रोमी 9 - ह्योल्मोकिन्ज्योगी दाम नाङग्योकी क्यिहपा 1 ता़ह ङाहगी माज्ये पेहक्योगी तामया़ तेहन्दाम यिहन। ङाह मास्यीकाती यिहम्बा, ङाह स्योप मेहक्याहप। ङाहती नावा दाङ नाम्पार-ताहक्पा थुगीॱआङ पाङबु तेर्के। 2 इस्राएली आदा-नो़ह दाङ आज्यी-नुहमुया़की तेहन्दाला ङाहती सेम नाहङला ज्यिबुराङ तुहक्पु दाङ तुहङाल येहबा। 3 ङाहला मास्यीकालेगी खा फ़ेगेनकी मे़मु सू़हदी ङाहती क्यिहपा दाङ ङाहती यहूदी आदा-नो़ह दाङ आज्यी नुहमुया़ती थार्के यिहनानी ङाह ज्यिबुराङ क़ेहनाङ लाहङज्ये येहकें। खुङया़ थार्च्यु माएँज्यीराङ ङाहती ज्यिबुराङ छ्यिम्बु सेम्बा येहबा। 4 खुङ इस्राएलीया़ यिहम्बा ओहले किन्ज्योगी खुङया़ला राहङदीराङ पुह-पोहमो ज़ो नाङसीन। किन्ज्योगी राहङगी ज़िज्यिद खुङया़ला तेन नाङसीन। खुङया़ ङ्याम्बुराङ किन्ज्योगी राहङगी ताहम्ज्या ज़्या़ नाङसीन ओहले खुङला छ्य़े-ठिम नाङसीन, किन्ज्योला स्याहप्तो स्य़ूहज्येला लोप नाङसीन, मिहरोगी ताहम्ज्याया़ खुङया़गी ज्योर्सीन। 5 इस्राएलीया़ ज्यिबुराङ छ्यिम्बु मिहन थोप्क्यो चावाया़गी छार्क्यीन यिहम्बा, मास्यीका मिहरोॱआङ दि क्यिहपाला ठुङ नाङसीन। मिहरोनी थाम्ज्यी थो़ला ठिम ताङ नाङगे किन्ज्योॱराङ यिहम्बा। मिहरोला नाहम-माना त़ेरा तेच्या फुल्ज्यु। आमेन। 6 यिहॱनाङ किन्ज्योकी सुङ तेहन्दा माहन्डुपानी मिहम्बा। च्यिबेमाना इस्राएल क्यिहपाला क्येक्योगी मिह थाम्ज्यी किन्ज्योगी छार्क्यीन मिहम्बा, 7 अब्राहामकी छार्क्यीन यिहन म़ेदी थाम्ज्यी अब्राहामकी पुह-पोहमो मेहयोहङगे। यिहॱनाङ छ्य़ेला प्रुहक्यो ल़ेहमु, “इसहाक ङो़लेराङ मिहरोगी छार्क्यीनया़ टाहङमा क्याहप्च्ये येह।” 8 दिगी तेहन्दा, ज़ुबु लाहमले क्येक्यो थाम्ज्यी किन्ज्योकी छार्क्यीन मिहम्बा, यिहॱनाङ किन्ज्योगी ज़्या़ नाङग्योकी ताहम्ज्या लाहमले क्येक्योया़ च्यी़राङ अब्राहामकी छार्क्यीन यिहम्बा। 9 च्यिबेमाना किन्ज्योगी दि ल़ेहमु सुङदी ताहम्ज्या ज़्या़ नाङग्यो येहकें, “ङाहगी माक्यो ती़हजीला ङाह लो़हदी ओहङज्ये येह, ओहले सारागी पुह च्यी़ क्येज्ये येह।” 10 ओहजे च्यी़राङ मिहम्बा, रिबेकागीॱआङ ओहराङ चावा इसहाक लाहमलेॱराङ जाउँले पुह ङ्यी़ क्येसीन। 