ئايۇپ 29 - ھازىرقى زامان ئۇيغۇرچە تەرجىمىسى

ئايۇپنىڭ سۆزىنى داۋام قىلىشى

¹ ئاندىن ئايۇپ يەنە مۇنداق دېدى:

² «بۇرۇنقى كۈنلىرىمگە، خۇدا ھالىمدىن خەۋەر ئالغان كۈنلىرىمگە قايتسام دەيمەن.

³ ئۇ چاغلاردا ئۇنىڭ چىرىغى بېشىمدا يېنىپ تۇراتتى، ئۇنىڭ نۇرى قاراڭغۇدا ماڭا ھەمراھ ئىدى.

⁴ ئۇ چاغلار مېنىڭ قىران چاغلىرىم ئىدى. خۇدا چېدىرىمدا يېقىن دوستۇم ئىدى.

⁵ ھەممىگە قادىر خۇدا ماڭا يار ئىدى. بالىلىرىم ئەتراپىمدا يۈرەتتى.

⁶ سۈت-قايماقلىرىم ئېشىپ-تېشىپ تۇراتتى. زەيتۇنزارلىقىمدىن زەيتۇن يېغى ئېرىق بولۇپ ئاقاتتى.

⁷ شەھەر دەرۋازىسى ئالدىدىكى مەيداندا ئولتۇرغان ئاقساقاللار ئارىسىدىن ئورۇن ئالغىنىمدا،

⁸ ياشلار مېنى كۆرسە ئۆزىنى چەتكە ئالاتتى. ياشانغانلارمۇ ئورنىدىن تۇرۇپ سالام قىلاتتى.

⁹ بەگلەر سۆزلىرىدىن توختاپ، ئېغىزلىرىنى قوللىرى بىلەن ئېتىۋالاتتى.

¹⁰ ئەمەلدارلارمۇ جىم بولۇشۇپ، تىللىرى تاڭلايلىرىغا چاپلىشىپ قالاتتى.

¹¹ سۆزۈمنى ئاڭلىغانلار بەخت تىلىشەتتى. مېنى كۆرگەنلەر ماختىشاتتى.

¹² چۈنكى ياردەم سورىغان يوقسۇللارنى قۇتقۇزدۇم، ئىگە-چاقىسىز يېتىملەرگە ھامىي بولدۇم.

¹³ سەكراتتىكى ئادەم ماڭا بەخت تىلەيتتى. تۇل خوتۇنلارنىڭ قەلبىنى شادلىققا تولدۇراتتىم.

¹⁴ مەن ھەققانىيەتنى كىيىم قىلىپ كىيگەنىدىم. ئادالەت ماڭا يېپىنچا ۋە باش كىيىم بولغانىدى.

¹⁵ مەن كورنىڭ كۆزى، توكۇرنىڭ پۇتى بولدۇم.

¹⁶ نامراتلارغا ئاتا بولدۇم، ناتونۇشلارنى ئاقلىدىم.

¹⁷ رەزىللەرنىڭ چىشىنى چېقىپ، ئاغزىدىن ئولجىسىنى تارتىۋالدىم.

¹⁸ مەن: ‹كۈنلىرىم قۇمدەك كۆپتۇر، بۇ دۇنيا بىلەن خاتىرجەم ھالدا ئائىلەمدە خوشلىشىمەن،

¹⁹ يىلتىزىم سۇ بويىغىچە سوزۇلغاندۇر، شاخلىرىم تۈن بويى شەبنەمدە يۇيۇلىدۇ.

²⁰ شان-شەرىپىم مەڭگۈ ئۆزگەرمەيدۇ، ئوقيايىمنى تارتىدىغان كۈچۈم ھېچقاچان ئاجىزلىمىدى› دەپ ئويلىدىم.

²¹ ئۇ چاغدا كىشىلەر سۆزلىرىمنى ئاڭلاشنى ئارزۇ قىلاتتى، نەسىھەت بېرىشىمنى سۈكۈتتە كۈتەتتى.

²² سۆزلىرىمگە ھېچكىم قوشۇمچە قىلمايتتى. سۆزلىرىم ئۇلارنىڭ قەلب ئېتىزىغا نەمخۇشلۇق ئاتا قىلاتتى.

²³ ئۇلار يامغۇرغا تەلپۈنگەندەك ماڭا تەلپۈنەتتى. باھار يامغۇرىغا تەشنا بولغاندەك سۆزلىرىمگە تەشنا بولاتتى.

²⁴ مەن ئۇلارغا قاراپ كۈلۈمسىرىسەم، ئۇلار كۆزلىرىگە ئىشىنەلمەي قىلاتتى، چېھرىمدىكى نۇرنى قەدىرلەيتتى.

²⁵ ئۇلارغا يول كۆرسىتىپ بېرىدىغان يېتەكچى ئىدىم. خۇددى پادىشاھ لەشكەرلىرى ئارىسىدا ياشىغاندەك ياشىغانىدىم. قايغۇرۇپ ھەسرەتتە قالغانلارنىڭ تەسەللى بەرگۈچىسى ئىدىم.