زەبۇر 135 - ھازىرقى زامان ئۇيغۇرچە تەرجىمىسى

135-مۇناجات

^1-2 ھەمدۇسانا ئوقۇڭلار پەرۋەردىگارغا، مەدھىيەلەر ئېيتىڭلار ئۇنىڭ نامىغا. ئەي پەرۋەردىگارغا خىزمەت قىلىدىغانلار، ئۇنىڭ ئۆيىدە ئىبادەتتە بولىدىغانلار، ئىگىمىزنىڭ ھويلىلىرىدا تۇرىدىغانلار، مەدھىيەلەر ئوقۇڭلار ئۇنىڭغا.

³ مەدھىيەلەڭلار پەرۋەردىگارنى، چۈنكى شاپائەتلىكتۇر پەرۋەردىگار. كۈي-ناخشىغا قېتىڭلار ئۇنىڭ نامىنى، چۈنكى ئۇنى كۈيلىمەك بىزنى شاد قىلار.

⁴ پەرۋەردىگار تاللىۋالدى ياقۇپ قوۋمىنى، ئۆزىگە تەۋە قىلىپ ئىسرائىللارنى.

⁵ بىلىمەن، بەرھەق پەرۋەردىگار ئۇلۇغدۇر، رەببىمىز غەيرىي ئىلاھلاردىن ئۈستۈندۇر.

⁶ ئاسمان-زېمىن، دېڭىز-ئوكيان، چوڭقۇرلۇقلاردا، نېمە قىلىشنى خالىسا شۇنى قىلار خۇدا.

⁷ ئۇ، زېمىننىڭ تۆت تەرىپىدىن ئەكېلىپ بۇلۇتلارنى، يامغۇر ياغدۇرۇپ ھەم چاقتۇرۇپ چاقماقلارنى، كۇھىقاپلىرىدىن ئېلىپ چىقار شاماللارنى.

⁸ ئۇ مىسىرلىقلارنىڭ ھالاك قىلدى تۇنجى تۇغۇلغانلىرىنى، يەنى ھالاك قىلدى ئادەم ۋە ماللارنىڭ تۇنجىلىرىنى.

⁹ ئۇ مىسىردا كۆرسەتتى مۆجىزە ۋە كارامەتلىرىنى، جازالىدى پىرئەۋن ۋە ئۇنىڭ ۋەزىرلىرىنى.

¹⁰ ۋەيران قىلدى ئۇ نۇرغۇن دۆلەتلەرنى، ئۆلتۈردى قۇدرەتلىك پادىشاھلارنى.

¹¹ ئۆرۈۋەتتى ئۇ ئامورلارنىڭ پادىشاھى سىخوننى، باشاننىڭ پادىشاھى ئوگنى، ھەتتا كەنئاندىكى بارلىق پادىشاھلارنى.

¹² ئۇلارنىڭ زېمىنىنى بەردى ئۆز قوۋمىغا، ئاتا قىلدى ئۇلارنى ئۆز خەلقى ئىسرائىلغا.

¹³ ئى پەرۋەردىگار، ئۇنتۇلمايدۇ سېنىڭ نامىڭ، ئەۋلادتىن-ئەۋلادقىچە دەۋر سۈرەر شۆھرىتىڭ.

¹⁴ خۇدا «گۇناھسىز» دەپ جاكارلار ئۆز قوۋمىنى، كۆرسىتەر ئۇنىڭ قۇللىرىغا ئۆز رەھىمىنى.

¹⁵ ئالتۇن بىلەن كۈمۈشتۇر يات ئەللەرنىڭ بۇتلىرى، ياسىغاندۇر ئۇلارنى ئىنسانلارنىڭ قوللىرى.

¹⁶ ئۇلارنىڭ ئاغزى بار سۆزلىيەلمەس، كۆزلىرى بار كۆرەلمەس.

¹⁷ قۇلاقلىرى بار ئاڭلىماس، ئاغزىدا يوقتۇر نەپەس.

¹⁸ بۇتلارنى ياسىغانلار، ئۇنىڭغا ئۈمىد باغلىغانلار، ئاخىرى ئۆزلىرىنىڭ بۇتلىرىغا ئوخشاپ قالار.

¹⁹ ئەي ئىسرائىل جەمەتى، پەرۋەردىگارغا ھەمدۇسانا ئېيتىڭلار، ئەي ھارۇن جەمەتى، پەرۋەردىگارغا ھەمدۇسانا ئېيتىڭلار.

²⁰ ئەي لاۋىي جەمەتى، پەرۋەردىگارغا ھەمدۇسانا ئېيتىڭلار، ھەمدۇسانا ئېيتىڭلار پەرۋەردىگارغا ئىخلاسى بارلار.

²¹ پەرۋەردىگار تۇرار يېرۇسالېمدا، ھەمدۇسانا ئېيتىلسۇن سىئوندا، ھەمدۇسانا ئوقۇڭلار ئۇنىڭغا.