ سۈرگۈن بولغانلارنى.

³ كۆڭلىگە داۋا بېرىدۇ كۆڭلى سۇنۇقلارنىڭ، شىپالىق مەلھەم تاڭىدۇ يارىلىرىغا ئۇلارنىڭ.

⁴ خۇدا ئۆزى بەلگىلەيدۇ يۇلتۇزلارنىڭ سانىنى، ئايرىم نامدا ئاتىغاندۇر ئۇلارنىڭ ھەربىرىنى.

⁵ رەببىمىز بۈيۈكتۇر، قۇدرىتى چەكسىز، دانالىقى ئۇنىڭ مۆلچەرلىگۈسىز.

⁶ پەرۋەردىگار يۆلەپ كۆتۈرەر ئاجىزلارنى، ئۇ يەرگە ئۇرار پاسىق-رەزىللەرنى.

⁷ پەرۋەردىگارغا شۈكۈر ئېيتىپ، قوشاق قېتىڭلار، قوشاقلارنى ساز لىرادا تەڭكەش قىلىپ ئېيتىڭلار.

⁸ ئۇ ئاسماننى بۇلۇتلارغا تولدۇرۇپ، كۆكتىن يەرگە يامغۇرىنى ياغدۇرۇپ، تاغ-دالانى ئوت-چۆپلەرگە تولدۇرار.

⁹ خۇدا ئاتا قىلار چارۋا-مالغا ئۆز رىزقىنى، ئوزۇق بېرەر قاقىلدىغاندا قاغا بالىلىرى.

¹⁰ ئۇ سۆيۈنمەس ئات كۈچىدىن، چەبدەس، چاققان ئادەم پۇتىدىن.

¹¹ پەرۋەردىگار سۆيۈنەر ئۆزىگە ئىخلاس قىلغانلاردىن، ئۇنىڭ مەڭگۈلۈك مۇھەببىتىگە ئۈمىد باغلىغانلاردىن.

¹² ئەي يېرۇسالېم، پەرۋەردىگارنى ئالقىشلا، ئەي سىئون، مەدھىيە ئوقۇ خۇدايىڭغا.

¹³ چۈنكى پەرۋەردىگار دەرۋاز تاقاقلىرىڭنى مەھكەم قىلار، سېپىل ئىچىدىكى پەرزەنتلىرىڭگە بەخت ئاتا قىلار.

¹⁴ ئۇ چېگرالىرىڭغىچە ئاسايىشلىق ئېلىپ كېلەر، ئۇ سىلەرنى بۇغداينىڭ ئېسىلى بىلەن تەمىنلەر.

¹⁵ خۇدا يەر يۈزىگە ئەمر قىلار، ئەمرى تېز بېرىپ ئەمەلگە ئاشار.

¹⁶ پەرۋەردىگار ئاق يۇڭدەك ئاپئاق قارنى ياغدۇرار، نەپىس قىروۋنى پۈتكۈل زېمىنغا كۈلدەك چاچار.

¹⁷ مۆلدۈرلەرنى نان ئۇۋاقلىرىدەك چېچىۋېتەر، كىممۇ ئۇنىڭ سوغۇقىغا بەرداشلىق بېرەر.

¹⁸ پەرۋەردىگار سۆزى بىلەن ئېرىتەر ئۇلارنى، شامىلى بىلەن ئاققۇزار سۇلارنى.

¹⁹ پەرۋەردىگارنىڭ كالامىنى يەتكۈزەر ياقۇپنىڭ نەسلىگە، پەرمان ھەم پەرزلىرىنى ئايان قىلار ئىسرائىل خەلقىگە.

²⁰ پەرۋەردىگار باشقا خەلققە ھېچقاچان بۇنداق مۇئامىلە قىلغان ئەمەس، ئۇنىڭ پەرزلىرىنى باشقىلارمۇ ھەم بىلگەن ئەمەس. ھەمدۇسانالار بولسۇن پەرۋەردىگارغا.