तीतस 1 - ह्योल्मोपावलकी टास्यी-देले 1 किन्ज्योकी योक्पु दाङ मास्यीका येशूकी ल़ेह-पेन ङाह पावल लाहमले दि यिहगी प्रुहएँॱराङ येहबा। ओहले किन्ज्योगी दाम नाङग्योकी मिहया़ला तेहपाला सान्दी ज़ोज्येला ओहले मिहरोगी थु-सेम जे नाङगेन मिहली ङ्याम्बु डी़गेन्गी तेहन्दामकी लाहम ङो़ले खुङया़ला ठिच्येला ङाहला कुल नाङसीन। 2 दि तेहन्दामदी था़ म़ेहबा मिहलीकी रेहवाला छ्या़दे येहबा। नाहमॱआङ स्योप क्याप मेहनाङगेन किन्ज्योगी जाम्बुलीङ छ्या़ च्य़ू नाङगेन म़ेदी तोहङलेराङ, “मिहया़ला था़ म़ेहबागी मिहली ज़ाङबु नाङगेन” सुङदी ताहम्ज्या ज़्या़ नाङदी येहकें, 3 ओहले ठाबे ती़हजीलाराङ मिहरोगी दि राहङगी लेहङगु या़हबुया़ तेन नाङसीन। ओहले दि लेहङगु या़हबुया़ स्येच्येला ओहराङला थार्पा नाङगेन किन्ज्योगी का नाङदी ङाहला चि क्याहप नाङसीन। 4 ङ्यिह यिह-छ्य़े च्यी़ला येहकेन्गी ङाहती तेहन्दामगी पुह तीतसला दि यिहगी प्रुहएँॱराङ येहबा। किन्ज्यो याहप दाङ ओहराङला थार्पा नाङगेन्गी मास्यीका येशूगी ख्याया़ला काटीन दाङ स्य़िहदे नाङज्यु। क्रेटला तीतसकी ल़ेह 5 ओ़हला खादी लिहक्योकी ल़ेहया़ छाङबु पेहच्ये दाङ ङाहगी माक्यो ल़ेहमुराङ क्याहसा टाहङमाराङ एल्डरया़ दाम्ज्येला ङाहगी ख्येला क्रेटला क्युर ज़्या़क्यो यिहम्बा। 6 छेन्छोककी एल्डरया़ला सुज्यीगीॱआङ क्येन ता-माहखू़ज्यू, ओहले खोगी पी़हमी च्यी़ ङ्याम्बु च्यी़राङ पा़हमा पेहक्यो ओहङ कोहकें, ओहले खोती पुह पोहमोया़गी चो़वोला यिह छ्य़ेक्यो ओहङ कोहकें, डोलु-तेहलुया़ या़हबु ओहङ कोहकें, ओहले माक्योकी तामया़ ङ्यिहन्गेन्दी ओहङ कोहकें। 7 छेन्छोककी गोबागी किन्ज्योकी छ्या़लेया़ ची़ लेहन्ग्यो ओहङगे। ओ़ह सोङबे खो च्यिॱआङ क्येन म़ेहबाकी मिह ओहङ कोहकें। ओहले खोगी छ्य़ेन्दो तेन्ज्ये मेहयोहङगे, ग्यो़बाराङ स्यिहताङ पेहच्ये मेहयोहङगे, छ्याङसीवा ओहङज्ये मेहयोहङगे, मिहया़ ङ्याम्बु ठ़ूस्यी सिहङदा पेहच्ये मेहयोहङगे ओहले क्युहला ह्अम्बा पेहच्ये मेहयोहङगे। 8 ओहले खोगी टोहम्बोया़ला फेप स्युहएँ, या़हबु तामया़ थो़ला सेम ताङगेन, ह्अदा-ह्ओदे माहबेपा पेहती ल़ेह पेहकेन, मिह थेका, टाहङबु, दाङ राहङगी राहङला थिक-चिला ज़्या़गेन्दी ओहङ कोहकें। 9 राहङगी ज़्योरक्योगी तेहन्दामकी लुहङदेनला क्याप्ती तेहकें ओहले लेहमेन मिहया़लाॱआङ दि लुहङदेन लोप्ती स्युक तेर ख़ूएँदी ओहङ कोहकें। ओहले दि लुहङदेन ङ्यिहगी लोप्क्यो ल़ेहमुराङ ओहङ कोहकें ओहले दि लुहङदेनला टाह पेहकेन मिहया़दी ङ्य़ेहबा तेन तेर ख़ूएँदी ओहङ कोहकें। 10 च्यिबेमाना माहङ-छ्येवा मिहया़ लेहमेनकी ओङ चो़ला तेहच्ये सेम मेहबेकें, फेन मेहथोएँकी तामया़ माएँ ओहले गो़ कोर च्य़ूगेनया़ ओहङगे, ओ़ह नाहङॱलाङ माहङ-छ्येवा स्या-ताक पेह कोहकें माएँया़राङ ओ़ह ल़ेहमु ओहङगे। 11 खुङगी खाला खास्यो माहक्याहप्पा मेहयोहङगे, च्यिबे मासीमाना खुङया़गीनी लोप्च्येराङ मे़हयोहङगेन्गी तामया़ लोप्ती खाङबा मे़हमेया़ थाम्ज्यीला ठू़ च्य़ूदी येह। टाङगा ज़ो़ज्येगी तेहन्दाला च्यी़राङ खुङया़गी दि ल़ेहमु पेहक्यो यिहम्बा। 12 क्रेटतीॱराङ लुहङतेम्बा च्यी़गी दि ल़ेहमु म़ेदी येह, “क्रेटकी मिहया़ नाहम पेहॱनाङ स्योप क्याहप्कें, खुङ ङ्येहम्बा सेम्ज्येन, ल़ेहमी-लाहम ओहले माहङबु साहएँया़ ओहङगे।” 13 दि ताम तेहन्दाम यिहम्बा। ओ़ह सोङबे खुङया़ यिह-छ्य़ेला तिक्पु डो ख़ूज्यु म़ेदी खुङया़ला या़हबु बार्ता लाङदोङ। 14 ओ़हठी पेहसीमाना च्यी़राङ तेहन्दामकी स्याहलला मी़हचीएँ मिहया़गी का दाङ तेहन्दा म़ेहबा यहूदीया़की पेतामया़ला ची़ज्ये म़ेह। 15 चाङमा मिहया़गी तेहन्दाला थाम्ज्यी से़हया़ चाङमाॱराङ येह। यिहॱनाङ मेहचाङा दाङ यिह मे़हछ्येगेया़गी तेहन्दालानी च्यि से़हॱआङ चाङमा म़ेह च्यिबेमाना खुङया़गी सेम दाङ नावा ङ्यिकाराङ चाङमा म़ेह 16 खुङया़गी किन्ज्योला ङोह स्य़ेगे म़ेदीनी माएँ यिहॱनाङ खुङया़गी पेहक्यो ल़ेहया़गीदी किन्ज्योला मा-लोक पेहक्यो म़ेदी तेन्गे। खुङया़नी नाम्दो लाहङज्ये ल़ेहमु ओहङगे ओहले किन्ज्योगी काया़ मी़हची़एँदी ओहङगे ओहले खुङ का़हन्दीॱआङ या़हबु ल़ेहया़ पेहच्येला मी़हसीहएँ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.