پەند-نەسىھەتلەر 31 - ھازىرقى زامان ئۇيغۇرچە تەرجىمىسى

پادىشاھنىڭ ئانىسىنىڭ نەسىھىتى

¹ ماسسا پادىشاھى لىمۇئېلنىڭ ئېيتقانلىرى، ئانىسىنىڭ ئۇنىڭغا ئۆگەتكەنلىرى:

² ئەي ئوغلۇم، باغرىمنى يېرىپ چىققان ئوغلۇم، خۇدادىن تىلەپ ئالغان ئوغلۇم، نېمە دېسەم بولار مەن ساڭا؟

³ كۈچ-قۇۋىتىڭنى سەرپ قىلما، ئۆمرۈڭنى بىكار قىلما، پادىشاھلارنى ۋەيران قىلغۇچى خوتۇنلارغا.

⁴ ئەي لىمۇئېل، لايىق ئەمەس شاراب پادىشاھلارغا، ياراشماس مەيگە بېرىلىش ھۆكۈمدارغا.

⁵ چۈنكى ئۇلار شاراب ئىچىپ، ئۇنتۇپ قالار قانۇننى، بۇرمىلىۋېتەر ئېزىلگەنلەرنىڭ ھوقۇقىنى.

⁶ بەرگىن شارابنى ئۆلۈم گىردابىدا تۇرغانلارغا، بەرگىن مەينى قايغۇ-ھەسرەت چەككەنلەرگە!

⁷ ئۇلار شاراب ئىچىپ، ئۇنتۇسۇن ئۆزلىرىنىڭ نامراتلىقىنى، ئەسلەپ قالمىسۇن تارتقان دەردلىرىنى.

⁸ ئۆزىنى ئاقلىيالمايدىغانلار ئۈچۈن سۆزلىگىن، ئاجىزلارنىڭ ھوقۇق ئۈچۈن ئاغزىڭنى ئاچقىن.

⁹ سۈكۈت قىلما، ئادىل ھۆكۈم قىلغىن، يوقسۇل ۋە موھتاجلارنىڭ ھوقۇقىنى قوغدىغىن.

پەزىلەتلىك ئايال

¹⁰ كىم ئالالايدۇ پەزىلەتلىك ئايالنى؟ ئارتۇقتۇر گۆھەردىنمۇ ئۇنىڭ قەدىر-قىممىتى.

¹¹ بۇنداق ئايالغا دىلىدىن ئىشەنچ قىلار ئېرى، كەم بولماس ئېرىنىڭ ھېچ نەرسىسى.

¹² ئېرىغا ياخشىلىق قىلار ئۇ ئۆمۈر بويى، ئۇچراتماس زىيانغا ئۇنى.

¹³ ئۇ تاللاپ قوي يۇڭى ۋە كەندىر رەختنى، ئۆز قولىدا ھەۋەس بىلەن پۈتكۈزەر كىيىم-كېچەكنى.

¹⁴ ئۇ سودا كېمىلىرى كەبى، توشار يىراقتىن ئوزۇق-تۈلۈكلەرنى.

¹⁵ ئورنىدىن تۇرۇپ ئۇ تاڭ سۈزۈلمەستە، يېمەكلىك تەييارلار ئائىلىسىدىكىلەرگە، ئىش تەقسىم قىلار دېدەكلىرىگە.

¹⁶ ئۇ ئېتىزنى كۆرۈپ ئويلانغاندىن كېيىن سېتىۋالار، ئۆز ئەجرى بىلەن تاپقانلىرىغا ئۈزۈمزارلىق بەرپا قىلار.

¹⁷ ئىشقا مەھكەم باغلاپ ئۇ بېلىنى، كۈچلەندۈرۈپ بىلەكلىرىنى.

¹⁸ كۆرەر ئىشلىگىنىنىڭ پايدىسىنى، كېچىچە ئۆچۈرمەس چىرىغىنى.

¹⁹ ئايلاندۇرار ئۇ قولى بىلەن ئۇرچۇقنى، ئېگىرەر بارماقلىرى بىلەن يىپنى.

²⁰ ئايىماس ئۇ يوقسۇللاردىن ياردىمىنى، ئۇزىتار ھاجەتمەنلەرگە ياردەم قولىنى.

²¹ قار ياغسىمۇ ئائىلىسىدىكىلەر ئۈچۈن يوقتۇر ئەندىشىسى، چۈنكى قېلىن كىيىندۈرۈلگەن ئۇلارنىڭ ھەممىسى.

²² ئۆزى تىكەر ئۇ كارىۋات ياپقۇچلىرىنى، نېپىز كەندىر، ئېسىل رەختلەردىندۇر ئۇنىڭ لىباسلىرى.

²³ ئېرى شەھەر دەرۋازىسى ئالدىدا ئاقساقاللار بىلەن ئولتۇرۇر، ئۇ يەردە ئۇنىڭ ئابرۇيى باردۇر.

²⁴ ئۇ كەندىر رەختتىن تىكىپ ساتار كىيىملەرنى، سودىگەرلەرگە ئۆتكۈزەر بەلباغلارنى.

²⁵ كۈچ-قۇدرەت ۋە ئىززەت-ھۆرمەت ئۇنىڭ لىباسى، خۇشاللىق بىلەن كۈتۈۋالار ئۇ كېلەچەكنى.

²⁶ ئۇ دانالىق بىلەن سۆزلەر، مېھرىبانلارچە نەسىھەت بېرەر.

²⁷ ئۇ ئائىلىسىدىكى ئىشلارنى ياخشى باشقۇرار، يېتىپ يېمەس بىكار.

²⁸ پەرزەنتلىرى ھۆرمەتتە ئۇنى تەرىپلەر، ئېرىمۇ ئۇنى ماختاپ مۇنداق دەر:

²⁹ «پەزىلەتلىك ئاياللار كۆپ ئىكەن، لېكىن ھەممىسىدىن ئارتۇق تۇرارسەن، ئېشىپ چۈشىسەن».

³⁰ ئالدامچىدۇر جەلپكارلىق، بىر كۆپۈكتۇر ھۆسن-جامال، ماختاشقا ئېرىشەر پەرۋەردىگاردىن ئەيمىنىدىغان ئايال.

³¹ ئۇنىڭ مېھنىتىنىڭ مېۋىلىرىگە لايىق تەرىپلەڭلار ئۇنى، شەھەر دەرۋازىلىرىدا ماختاشقا ئېرىشتۈرسۇن ئۇنى ئۇنىڭ ئەجىرلىرى!