तीतस 2 - ह्योल्मोतेहन्दामकी लुहङ 1 ओहले ख्येगीदी तेहन्दामगी लुहङला येहकेन्की तामया़ मिहया़ला लोप्तोङ। 2 क़ेहङगेन मिहया़ला, ख्या फे़बेया़गी स्यिहताङ ना़ ख़ूएँदी ओहङ कोहकें, लेहमेन मिहया़गी चा़ पेहच्ये सी़हगेन्दी ओहङ कोहकें, ङोह स्य़ेगे ओहङ कोहकें ओहले किन्ज्योला तेहपा पेहलुला स्युक छ्यिम्बु ओहङ कोहकें, मिहया़ला चेवा पेह स्ये-कोहकें ओहले ना़स्यीङ छ्यिम्बु ओहङ कोहकें म़ेदी लोप्तोङ। 3 ओ़ह ल़ेहमुराङ पेहती क़ेहङगेनया़ला, किन्ज्योला क्याप्केन्गी पी़हमीया़गी काह-ठि पेहती राहङगी मिहजी ताङगे ओ़ह ल़ेहमुराङ पेहती ख्याया़गीॱआङ राहङगी मिहजी ताङ कोहकें, लेहमेन मिहला स्यिती काम्बुला फातुर च़ूज्ये मेहयोहङगे, छ्याङगी ज़िज्ये मेहयोहङगे, ओहले का़हन्दी या़हबु येहबा खुङया़गी मिहया़ला ओ़हदीॱराङ लोप्च्यु म़ेदी लोप्ताम क्याहप्तोङ। 4 ओ़ह ल़ेहमु यिहन्सीमाना च्यी़राङ क़ेहङगेन पी़हमीया़गी पोहमो स्यार्माया़ला, राहङगी ख्योवा दाङ पुह पोहमोया़ला निङज्यी पेहच्येला च्याहङदार तेर ख़ूज्ये येह। 5 ओहले खुङगी राहङगी राहङला सेम थिक-चिला ज़्या़गेन, टाहङबु सेम थो़गे, मिहला निङज्यी पेहकें, या़हबु टोहङबा ज़ुङगे ओहले ख्योवागी ओङ चो़ला तेहकेन्गी लुहङया़ तेर्च्ये येह। ओ़हठी पेहसीमाना च्यी़राङ मिहया़गी किन्ज्योगी लुहङला क्येन ता़ ख़ूज्ये म़ेह। 6 ओ़ह ल़ेहमुराङ पेहती, स्याराया़लाॱआङ राहङगी राहङला सेम थिक-चिला ज़्या़गेन्गी लुहङ तेर्तोङ। 7-8 ख्येगीराङ ल़ेह थाम्ज्यी या़हबु पेहती खुङया़ला पे तेन्दोङ। लुहङ तेर्केमु तेहन्दाम, ख्येला लेहमेन मिहया़गी ची़नाङ पेहकेन छ्याप्स्यीगी, सुज्यीगीॱआङ ताम च्येह मी़हखुएँगी तामया़ तिक्पु पेहती खुङया़ला लोप्तोङ। ओहले ओहराङला टाह पेहकेन मिहया़गी ओहराङला च्यिॱआङ चोक्पा तामया़ मा ख़ूज्ये म़ेह ओहले खुङया़ ङोहजाला छ्यिच्ये येह। 9 ओहले योक्पुया़ॱआङ राहङगी ताहक्पुगी ओङ चो़ला तेह कोहकें, राहङ ताहक्पुला खा लो़हज्ये मेहयोहङगे, ओहले या़हबु ल़ेहया़ पेहती राहङगी ताहक्पुला क़ेहनाङ लाहङच्यु कोहएँ म़ेदी योक्पुया़ला लोप्ताम क्याहप्तोङ। 10 खुङया़गी राहङकी ताहक्पुकी पेलाया़ कुमेन माह-क्याहप्च्यु यिहॱनाङ नाहम माॱनाङ या़हबु-या़हबु ल़ेहया़ पेहती ताहक्पुकी ज़ी़लुला खुङ यिह-छ्य़ेबु ओहङ ख़ूज्यु। दि ल़ेहमु पेहती खुङया़गी च्यि ल़ेहलामाॱनाङ ओहराङला थार्पा नाङगेन्गी किन्ज्योगी लुहङला चा़ छ्यिम्बु ज़ो ख़ूज्यु। 11 च्यिबेमाना मिह थाम्ज्यीगी थार्पा ज्योर ख़ूज्यु म़ेदीराङ किन्ज्योगी काटीन तेन नाङग्यो यिहम्बा। 12 दि काटीनगी ओहराङला चोक्पा मिहली दाङ राहङ ज़ुबुगी चा़ पेहकेन्गी जाम्बुलीङकी से़हया़ पाङ च्य़ूगे ओहले दि काटीनकी पेहती राहङगी राहङला सेम थिक-चिला ज़्या़दी दि जाम्बुलीङला तेहन्दाम दाङ टाहङबु पेहती मिहजी ताङ ख़ूएँ। 13 ङ्यिहगी सोनाम-साक्पुकी रेहवा– ओहराङगी थाम्ज्यी म़ेदी चा़ छ्यिम्बु किन्ज्यो दाङ ओहराङला थार्पा नाङगेन येशू मास्यीका राहङगी ज़िज्यिद छ्यिम्बुला फेप नाङगेन्गी ङ्यिहमाला ङ्यिह क़ूह तेहको येहबा। 14 येशू मास्यीकागी ओहराङला तिहक्पा ना थाम्ज्यीले थार च्य़ू नाङज्येला, टाहङबु ज़ो़-नाङज्येला, राहङदीराङ मिहया़ ज़ो़-नाङज्येला, या़हबु ल़ेहया़ पेहच्येला स्युक क्ये च्य़ूज्येला मिहरोगी राहङकी मिहलीॱराङ च्यिहम्बा ताङ नाङसीन। 15 ओहले ख्येगी दि लुहङ तेर्केमु ओङ थाम्ज्यी थो़दी स्युक क्ये च्य़ूदोङ ओहले बार्ता लाङदोङ। सुज्यीगीॱआङ ख्येला ङ्येन्ज्येन पेह माहङ्युहङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.