زەبۇر 121 - ھازىرقى زامان ئۇيغۇرچە تەرجىمىسى

121-مۇناجات

يېرۇسالېمدىكى ئىبادەتخانىغا بېرىش يولىدا ئېيتىلغان مۇناجات

¹ كۆزلىرىمنى تىكىمەن تاغلارغا، قەيەردىن كېلەر دەپ ياردەم ماڭا.

² پەرۋەردىگارلا قىلار ياردەمنى، ئۇ ياراتقاندۇر ئاسمان-زېمىننى.

³ ساقلار ئۇ تېيىلىشتىن پۇتلىرىڭنى، سەگەك تۇرۇپ قوغدايدۇ سېنى.

⁴ بىلگىنكى، قوغدىغۇچى ئىسرائىللارنى، ئۇخلىماس، تەرك ئەتكەندۇر ئۇيقۇنى.

⁵ قوغدىغۇچىڭدۇر پەرۋەردىگار، ئوڭ يېنىڭدا سايىۋەن بولۇپ تۇرار.

⁶ زەرەر يەتكۈزەلمەس ساڭا زىنھار، ئاي ۋە قۇياش، كېچە ۋە كۈندۈز.

⁷ يامانلىقلاردىن قوغدايدۇ پەرۋەردىگار، ھەم جېنىڭنى ئۇ ئامان قىلار.

⁸ نەزەر سېلىپ پەرۋەردىگار يۈرۈش-تۇرۇشۇڭغا، بۈگۈندىن تائەبەدكىچە ئالار سېنى ئۆز پاناھىغا.