11-13 यिहॱनाङ ओ़ह जाउँले पुह ङ्यी़ आमाकी फोवा नाहङला येहकेंमु ओहले खुङ ङ्यी़गी च्यिरा या़हबु चोक्पा ल़ेह पेहकें म़ेदी तोहङलेराङ किन्ज्योगी जाउँले पुह ङ्यी़ नाहङला च्यी़ला दाम नाङदी रिबेकाला सुङ नाङसीन, “आदादीगी नो़हला स्याहप्तो स्युहज्ये येह।” किन्ज्योगी सुङ नाङग्यो ल़ेहमुराङ छ्य़ेला दि ल़ेहमु प्री़हदी येहबा, “ङाहगी याकूबला चेवा पेहसीन ओहले एसावलाती क्युक्टो पेहसीन।” दि ल़ेहमु जेती किन्ज्योगी मिहया़की ल़ेहला ज़ी़दी दाम मेहनाङगे यिहॱनाङ मिहरोगी थुला ठुङग्यो ल़ेहमु जे नाङगे सुङदी किन्ज्योगी थिउ-निउ जे नाङसीन। 14 ओ़हठी यिहन्सीमाना ता़ह ङ्यिहगी च्यि माज्ये? च्यि किन्ज्योगी आन्या जे नाङगे ले? मिहम्बा, ओ़ह ल़ेहमु किन्ज्योगी नाहमॱआङ जे मेहनाङगे! 15 च्यिबेमाना किन्ज्योगी मोशाला सुङ नाङसीन, “का़हन्दीला ङाह थुज्यी पेहच्ये सेम क्येएँ, ओ़हदीलाॱराङ ङाह थुज्यी पेहकें ओहले का़हन्दीला ङाह निङ च्येहएँ, ओ़हदीॱराङ ङाह निङज्यी पेहकें।” 16 ओ़ह सोङबे मिहगी सेम्बा दाङ स्युक थो़ला दि ले खाल मी़हखुएँ, यिहॱनाङ किन्ज्योकी थुज्यी थो़ला ले खाल ख़ूएँ। 17 सुङरापगी मिश्र क्याहल-खापकी क्याहल्बु फारोगी तेहन्दालाॱआङ ओ़हठीॱराङ सुङ नाङगे, “ख्येला क़े क्याहप्ती ङाहती ओङ तेन्ज्ये ओहले जाम्बुलीङ थाम्ज्यीला ङाहती मिहन फेल च्य़ूज्ये म़ेदीराङ ङाहगी ख्येला क्याहल्बु ज़ोसीन।” 18 ओ़ह सोङबे किन्ज्योगी राहङला थु-सेम जे नाङग्योया़ला मिहरोगी थुज्यी ज़ी़ नाङगे, ओहले मिहरोगी थु-सेम जे नाङग्यो मिहया़गी यिहला सान्दी ज़ो नाङगे। किन्ज्योकी थुयाल दाङ काटीन 19 ख्या नाहङला लाहलागी ङाहला दि ल़ेहमु मारो, “ओ़हठी यिहन्सीमाना च्यिबे किन्ज्योगी मिहला फातुर च़ू नाङगे ले? ओहले किन्ज्योगी थु-सेमला सुगीॱआङ का़ ख़ूएँ ले?” 20 यिहॱनाङ मिह काहल्दी किन्ज्योला ल़ेहन क्याहप्के ख्ये सु यिहम्बा? सासाकी नेक्यीगी “ङाहला च्यिबे दि ल़ेहमु ज़ोक्यो?” म़ेदीमाॱराङ ज़ोएँ मिहला टी़ह ख़ूएँ ले? 21 सासागी नेक्यी ज़ोएँ मिहगी राहङगी च्योप्क्यो सासालेगी राहङ सेमला ने़जेबा नेक्यी ज़ोएँ। सासा फोल्दोङ च्यी़लेगी लाहलाला चा़ छ्यिम्बु ल़ेहगी तेहन्दाला लाहलाला फेमा ल़ेहगी तेहन्दाला नेक्यी ज़ोएँ। दि खोगी सेमगी ताम यिहम्बा। 22 ओ़हठीॱराङ पेहती किन्ज्योगी राहङगी थुयाल दाङ ओङ तेन नाङज्येला मिहरोगी तोङ च्य़ू नाङज्येला ठाबे जे नाङग्योगी थुयालकी मिहया़ला ज्यिबुराङ ना़स्यीङ छ्यिम्बु जेती ना़दी ज़्य़ू नाङग्यो येहबा। 23 ज़िज्यिदकी तेहन्दाला तोहङलेराङ ठाबे जे नाङग्यो किन्ज्योगी थुज्यी ज़ी़ नाङग्योकी मिहया़ला राहङदी ज़िज्यिदकी क्युह तेन नाङज्येला मिहरोगी दि ल़ेहमु जे नाङसीन। 