ئايۇپ 35 - ھازىرقى زامان ئۇيغۇرچە تەرجىمىسى

ئەلىھۇنىڭ ئايۇپنى داۋاملىق ئەيىبلىشى

¹ ئەلىھۇ يەنە مۇنداق دېدى:

² «ئەي ئايۇپ، سەن مېنىڭ دۇرۇس، خۇدانىڭ خاتا، دېگەنىدىڭ، سېنىڭچە بۇ توغرىمۇ؟

³ سەن خۇداغا: ‹گۇناھسىزلىقىم ماڭا نېمە پايدا ئېلىپ كېلىدۇ؟ گۇناھ سادىر قىلمىسام قانداق ياخشىلىققا ئېرىشىمەن؟› دېگەنىدىڭ.

⁴ ساڭا ۋە سېنىڭ دوستلىرىڭغا مەن جاۋاب بېرەي.

⁵ ئاسمانغا قارا، ئېگىزدىكى بۇلۇتلارغا قاراپ باق.

⁶ ئەگەر سەن گۇناھ قىلساڭ خۇداغا قانداق زەرەر يېتەر؟ گۇناھلىرىڭ دۆۋىلىنىپ كەتكەن تەقدىردىمۇ خۇداغا نېمە تەسىرى بولسۇن؟

⁷ ئەگەر سەن ھەققانىي بولساڭ، خۇداغا نېمە پايدىسى بولسۇن؟ خۇدا سەندىن نېمە مەنپەئەت ئالسۇن؟

⁸ سېنىڭ گۇناھلىرىڭ پەقەت ئىنسانلارغىلا زىيان يەتكۈزىدۇ، ھەققانىيىتىڭ پەقەت پانىي دۇنيادىكى ئىنسانلارغىلا مەنپەئەت بېرىدۇ.

⁹ كىشىلەر خىلمۇخىل زۇلۇملارغا ئۇچرىغاندا ۋارقىرايدۇ. ھوقۇقدارلارنىڭ بېسىمىغا دۇچ كەلگەنلەر ياردەم تىلەيدۇ.

¹⁰ لېكىن ھېچكىم: ‹مېنى ياراتقان خۇدا نەدە؟› دەپ سورىمايدۇ. كېچىلىرى ئۆزلىرىگە ئۈمىد بەرگەن خۇداغا ئىلتىجا قىلمايدۇ.

¹¹ خۇدا ئىنساننى ھايۋاندىن ئەقىللىق ياراتتى. ئاسماندىكى قۇشلاردىنمۇ پاراسەتلىك قىلدى.

¹² لېكىن ئۇلار رەزىل ۋە ھاكاۋۇر بولغانلىقى ئۈچۈن، ئۇلار ياردەم سوراپ ئىلتىجا قىلغاندا، خۇدا ئۇلارغا جاۋاب بەرمەيدۇ.

¹³ خۇدا ساختا نىدالارغا قۇلاق سالمايدۇ، ھەممىگە قادىر خۇدا ئۇلارغا پەرۋا قىلمايدۇ.

¹⁴ شۇڭا سەن: ‹مەن خۇدانى كۆرمىدىم، مېنىڭ ئىشلىرىم ئۇنىڭ ئالدىغا يېتىپ بارغان بولسىمۇ، ئۇ مېنى ساقلىتىدۇ› دېسەڭ، ئۇ چوقۇم پەرۋا قىلمايدۇ.

¹⁵ سەن يەنە: ‹خۇدا گۇناھكارلارنى غەزىپى بىلەن جازالىمايدۇ، ئۇلار بىلەن كارى بولمايدۇ› دەيسەن.

¹⁶ ئەي ئايۇپ، سېنىڭ ئېغىز ئېچىپ بۇلارنى دېيىشىڭ بىمەنىلىكتۇر، كۆپ سۆزلىرىڭ ئەھمىيەتسىزدۇر!»