24 च्यिबेमाना मिहरोगी क़े क्याहप नाङग्योकी मिहया़ ओहराङॱआङ यिहम्बा। मिहरोगी यहूदीया़ला च्यी़राङ क़े क्याहप माहनाङ यिहॱनाङ लेहमेन क्यिहपाकी मिहया़लाॱआङ क़े क्याहप नाङसीन। 25 लुहङतेम्बा होशेकी छ्य़ेला किन्ज्योगी लेहमेन क्यिहपाकी मिहया़गी तेहन्दाला दि ल़ेहमु सुङ नाङदी येहबा– “खुङया़ ङाहती मिह मिहनॱनाङ, ङाह खुङया़ला ‘ङाहती मिहया़’ म़ेदी क़े क्याहप्च्ये येह। ओहले ङाहगी चेवा माहबेबाया़ला, ‘ङाहती च्याहम्बु’ म़ेदी ङाह क़े क्याहप्च्ये येह।” 26 “ओहले का़हला ‘ख्या ङाहती मिह मिहन’ म़ेदी खुङला माक्यो येहकें, ओ़ह ग्या़लाराङ खुङ ‘सोम्बो किन्ज्योकी छार्क्यीन यिहम्बा’ म़ेदी माज्ये येह।” 27 ओहले यशैया मिहन थो़क्यो लेहमेन लुहङतेम्बा च्यी़गी इस्राएलीया़की तेहन्दाला दि ल़ेहमु सुङदी येह, “इस्राएलकी मिहया़गी टाहङजी छो-क्याहम्जोकी पेहमाजेराङ माहङबु येहॱनाङ खुङया़ नाहङला लिहक्योया़ला च्यी़राङ थार च्य़ू नाङज्ये येह। 28 च्यिबेमाना चो़वोगी जाम्बुलीङला मिहरोगी ङ्य़ेहबा काल नाङगेन्गी का ग्यो़बाराङ छाङबु जे नाङज्ये येह।” 29 दिॱआङ यशैयागी तोहङलेराङ सुङ नाङदी येह, “का़हलेॱआङ चा छ्येवा किन्ज्योगी ओहराङगी तेहन्दाला च्यी़ॱआङ छार्क्यीन लीह च्य़ू माहनाङबा यिहनानी ओहराङ इस्राएलीया़ सदोम दाङ गमोराकी मिहया़ ल़ेहमुराङ तोङज्ये येहकें।” इस्राएल दाङ या़हबु लेहङगु 30 ता़ह ओहराङ च्यि माज्ये ले? टाहङदेनकी लाहमला मी़हस्युहएँ लेहमेन क्यिहपाया़गी टाहङदेन ज्योर सिहन्दी येह, पे यिहॱना़: यिह-छ्य़े लाहमले ज्योर्केन्की टाहङदेन। 31 यिहॱनाङ इस्राएलीया़गी छ्य़े-ठिम ची़दी किन्ज्योगी दिनला टाहङबु सी़हज्ये माहङबुराङ छोल्सीन यिहॱनाङ खुङ टाहङबु सी़ह मा़हखु। 32 च्यिबे मा़हखु? च्यिबेमाना ल़ेह पेहती च्यी़राङ मिह टाहङबु सी़ह ख़ूएँ ने़दी खुङया़गी यिह-छ्य़े लाहमले टाहङदेन माहछोल। दि ल़ेहमु पेहती येशू मास्यीका खुङगी तेहन्दाला नार्तो क्याहप्केन्गी तोह ल़ेहमु च्यी़ काहल्सीन। 33 मास्यीकाकी तेहन्दाला किन्ज्योगी सुङ नाङग्यो ल़ेहमुराङ सुङरापला ओ़हठीॱराङ प्री़हदी येहबा, “त़ेदोङ, ङाह सियोनला तोह च्यी़ ज़्या़ज्ये येह, ओ़ह तोह-पा़राला मिहया़ नार्तो क्याहप्च्ये येह, तोह-पा़रा च्यी़, का़हन्दीगी खुङया़ला रिहल्ज्ये येह, यिहॱनाङ मिहरो थो़ला यिह छ्य़ेगेन सुज्यीॱआङ ङोहजाला छ्यिच्ये म़ेह।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.